சென்னை:
இந்தியாவில் கொரோனா பரவலின் தாக்கம், சாமானிய மக்கள் மட்டுமின்றி மாணவ மாணவி களின் வாழ்விலும் சேதத்தை ஏற்படுத்தி உள்ளது. கொரோனா தடுப்பு நடவடிக்கையாக மத்திய மாநில அரசுகள் அறிவித்த ஊரடங்கு காரணமாக, கல்வி நிறுவனங்கள் மூடப்பட்டதால் உயர் படிப்புக்கு தயாராகி வந்த மாணாக்கர்கள் கடுமையான மன உளைச்சலுக்கு ஆளாகி உள்ளனர்.
நாடு முழுவதும் கொரோனா ஊரடங்கு காரணமாக மே 5ந்தேதி நடைபெறுவதாக அறிவிக்கப்பட்ட நீட் தேர்வு மே மாதம் இறுதிக்கு ஒத்தி வைக்கப்பட்டது. அதுபோல, ஜேஇஇ தேர்வு தேதிகளும் தள்ளி வைக்கப்பட்டு உள்ளன. இது தொடர்பாக விண்ணப்பப்படிவத்தில் திருத்தங்கள் மேற்கொள்ள ஏப்ரல் 14 ஆம் தேதி வரையில் கால அவகாசம் வழங்கியது.
தற்போது அதற்கான கால அவகாசம், மே, 3 வரை நீட்டிக்கப்பட்டு உள்ளது.
இதனால் நீட், ஜெஇஇ தேர்வுக்கு தயாராகி வந்த மாணவர்கள், ஏப்ரல் 14ந்தேதிக்கு பிறகு மீண்டும் கல்வியைத் தொடரலாம் என எதிர்பார்த்த நிலையில், மீண்டும், ஊரடங்கு மே 3ந்தேதி வரை நீட்டிக்கப்பட்டு விட்டது.
இதனால், உயர்படிப்புக்கு தயாராகி வந்த மாணாக்கர்கள் கடுமையான மன உளைச்சலுக்கு ஆளாகி உள்ளனர். பல ஆயிரம் பணம் கட்டி, பல்வேறு கோச்சிங் சென்டரில் படித்து வந்த ஏராளமானோர், தாங்கள் கட்டிய பணமும் வீணான நிலையில், சரியான முறையில் பயிற்சி எடுக்க முடியாத சூழலுக்கு தள்ளப்பட்டு உள்ளனர்.
உயர்படிப்புக்கு தயாராகி வரும் பல மாணவர்கள் ஆன்லைன் பயிற்சிக்கு உட்பட்டிருந்தாலும், பலர் தங்கள் சகாக்கள் மற்றும் பயிற்சியாளர்களுடன் தொடர்பு கொள்ளக்கூடிய வகுப்புகளைத் தவற விடுகிறார்கள். மேலும் மூன்று வாரங்கள் தனிமையை எதிர்கொள்கின்றனர். இதனால் கடுமையான மன உளைச்சலுக்கு ஆளாகி உள்ளனர்.
இதுகுறித்து கூறிய நீட் தேர்வுக்கு தயாராகும் மாணவர்கள் சிலர் கூறிய கருத்துக்களை இங்கே காணலாம்.
கோகுல் என்ற மாணவர் கூறும்போது, பயிற்சி நிறுவனம் மாணவர்களுக்கு ஆன்லைன் மூலமும், வாட்ஸ்அப் மூலம் ஆய்வு பொருள் மற்றும் வினாத்தாள்களை அனுப்புகிறது. இருந்தாலும், அது நேரில் சென்று படிப்பதுபோல சிறப்பாக இல்லை, “ஆன்லைன் வகுப்புகளில் கற்பித்தல் நல்லது. ஆனால், வகுப்பின் நடுவில் எங்களால் கேள்விகளைக் கேட்க முடியாது, சந்தேகங்களைத் தெளிவுபடுத்துவதற்கு நிறைய நேரம் எடுக்கும். சில பகுதிகளில் இணைய இணைப்பு நன்றாக இல்லை என்று குற்றம் சாட்டியுள்ளார்.
ஜேஇஇ படித்து வரும் மற்றொரு மாணவர் கூறும்போது, “நாங்கள் ஊரடங்கு நீட்டிக்கப்படும் என எதிர்பார்க்கவில்லை. ஆனால், எங்கள் பயிற்சி நிறுவனம் ஜூம் மூலம் வகுப்புகளை எடுத்து வருகிறது. ஆனால், எங்களால் அதன்மூலம் சிறப்பான கல்வியை பெற முடியவில்லை என்று தெரிவித்து உள்ளார்.
இதுகுறித்து கூறிய FIIT-JEE இன் துணை இயக்குநர் பி பவன் குமார், ஊரடங்கு காரணமாக தினசரி 3 மணி முதல் 4 மணி நேரம் வரை ஆன்லைனில் பயிற்சி கொடக்கப்படுவதாகவும், ஆனால், இணைய இணைப்பு பெரும் பிரச்சினையாக உள்ளது என்று தெரிவித்து உள்ளார்.
இது ஒருபுறம் இருக்க, அரசு பள்ளிகளில் நடத்தப்பட்டு வந்த நீட் பயிற்சி வகுப்புகள் என்ன ஆனது என்றே தெரியவில்லை என்று மாணவ மாணவிகள் புகார் தெரிவித்து உள்ளனர். கொரோனா ஊரடங்கு அமல்படுத்தப்பட்டதில் இருந்தே தங்களுக்கு எந்தவொரு பயிற்சியும் வழங்கப்பட வில்லை, நாங்கள் நீட் தேர்வை எப்படி எதிர்கொள்ளப் போகிறோம் என்றே தெரியவில்லை என்று வருத்தத்துடன் தெரிவித்து உள்ளனர்.
ஆனால், அரசு பள்ளி மாணவர்களுக்கு பயிற்சியளிப்பதற்கான மாற்றுத் திட்டம் தங்களிடம் இருப்பதாக பள்ளி கல்வித் துறையின் அதிகாரிகள் தெரிவித்துள்ளனர். ஆனால், அதற்கான காவல அவகாசம் போதுமா என்பது கேள்விக்குறியே.
கொரேனா வைரசின் தாக்கம் உயர் கல்வியான மருத்துவம் மற்றும் ஐஐடி பொறியியல் படிப்புகளை நம்பியிருந்த மாணவர்களின் வாழ்க்கையிலும் விளையாடி உள்ளது.