இமாச்சலப் பிரதேச மாநிலம் தர்மசாலாவில் வசித்து வரும் புத்த மத தலைவர் தலாய் லாமா மற்றும் ஒரிசா மாநிலம் பூரி மக்களவை தொகுதி எம்.பி. சம்பித் பாத்ரா ஆகியோருக்கு இசட் பிரிவு பாதுகாப்பு வழங்க மத்திய உள்துறை அமைச்சகம் உத்தரவிட்டுள்ளது.
தலாய் லாமாவுக்கு இதுவரை இமாச்சலப் பிரதேச காவல்துறையின் ஒரு சிறிய பாதுகாப்புப் பிரிவு பாதுகாப்பு வழங்கிவந்தது. அவர் டெல்லி அல்லது வேறு எந்த இடத்திற்கும் பயணம் செய்தபோது, உள்ளூர் காவல்துறையினரால் அவருக்கு பாதுகாப்பு வழங்கப்பட்டது.
தவிர, பூரி எம்.பி. சம்பித் பத்ரா மணிப்பூர் பாஜக பொறுப்பாளராக உள்ளதை அடுத்து அவருக்கு மணிப்பூரில் இசட் பிரிவு பாதுகாப்பு வழங்கப்பட்டுள்ளது.
30 CRPF கமாண்டோக்கள் கொண்ட குழு இவர்களுக்கு பாதுகாப்பு அளிப்பார்கள். புலனாய்வுப் பணியகத்தின் (IB) அறிக்கைக்குப் பிறகு உள்துறை அமைச்சகம் இந்த முடிவை எடுத்துள்ளது.
1935 ஆம் ஆண்டு லாமோ தொண்டப் என்ற பெயரில் பிறந்த தலாய் லாமா, தனது இரண்டு வயதிலிருந்தே திபெத்திய ஆன்மீகத் தலைவரின் மறுபிறவியாகக் கருதப்படுகிறார். 1940 ஆம் ஆண்டு திபெத்தின் தலைநகரான லாசாவில் 14வது தலாய் லாமாவாக திபெத்திய ஆன்மீகத் தலைவராக அங்கீகரிக்கப்பட்டார்.
1950 ஆம் ஆண்டு, சீனா திபெத்தை தாக்கியது. சீனாவிற்கு எதிரான தோல்வியுற்ற கிளர்ச்சிக்குப் பிறகு தலாய் லாமா 1959 இல் இந்தியா வந்தார். அப்போதிருந்து அவர் இமாச்சலப் பிரதேசத்தின் தர்மசாலா நகரத்தில் நாடுகடத்தப்பட்டு வசித்து வருகிறார். 1989 ஆம் ஆண்டு அவருக்கு அமைதிக்கான நோபல் பரிசு வழங்கப்பட்டது.
தலாய் லாமா துறவறக் கல்வியைப் பெற்று, திபெத்தியர்களுக்கான நீதிக்காக பல ஆண்டுகளாகப் போராடி வருகிறார். அவர் ஆறு கண்டங்களுக்கும் 67க்கும் மேற்பட்ட நாடுகளுக்கும் பயணம் செய்துள்ளார். சீனா திபெத்தை ஆக்கிரமித்த பிறகு தலாய் லாமா இந்தியாவுக்கு வந்து 62 ஆண்டுகளுக்கும் மேலாகிவிட்டது.
89 வயதான தலாய் லாமாவின் பாதுகாப்புப் பொறுப்பை மத்திய ரிசர்வ் போலீஸ் படையின் (CRPF) விஐபி பாதுகாப்புப் பிரிவை ஏற்குமாறு மத்திய உள்துறை அமைச்சகம் உத்தரவிட்டுள்ளதை அடுத்து இனி நாட்டின் அனைத்துப் பகுதிகளிலும் CRPF கமாண்டோக்களின் Z-வகை பாதுகாப்புப் பாதுகாப்புடன் தலாய் லாமா பாதுகாக்கப்படுவார் என்பது குறிப்பிடத்தக்கது.