ஆறுமுகசாமி ஆணையத்துக்கு மேலும் 4 மாதம் அவகாசம்… தமிழகஅரசு தாராளம்…

சென்னை:

ஜெயலலிதா மரணம் தொடர்பாக விசாரிக்கும் ஆறுமுகசாமி ஆணையம் உச்சநீதி மன்ற உத்தரவால் முடங்கி உள்ள நிலையில்,  ஆணையத்தின் ஆயுட்காலத்தை மேலும் 4 மாதம் நீட்டித்து தமிழக அரசு உத்தரவிட்டுள்ளது. சும்மா இருக்கும் ஆணையத்துக்கு மேலும் அவகாசம் வழங்கியிருப்பது சர்ச்சையை ஏற்படுத்தி உள்ளது.

ஜெயலலிதா மரணம் குறித்து விசாரிக்க ஓய்வு பெற்ற ஐகோர்ட்டு நீதிபதி ஆறுமுகசாமி தலைமையிலான ஆணையத்தை அமைத்து தமிழக அரசு கடந்த 2017-ம் ஆண்டு செப்டம்பர் 25-ந்தேதி உத்தரவிட்டது. இந்த ஆணையம்  ஜெ.மரணம் தொடர்பாக அவரது உறவினர்கள் உள்பட அனைத்து தரப்பினரையும் விசாரணை நடத்தி வந்தது. விசாரணைக்கு அப்போலோ நிர்வாகம் ஒத்துழைப்பு மறுத்து வந்தது.

இதையடுத்து, அப்போலோ தரப்பில் நீதிமன்றங்களை நாடியது. சென்னை உயர்நீதி மன்றம் விசாரணைக்கு ஆஜராக உத்தரவிட்ட நிலையில், உச்சநீதி மன்றமோ, ஆணையத்தின் விசாரணைக்கே தடை போட்டது. இருந்தாலும் ஆணையத்தின் ஆயுட்காலம் தொடர்ந்து நீட்டிக்கப்பட்டே வருகிறது.

ஆணையனத்தின் அவகாசம் இந்த மாதம் 24ந்தேதியுடன் முடிவடைய இருந்த நிலையில், மேலும் 4 மாதம் அவகாசம் கேட்டு தமிழக அரசுக்கு ஆறுமுகசாமி ஆணையம் கடந்த திங்கட்கிழமை அன்று கடிதம் எழுதியிருந்தது. இதையடுத்து,   ஆறுமுகசாமி ஆணையத்துக்கு மேலும் 4 மாதம் தமிழக அரசு அவகாசம் வழங்கியுள்ளது.