லக்னோவின் புறநகர் பகுதியான புத்தேஷ்வரில் உள்ள திருமண மண்டபம் ஒன்றில் சிறுத்தை புகுந்ததை அடுத்து இரண்டு பேர் காயமடைந்தனர்.
எம்.எம். லான் என்ற புல்வெளியுடன் கூடிய திருமண மண்டபத்தில் அக்ஷய் குமார் மற்றும் ஜோதி ஆகியோரது திருமணம் நடைபெற்றது.
அப்போது இரவு சுமார் 10:30 மணியளவில் தீபக் என்ற நபர் ஏதோ வேலைக்காக புல்வெளியில் கட்டப்பட்ட கட்டிடத்தின் இரண்டாவது மாடிக்குச் சென்றார். தனக்கு முன்னால் சிறுத்தை இருப்பதைக் கண்டு பயந்து போன அவர் இரண்டாவது மாடியிலிருந்து கீழே குதித்தார். இதனால் அவர் பலத்த காயமடைந்தார். பின்னர், அவர் மருத்துவமனையில் அனுமதிக்கப்பட்டார்.
இதனைத் தொடர்ந்து இந்த திருமண நிகழ்ச்சியின் வீடியோ பதிவு அங்குள்ள திரையில் நேரலையில் ஒளிபரப்பாகிக் கொண்டிருந்த நிலையில் அங்கு சிறுத்தை இருப்பதை பார்த்த மக்கள் அதிர்ச்சியடைந்தனர்.
இதனால் அங்கு குழப்பமான சூழல் நிலவியதை அடுத்து மக்கள் தங்கள் உயிரைக் காப்பாற்றிக் கொள்ள இங்கும் அங்கும் ஓடத் தொடங்கினர். கட்டிடத்தில் சிறுத்தை இருப்பதாக தகவல் கிடைத்ததை அடுத்து கூட்ட நெரிசல் ஏற்பட்டது. பெண்களும் குழந்தைகளும் பாதுகாப்புக்காக தனித்தனி அறைகளில் பூட்டப்பட்டனர்.
திருமணத்திற்கு வந்திருந்த புல்வெளி உரிமையாளர் ரெஹ்மானும், ஹர்சேவக் பிரசாத் திவேதியும் வனத்துறையினருக்கு தகவல் தெரிவித்தனர்.
தகவல் கிடைத்ததும் சம்பவ இடத்திற்கு வந்த வனத்துறையினர் சிறுத்தையை பிடிக்கும் முயற்சியில் தீவிரமாக இறங்கினர். இந்த முயற்சியில் மாலிஹாபாத் ரேஞ்ச் இன்ஸ்பெக்டர் முகதர் அலி என்பவரை சிறுத்தை தாக்கியதில் அவர் காயமடைந்தார்.
இந்த தாக்குதலுக்குப் பிறகு, ஹர்டோய் மாவட்டத்தைச் சேர்ந்த கச்சுனா ரேஞ்சர் தனது குழுவுடன் புல்வெளியின் இரண்டாவது மாடிக்கு படிக்கட்டுகளில் ஏறி சிறுத்தையை மீட்கச் சென்றபோது, சிறுத்தை தாக்கியது. இந்தத் தாக்குதலில், வன அதிகாரி உட்பட பல வன அதிகாரிகள், படிக்கட்டுகளில் இருந்து தடுமாறி விழுந்தனர்.
இதையடுத்து வனத்துறை ஊழியர்கள் சிறுத்தையை நோக்கிச் சுட்டு விரட்டியபோது, அது இரண்டாவது மாடியிலிருந்து ஓடிப்போய் புல்வெளியில் வேறு எங்கோ ஒளிந்து கொண்டது. டெண்டுலா புல்வெளியில் எங்கோ இருப்பதாக லக்னோ டிஎஃப்ஓ சிதாஷு பாண்டே கூறினார்.
சம்பவ இடத்தில் இருந்த வனத்துறையினர் சிறுத்தையைப் பிடிக்க தீவிர தேடுதல் வேட்டையில் ஈடுபட்டு உள்ளனர்.
எம்.எம். லான் திருமண மண்டபத்திற்கு 10 கி.மீ. தொலைவில் ரெஹ்மான் கெடா காடு உள்ளது. கடந்த 68 நாட்களாக இந்த காட்டில் இருந்து 20 முதல் 25 கி.மீ. சுற்றளவில் உள்ள பகுதிகளில் புலி நடமாட்டம் இருப்பதாக மக்கள் மத்தியில் பீதி இருந்து வருகிறது.
இங்கு வனத்துறை குழு தொடர்ந்து புலியைப் பிடிக்க முயற்சிப்பதாகக் கூறி வருகிறது, ஆனால் அது பிடிபடவில்லை.
இந்த நிலையில் திருமண மண்டபம் ஒன்றில் சிறுத்தை இருந்ததை கண்டு மக்கள் பெரும் அச்சத்தில் உறைந்துள்ளனர்.
புலி நடமாட்டம் இருந்துவருவதாகக் கூறிவந்த நிலையில் அங்கு சிறுத்தை இருப்பதை வனத்துறை அதிகாரிகள் உறுதி செய்துள்ள நிலையில் அதனை தேடும் பணியை தீவிரப்படுத்தியுள்ளனர்.