விவசாய நிலங்களை தகுதியற்றவர்களுக்கு விற்பனை செய்ததாகவும் விவசாயம் அல்லாத பயன்பாட்டிற்கு ஒதுக்கீடு செய்ததாகவும் ஓய்வுபெற்ற ஐஏஎஸ் அதிகாரி எஸ்.கே.லங்கா மீது குஜராத் போலீசார் கடந்த வாரம் வழக்குப் பதிவு செய்தனர்.
மேலோட்டமாக இது ஒரு சாதாரண நடவடிக்கையாக தோன்றினாலும் ஏப்ரல் 2018 மற்றும் செப்டம்பர் 2019 க்கு இடையில் காந்திநகர் கலெக்டராக இருந்த லங்கா விவசாய நிலத்தை வாங்குவதற்கு தனிநபர்கள் மற்றும் நிறுவனங்களுக்கு ‘விவசாயி’ சான்றிதழ்களை தேவையான சரிபார்ப்பு இல்லாமல் வழங்கியதாக குற்றம்சாட்டப்பட்டுள்ளது.
அதே நேரத்தில் கால்நடைகளுக்கான நீர்ப்பிடிப்பு பகுதிகள், குளம் குட்டை உள்ளிட்ட விவசாய நிலத்தை விவசாயம் அல்லாத நோக்கங்களுக்காக மாற்ற 5904 கோப்புகளில் கையெழுத்திட்டதாக அவர் மீது குற்றம் சாட்டப்பட்டுள்ளது.
லங்கா மீது பதிவு செய்யப்பட்ட முதல் தகவல் அறிக்கையில் (எஃப்ஐஆர்) கலெக்டராக அரசாங்க “தேர்வு மற்றும் தேர்வு கொள்கை” நடைமுறைகளை மீறி ‘புதிய பட்டா நிலத்தை’ ‘பழைய பட்டா நிலமாக’ கருதி நில ஒதுக்கீட்டு செய்ததில் அரசு கருவூலத்துக்கு இழப்பு ஏற்படுத்தியதாக அவர் மீது குற்றம் சாட்டப்பட்டுள்ளது.
தவிர, காந்திநகரில் உள்ள பெத்தாபூர் கிராமத்தில் உள்ள அரசு நிலத்தை தனியாரிடம் ஒப்படைத்தது தொடர்பான விசாரணையை மாநில அரசு ஊழல் தடுப்புப் பணியகத்திடம் (ஏசிபி) ஒப்படைத்துள்ளது.
காந்திநகர் மாவட்டத்தில் உள்ள கலோல் தாலுகா மற்றும் அதைச் சுற்றியுள்ள பகுதிகளில் உள்ள பெரும்பாலான நிலப் பகுதிகள் ஆக்கிரமிக்கப்பட்டுள்ளது. இந்த நில மோசடியின் மொத்த மதிப்பு சுமார் 10000 கோடி ரூபாய் என்று காங்கிரஸ் மற்றும் ஆம் ஆத்மி கட்சிகள் கூறிவருகிறது.
புகார் பதிவு செய்யப்படுவதற்கு சில மாதங்களுக்கு முன்பே அரசியல் வட்டாரங்களில் பதற்றம் நிலவியது. மே மாதம் தாக்கல் செய்யப்பட்ட போலீஸ் புகார் குஜராத் முழுவதும் அரசியல் மற்றும் ரியல் எஸ்டேட் வட்டாரங்களில் பெரும் பரபரப்பை ஏற்படுத்தியது மற்றும் ஊடகங்களில் அதிக கவனத்தைப் பெற்றது.
சில நாட்களுக்கு முன், குஜராத்தி நாளிதழ் ஒன்று, முன்னாள் முதல்வர் விஜய் ரூபானி, முன்னாள் துணை முதல்வர் நிதின் படேல் மற்றும் முன்னாள் வருவாய்த்துறை அமைச்சர் கௌசிக் படேல் ஆகியோருக்கு இந்த நில ஊழலில் தொடர்பு இருப்பதாக செய்தி வெளியிட்டிருந்தது.
தவிர செப்டம்பர் 2021 இல், முதல்வர் விஜய் ரூபானி தலைமையிலான அமைச்சரவையை பதவிநீக்கம் செய்து முதல்வர் பூபேந்திர படேல் தலைமையில் புதிய அமைச்சரவையை பாஜக நியமித்ததற்கும் லங்கா எழுதிய கடிதமே காரணம் என்றும் அதில் குறிப்பிட்டிருந்தது.
2020 அக்டோபரில் இந்த விவகாரம் தொடர்பாக அந்த நேரத்தில் லங்கா மற்றும் அந்தத் துறையில் இருந்த இரண்டு அதிகாரிகள் மீது பூபேந்திர படேல் அரசாங்கம் போலீஸ் விசாரணையை தொடங்கியது.
வருவாய்த்துறையில் இதுபோன்ற பெரிய முடிவுகளை, மூத்த அதிகாரிகள் மற்றும் அமைச்சர்களுக்கு தெரியாமல் கலெக்டர் அளவிலான அதிகாரிகளால் எடுக்க முடியாது என்பதால் இந்த ஊழல் குறித்து உயர் நீதிமன்ற கண்காணிப்பில் விசாரணை நடத்த வேண்டும் என்று எதிர்க்கட்சிகள் வலியுறுத்தி வருகின்றன.
காந்திநகர் மாவட்டத்தில் நடந்த விவசாய நில ஊழலில் பாஜகவின் முன்னாள் அமைச்சர்களை பூபேந்திர படேல் அரசு பாதுகாப்பதாக காங்கிரஸ், ஆம் ஆத்மி கட்சிகள் குற்றம்சாட்டியுள்ளன.