இன்று மாலை தொடக்கம்: அரசு கலைஅறிவியல் கல்லூரிகளுக்கு ஆன்லைனில் விண்ணப்பிக்க 38 சிறப்பு மையங்கள்…

சென்னை:

அரசு கலை கல்லூரிகளுக்கு  மாணவர் சேர்க்கை ஆன்லைன் மூலம் இன்று மாலை 6 மணிக்கு தொடங்குகிறது. இதையொட்டி, இணையதளம் வசதி இல்லாதவர்கள், ஆன்லைன் மூலம் விண்ணப்பிக்க 38 சிறப்பு மையங்களை கல்லூரி கல்வி இயக்ககம் அறிவித்து இருக்கிறது.

கொரோனா தொற்று காரணமாக கல்வி நிறுவனங்கள் மூடப்பட்டுள்ளதால், இந்த கல்வி ஆண்டுக் கான மாணவர் சேர்க்கை தாமதமாகி உள்ளது.  இதையடுத்து ஆன்லைன் மூலம் விண்ணப்பங்கள் பெற்று மாணவர் சேர்க்கைகளை பல தனியார்கள் ஏற்கனவே தொடங்கி விட்டன.

இந்த நிலையில், அரசு கலை மற்றும் அறிவியல் கல்லூரிகளில் மாணவர்கள் சேருவதற்கு இந்த ஆண்டில் ஆன்லைன் மூலம் விண்ணப்பிக்கலாம் என்று உயர்கல்வித்துறை கடந்த இரு நாட்களுக்கு முன்பு அறிவித்தது.

அதன்படி, அரசு கலை கல்லூரிகளுக்கு www.tngasa.in மற்றும் www.tndceonline.org என்ற இணையதள முகவரியில் இன்று  மாலை (திங்கட்கிழமை) 6 மணி முதல் விண்ணப்பிக்கலாம் என்றும் தெரிவிக்கப்பட்டு இருந்தது.

இந்த நிலையில் அரசு கலை கல்லூரிகளுக்கு ஆன்லைன் மூலம் விண்ணப்பிக்க உதவுவதற்கு தமிழகத்தில் 38 சிறப்பு மையங்களை கல்லூரி கல்வி இயக்ககம் அறிவித்து இருக்கிறது.