சென்னை: சிறுதொழில்கள், கல்வி நிறுவனங்களில் உச்சநேர மின்பயன்பாட்டை (பீக் அவர்ஸ்) அறிய டி.ஓ.டி. மீட்டர் பொருத்த தமிழ்நாடு மின்வாரியம் நடவடிக்கை எடுத்துள்ளது. இதுதொடர்பாக தேவையான நடவடிக்கை மின்வாரியம் உத்தரவிட்டுள்ளது.
தமிழ்நாட்டின் மின்கட்டணம் இரண்டு முறை உயர்த்தப்பட்ட நிலையில், துல்லியமான மின் நுகர்வு கணக்கெடுக்கும் வகையில் ஸ்மார்ட் மீட்டர் பொருத்த மத்தியஅரசு அறிவுறுத்தியது. அதன்படி, தமிழ்நாடு அரசும் அதானி நிறுவனத்துடன் ஸ்மார்ட் மீட்டர் வாங்குவதற்கான ஒப்பந்தம் போட இருந்த நிலையில், எதிர்க்கட்சிகளின் கடும் எதிர்ப்பு காரணமாக, அந்த ஒப்பந்தம் ரத்தானது. இதனால், ஸ்மார்ட் மீட்டர் பொருத்தும் பணி தடை பட்டுள்ளது.
தற்போதைய நிலையில் மாநிலம் முழுவதும், மின்நுகர்வானது தினசரி காலை, மாலையில் சராசரியாக 16 ஆயிரம் மெகாவாட்டாகவும் மற்ற நேரங்களில் 15 ஆயிரம் மெகாவாட்டாகவும் உள்ளது.
இதனால், தொழிற்சாலைகள் போன்றவற்றில் காலை, மாலையில் பயன்படுத்தப்படும் மின்சாரத்துக்கு ‘பீக் ஹவர் சார்ஜ்’ எனப்படும் உச்சநேர கட்டணம் வசூலிக்கப்படுகிறது. இதன்படி, காலை 6 முதல் 10 மணி வரையும், மாலை 6 முதல் இரவு 10 மணி வரையும் உச்சநேர மின்கட்டணமாக, ஒரு யூனிட் கட்டணத்துடன், 25 சதவீதம் கூடுதலாக சேர்த்து வசூலிக்கப்படுகிறது.
இரவு 10 முதல் அதிகாலை 5 மணி வரை பயன்படுத்தப்படும் மின்சாரத்துக்கு யூனிட் கட்டணத்தில் 5 சதவீதம் தள்ளுபடி வழங்கப்படுகிறது. அதற்கு ஏற்ப உச்சநேரம், சலுகை நேரம் மற்ற நேர மின்பயன்பாட்டை தனித்தனியே கணக்கெடுக்க டிஓடி எனப்படும் ‘டைம் ஆஃப் தி டே’ மீட்டர் பொருத்தப்படுகிறது.
இந்த மீட்டர் உயரழுத்தப் பிரிவில் இடம்பெறும் மின்இணைப்புகளில் பொருத்தப்பட்டுள்ளன. தாழ்வழுத்த பிரிவில் சிறு தொழில்கள் அரசு மற்றும் அரசு உதவிபெறும் கல்வி நிறுவனங்கள், அரசு மருத்துவமனைகள், தனியார் கல்வி நிறுவனங்கள், மருத்துவமனைகளில் உச்சநேர மின்பயன்பாடு இடம் பெறுகிறது. இந்த மின்இணைப்புகளில் டிஓடி மீட்டர் பொருத்தப்படும் வரை மொத்த மின்பயன்பாட்டு கட்டணத்துடன் சேர்த்து 20 சதவீதம் கூடுதலாக வசூலிக்க 2022-ல் மின்சார ஒழுங்குமுறை ஆணையம் உத்தரவிட்டுள்ளது.
அதன்பிடி மின்மீட்டர்கள் பொருத்தப்பட்டு கட்டணம் , வசூலிக்கப்படுகிறது. இதனால் பல தொழில் நிறுவனங்கள் இரவில் பயன்படுத்தும் மின்சாரத்துக்கு சலுகை கேட்கின்றனர். எனவே, இதுவரை பொருத்தப்படாத மின்இணைப்புகளில் உச்சநேர மின்பயன்பாட்டை கணக்கெடுக்கும் டிஓடி மீட்டர் பொருத்துமாறு பொறியாளர்களுக்கு மின்வாரியம் உத்தரவிட்டுள்ளது.
