மதுரை: உடல்நலம் பாதிப்பு காரணமாக இயற்கை எய்திய மதுரை ஆதீனம் ஸ்ரீலஸ்ரீ அருணகிரிநாத ஞானசம்பந்த தேசிக பரமாச்சாா்ய சுவாமிகளின் உடல் இன்று (சனிக்கிழமை) மாலை நல்லடக்கம் செய்யப்படும் என அறிவிக்கப்பட்டு உள்ளது.
தமிழகத்தின் தொன்மையான சைவத் திருமடங்களில் ஒன்றான மதுரை ஆதீனம் 1500 ஆண்டுகளுக்கு முன்பு திருஞானசம்பந்தரால் தோற்றுவிக்கப்பட்டது. இந்த ஆதீனத்தின் 292 ஆவது சன்னிதானமாக ஸ்ரீலஸ்ரீ அருணகிரிநாத ஞானசம்பந்த தேசிக பரமாச்சாரிய சுவாமிகள் 1975 ஆம் ஆண்டு மே 27 ஆம் தேதி பட்டம் ஏற்றுக் கொண்டாா்.
வயது முதிர்வு காரணமாக நோய்வாய்ப்ட்ட அவருக்கு ஆகஸ்ட் 9 ஆம் தேதி கடும் மூச்சுத்திணறல் ஏற்பட்டது. இதையடுத்து, மதுரை கே.கே. நகரில் உள்ள தனியாா் மருத்துவமனையில் அவா் அவசரச் சிகிச்சைப் பிரிவில் அனுமதிக்கப்பட்டாா். அவருக்கு தொடர் சிகிச்சை வழங்கப்பட்டு வந்தது. அவரது நுரையீரல் பாதிக்கப்பட்டிருந்ததால், செயற்கை சுவாசக் கருவி உதவியுடன் மருத்துவா்கள் தீவிர சிகிச்சை அளித்தனா்.
அவரை நேற்று முன்தினம் தருமபுர ஆதீனம் ஸ்ரீலஸ்ரீ மாசிலாமணி தேசிக ஞானசம்பந்த பரமாச்சாரிய சுவாமிகள், தவத்திரு குன்றக்குடி பொன்னம்பல அடிகளாா், திருவாவடுதுறை ஆதீனம் கட்டளை அம்பலவாண தம்பிரான் சுவாமிகள் உள்பட பல் சென்று பார்த்துவந்தனர்.
இந்த நிலையில், மதுரை ஆதீனம் நேற்று இரவு சிகிச்சை பலனின்றி உயிரிழந்ததாக அறிவிக்கப்பட்டது. நேற்று (வெள்ளிக்கிழமை) இரவு 9.15 மணியளவில், கடும் மூச்சுத் திறணல் காரணமாக மதுரை ஆதீனம் ஸ்ரீலஸ்ரீ அருணகிரிநாத ஞானசம்பந்த தேசிக பரமாச்சாரிய சுவாமிகள் பரிபூரணம் அடைந்தாா் என அறிவிக்கப்பட்டது.
அதையடுத்து, அவரது உடல், வரது உடல் மதுரை மீனாட்சியம்மன் கோயில் அருகே உள்ள மதுரை ஆதீன மடத்துக்கு நள்ளிரவு கொண்டுவரப்பட்டது. ஆதீனத்தின் உடலுக்கு திருவாவடுதுறை ஆதீனம் உள்ளிட்ட பலா் அஞ்சலி செலுத்தினா்.
தற்போது மதுரை மீனாட்சி சுந்தரேசுவரா் கோயில் அருகே உள்ள ஆதீன மடத்தில் அவர் உடல் பொதுமக்கள் அஞ்சலிக்காக வைக்கப்பட்டு உள்ளது. அவரது உடலுக்கு ஆன்மிக பிரமுகா்கள், அரசியல் பிரமுகா்கள், முக்கியத் தலைவா்கள் அஞ்சலி செலுத்தி வருகின்றனர்.
அவரது உடல் இன்று மாலை அடக்கம் செய்யப்பட உள்ளது. முன்னதாக அவரது உடலை சனிக்கிழமை நான்கு மாசிவீதிகளிலும் ஊா்வலமாக எடுத்துச் சென்று, முனிச்சாலை பகுதியில் உள்ள மதுரை ஆதீனத்துக்குச் சொந்தமான இடத்தில் மாலையில் அடக்கம் செய்யப்படும் என அறிவிக்கப்பட்டுள்ளது. தொடா்ந்து பத்து நாள்களுக்கு அவரது உடல் அடக்கம் செய்யப்பட்ட இடத்தில் அபிஷேகம் செய்யப்படும். அதன் பிறகே புதிய ஆதீனத்துக்கு 293 ஆவது சன்னிதானம் பட்டம் சூட்டப்படும்.
கடந்த 2012ல் சுவாமி நித்யானந்தரின் தலையீடு மதுரை ஆதீனத்தில் சா்ச்சையை ஏற்படுத்தியது. இதன் பின்னா் கடந்த 2019ஆம் ஆண்டு ஜீன் 8ஆம் தேதி திருவாவடுதுறை ஆதீனத்தின் மூத்த தம்பிரனான ஸ்ரீமத் சுந்தரமூா்த்தியை மதுரை ஆதீனத்தின் இளைய ஆதினமாக அறிவித்தார். ஆனால், தற்போது நித்தியானந்தா நான்தான் மதுரை ஆதீன மடத்தின் அடுத்த ஆதீனம் என்று கூறி சலசலப்பை ஏற்படுத்தி உள்ளார்.
