சென்னை: பட்டினப்பாக்கத்தில் இன்று (ஏப்ரல் 22) தேர்தல் பறக்கும் படையினர் நடத்திய அதிரடி சோதனையில் ரூ. 1 கோடிக்கும் அதிகமான ரொக்கப்பணம் பறிமுதல் செய்யப்பட்டுள்ளது. இந்த பணம் வாக்காளர்களுக்கு கொடுக்க வைக்கப்பட்டிருந்ததாக கூறப்படுகிறது. இதுகுறித்து விசாரணை நடைபெற்று வருகிறது.
தமிழ்நாடு சட்டமன்ற தேர்தல் நாளை நடைபெற உள்ளது. சட்டமன்றத் தேர்தல் விதிமுறைகளின்படி, ஆவணங்களின்றி ரூ. 50,000-க்கு மேல் பணம் எடுத்துச் செல்ல தடை உள்ள நிலையில், முறையான ஆவணங்கள் இன்றி இந்த பணம் வைத்திருந்தது கண்டுபிடிக்கப்பட்டது.
சென்னை மயிலாப்பூர் சட்டமன்றத் தொகுதிக்கு உட்பட்ட பட்டினப்பாக்கம் பகுதியில், தேர்தல் விதிமுறைகளை மீறி பெருமளவு ரொக்கப் பணம் பதுக்கி வைக்கப்பட்டிருப்பதாக தேர்தல் பறக்கும் படையினருக்கு ரகசியத் தகவல் கிடைத்தது. இந்தத் தகவலின் அடிப்படையில், தேர்தல் அதிகாரிகள் மற்றும் காவல்துறையினர் குறிப்பிட்ட அந்தப் பகுதியைத் தங்கள் தீவிர கண்காணிப்பு வளையத்திற்குள் கொண்டு வந்தனர்.
தகவல் உறுதி செய்யப்பட்டதைத் தொடர்ந்து, பட்டினப்பாக்கத்தில் உள்ள சத்தியமூர்த்தி என்பவரது வீட்டை தேர்தல் பறக்கும் படையினர் சுற்றி வளைத்தனர். இந்தச் சோதனையில் வருமான வரித்துறை அதிகாரிகளும் இணைந்து கொண்டனர். வீட்டின் ஒவ்வொரு பகுதியிலும் நடத்தப்பட்ட தீவிர சோதனையின்போது, மறைத்து வைக்கப்பட்டிருந்த கட்டுக்கட்டான பணத்தைக் கண்டு அதிகாரிகள் அதிர்ச்சியடைந்தனர்.
சத்தியமூர்த்தி என்பவர் மைலாப்பூர் திமுக MLA வேலுவின் உதவியாளர் என்றும், அவரது வீட்டில் கட்டுகட்டாக ரூபாய் நோட்டுகள் கட்டிலுக்கு அடியே இருந்து பறிமுதல் செய்யப்பட்டுள்ளது.
கணக்கில் வராத மற்றும் முறையான ஆவணங்கள் இல்லாத சுமார் ஒரு கோடி ரூபாய்க்கும் அதிகமான ரொக்கப் பணத்தை அதிகாரிகள் அந்த வீட்டிலிருந்து மீட்டனர். பறிமுதல் செய்யப்பட்ட பணத்தை எண்ணுவதற்காகப் பிரத்யேக எந்திரங்கள் கொண்டு வரப்பட்டு, பல மணி நேரமாகப் பணத்தை எண்ணும் பணி நடைபெற்றது. பின்னர், இந்தப் பணம் அரசு கருவூலத்தில் ஒப்படைக்கப்பட்டது.
தேர்தல் நேரத்தில் இவ்வளவு பெரிய தொகை ஒரே இடத்தில் பதுக்கி வைக்கப்பட்டிருந்தது ஏன்? இது வாக்காளர்களுக்கு விநியோகம் செய்வதற்காக வைக்கப்பட்டிருந்ததா? அல்லது இதன் பின்னணியில் ஏதேனும் அரசியல் கட்சிப் பிரமுகர்களுக்குத் தொடர்பு உள்ளதா? என்ற கோணத்தில் அதிகாரிகள் சத்தியமூர்த்தியிடம் தீவிர விசாரணை நடத்தி வருகின்றனர்.
சென்னையின் முக்கியப் பகுதியான மயிலாப்பூர் தொகுதியில், அதுவும் பட்டினப்பாக்கம் போன்ற மக்கள் நெருக்கம் மிகுந்த இடத்தில் பிடிபட்ட இந்த ஒரு கோடி ரூபாய், தேர்தல் களத்தில் பெரும் அதிர்வலைகளை உருவாக்கியுள்ளது.
[youtube-feed feed=1]