சென்னை: ஓரணியில் தமிழ்நாடு இயக்கத்தை தொடங்கி உள்ள திமுக, வெளியிட்டுள்ள வீடியோவில், பெரியார் தடியுடன் காவி துண்டை துரத்தும் வகையில் அமைந்துள்ளது. இது சலசலப்பை ஏற்படுத்தி உள்ளது.
இந்த நிலையில், ஒரணியில் தமிழ்நாடு இயக்கத்தை தொடங்கி உள்ள திமுக, அதுதொடர்பாக வெளியிட்டுள்ள வீடியோவில், பெரியார் தடியுடன் ஒருவர் காவி துண்டை அணிந்திருக்கும் நபரை துரத்தும் வகையில் வீடியோ அமைக்கப்பட்டு உள்ளது. திமுக தகவல் தொழில்நுட்ப அணி தயாரித்த அந்த பிரசார வீடியோ மக்களிடையே சலசலப்பை ஏற்படுத்தி உள்ளது.
2026 சட்டப்பேரவைத் தேர்தலில் ஆட்சியை பிடிக்க அதிமுக, பாஜக கூட்டணி தீவிரமாக செயலாற்றி வரும் நிலையில், ஆட்சியை தக்க வைத்துக்கொள்ள ஸ்டாலின் தலைமையிலான திமுக கூட்டணி பல்வேறு அறிவிப்புகளை வெளியிட்டு மக்களை கவர்ந்து வருகிறது. மேலும், காவல்துறை, அரசு இயந்திரங்களைக்கொண்டு திமுக ஆட்சியின் புகழ்பாடப்பட்டு வருகின்றது. இதற்கிடையில், தவெக தலைவர் விஜய், கூட்டணி ஆட்சி என்று கூறி கூட்டணி அரசியலில் சலசலப்பை ஏற்படுத்தி உள்ளார். தேமுதிக, பாமக உள்பட சில கட்சிகள் இதுவரை தங்களது கூட்டணி நிலைப்பாட்டை அறிவிக்காமல் அமைதி காத்து வருகின்றனர்.
ஆனால் ஆளும் கட்சியான திமுக 2021 தேர்தலுக்காக அமைக்கப்பட்ட கூட்டணியை அப்படியே 2024 நாடாளுமன்ற தேர்தலிலும் தொடர்ந்தது. அதைத்தொடர்ந்து தற்போது 2026 தேர்தலிலும் தங்களது கூட்டணி வலிமையுடன் இருப்பதாக திமுக தலைவர் மு.க.ஸ்டாலின் தொடங்கி திருமாவளவன் உள்ளிட்ட கூட்டணிக் கட்சித் தலைவர்கள் தொடர்ச்சியாக தெரிவித்து வருகின்றனர். அதேவேளையில் தமிழக பாஜக தலைவர் நயினார் நாகேந்திரன் மற்றும் அதிமுக முன்னணி நிர்வாகிகள் பலர் திமுக கூட்டணியில் புகைச்சல் ஆரம்பித்துவிட்டதாக விமர்சித்து வருகின்றனர்.
பாஜகவுடன் அதிமுக கூட்டணி அமைத்திருப்பது திமுகவுக்கு எதிரான வாக்குகளை ஒருங்கிணைக்கும் என்று அரசியல் நோக்கர்களால் பார்க்கப்படும் நிலையில் திமுக அதை கொள்கை ரீதியாக விமர்சிக்கத் தொடங்கிவிட்டது.
சமீபத்தில் மதுரையில் இந்து முன்னணி நடத்திய முருக பக்தர்கள் மாநாட்டில் பெரியார், அண்ணா போன்ற தலைவர்களை கொச்சைப்படுத்திய விவகாரம் குறித்து பேசிய தமிழக முதலமைச்சர் மு.க.ஸ்டாலின் “அண்ணா பெயரை அதிமுக அடமானம் வைத்துவிட்டது” என்று கடுமையாக விமர்சித்தார். அதைத்தொடர்ந்து, தற்போது திமுக தகவல் தொழில்நுட்ப அணி தயாரித்த ஓரணியில் தமிழ்நாடு என்ற பிரசார வீடியோவை அக்கட்சி வெளியிட்டுள்ளது.
அந்த வீடியோவில் “ஒரு நாட்டில் வளமும், பசுமையான வயல்களும் நிறைஞ்ச ஒரு அழகான ஊர் இருந்துச்சு. அந்த ஊர் மக்கள் எப்போதும் சந்தோஷமா, அமைதியா, பெருமையா வாழ்ந்துட்டு இருந்தாங்க. அந்த ஊர்க்குழந்தைகள் எல்லாம் தாய் மொழியில் பாட்டுப்பாடி சந்தோஷமா இருந்தாங்க. அந்த ஊரில் இருந்த பெரியவர்கள் ஊருக்காக ஒற்றுமையா இருந்து வெற்றி பெற்ற அவர்களது வீரமிக்க போராட்ட கதைகளை குழந்தைகளுக்கு சொல்லிக்கொடுத்து வளர்த்தாங்க. இப்படி அந்த அழகான ஊரை அழிக்க தூரத்தில் வெறிபிடித்த ஓநாய்க்கூட்டம் சரியான நேரம் பார்த்து காத்துக் கொண்டிருந்தது.
ஏற்கெனவே பல ஊர் மக்களின் நிலங்களை பறித்து மொழிகளை அழித்து பழக்கப்பட்ட அந்த ஓநாய்க்கூட்டத்தின் பார்வை அந்த அழகான ஊர்ப்பக்கம் திரும்பியிருந்துச்சு. ஏனென்றால் அந்த ஊர் மக்களின் வளர்ச்சியும், வரலாற்று பெருமையும் அந்த ஓநாய்களுக்கு பிடிக்கவில்லை.
அந்த ஊர் தியாகத்தாலும், ரத்தத்தாலும், ஒற்றுமையாலும் கட்டப்பட்டது என்பது அந்த ஊரை அழிக்க ஆசைப்படும் அந்த ஓநாய்களுக்கு தெரியவில்லை. எதிரிகள் அந்த ஊரைத்தாக்க முயற்சி செய்தபோதெல்லாம் அங்கிருக்கும் மக்களின் ஒற்றுமையால் தோற்று ஓடியிருக்கிறார்கள். ஒருமுறையல்ல பலமுறை. இதுவரைக்கும் நீங்கள் கேட்டது ஏதோ ஒரு ஊருடைய கதை அல்ல. நம் தமிழ்நாட்டின் கதை. ஆம். நாம் ஒற்றுமையாக இருந்துதான் தமிழ்நாடு சந்தித்த எல்லா போராட்டங்களிலும் வெற்றி பெற்றிருக்கிறோம். நாம் மீண்டும் ஓரணியில் ஒற்றுமையாக நிற்க வேண்டிய நேரம் வந்திருக்கிறது.
ஒரு சதிகார காவிக்கூட்டம் நம்மை அழிக்க திட்டமிட்டிருக்கிறார்கள். நீட் தேர்வு மூலமாக நம் மாணவர்களின் மருத்துவக்கனவை சிதைக்கப் பார்க்கிறார்கள். கீழடியில் கிடைத்த தமிழனின் பெருமையை மறைத்து வரலாற்றை அழிக்க முயற்சிக்கிறார்கள். தொகுதி மறுவரையறை என்ற பெயரில் நம் குரலை முடக்கி தமிழ்நாட்டை இன்னொரு மணிப்பூராக மாற்ற துடிக்கிறார்கள். மும்மொழிக்கொள்கை மூலமாக இந்தியை திணித்து தமிழை அழிக்கவும், நூறு நாள் வேலைத்திட்ட தொழிலாளர்களுக்கு சம்பளம் தராமல் அந்த நிலத்துக்கு சொந்தமான மக்களையே பட்டினி போட திட்டமிடுகிறார்கள்.
தமிழ்நாடு ஊதி அணைக்கிற சிறு நெருப்பு அல்ல. எதிரிகளை சாம்பலாக்குகிற பெருஞ்சூரியன். அந்த சூரியனின் குணம் தான் தமிழ்நாட்டு மக்களின் குணமும் என்று அந்தக் காவிக்கூட்டத்துக்கு தெரியவில்லை. தமிழ்நாட்டு பெண்களுக்காகவும், இளைஞர்களுக்காகவும், மாணவர்களின் கனவுகள் நிராகரிக்கப்பட்ட போதும் நாம் ஒன்றிணைந்து போராடியிருக்கிறோம்.
இதற்கு முன் பலமுறை நம் நிலத்திற்காகவும், உரிமைகளுக்காவும் ஒன்றிணைந்து போராடி வெற்றி பெற்றது போல் அதே வீரத்தோடு இப்போது மீண்டும் ஓரணியில் திரண்டு நம் மண், மொழி, மானம் மீது தொடுக்கப்படும் போருக்கு எதிராக சாதி, மதம், அரசியல் கடந்து ஒன்றிணைவோம். நம்மை ஒடுக்க நினைக்கும் காவிக்கூட்டத்தை விரட்டி தமிழ்நாட்டைக் காக்க முதலமைச்சர் மு.க.ஸ்டாலின் தலைமையில் ஓரணியில் தமிழ்நாடு முன்னெடுப்பில் இணைவோம்..” என்று அந்த வீடியோவில் தெரிவிக்கப்பட்டுள்ளது.
இந்த வீடியோவில் பாஜக எதிர்ப்பை பிரதானமான அரசியல் முழக்கமாக முன்னெடுத்துள்ளது திமுக. ஒரு காட்சியில் காவிக்கூட்டம் என்ற பின்னணி குரல் ஒலிக்கும் போது ஆர்எஸ்எஸ் அமைப்பின் பேரணி காட்சிகள் இடம்பெற்றுள்ளன. அதேபோல் நம்மை ஒடுக்க நினைக்கும் காவிக்கூட்டத்தை விரட்டி, தமிழ்நாட்டைக் காக்க என்று சொல்லும் இடத்தில் காவித்துண்டு அணிந்து ஒருவர் ஓட அவரை பெரியார் கைத்தடியுடன் ஒருவர் விரட்டும்படி காட்சிகள் அமைந்துள்ளன.
இந்த வீடியோ இந்து மக்களிடையே சலசலப்பை ஏற்படுத்தி உள்ளது.
ஆன்மிக பூமியாகத் திகழும் தென் தமிழ்நாட்டில் 25 ஆயிரம் சிவாலயங்கள் இருப்பதாக ஒரு கணக்கெடுப்பு சொல்கிறது. இந்தியாவிலேயே அதிக எண்ணிக்கையில் ஆலயங்களைக் கொண்ட மாநிலம், தமிழ்நாடு. இதில் சமயக்குரவர்களால் பாடப்பட்ட தேவாரப் பாடல்கள் பெற்ற 274 சிவாலயங்களும் அடங்கும். தென்பாண்டி நாடு என்று அழைக்கப்படும் திருநெல்வேலி, தூத்துக்குடி மாவட்டங்களில் பாயும் தாமிரபரணி ஆற்றின் கரையோரங்களில் மட்டும் பழங்காலங்களில் 274 சிவாலயங்கள் அமைந்திருந்ததாக சொல்லப்படுகிறது. அந்த அளவுக்கு அந்த இரு மாவட்டங்களும் ஆன்மிகத்தில் திளைத்திருந்ததாக பல புராணங்கள் சொல்கின்றன.
இவ்வளவு புகழ்பெற்ற தமிழ்நாட்டில், ஒருசில இடங்களில் காணப்படும் சாதி மத பேதங்களை வைத்து தமிழகஅரசியல் கட்சிகள், மக்களை பிளவுபடுத்தி வருகின்றன. கோவில்களில் தீண்டாமை என கூறி மக்களிடையே இந்து மத வெறுப்பை வளர்த்து வருகின்றன. இதற்காக பெரியார் பெயரிலான அரசியல் கட்சிகள் தீவிரமாக செயல்பட்டு வருவதுடன், அவர்களுக்கு ஆதரவாக திராவிட கட்சிகளும் செயலாற்றி வருகின்றன. கடந்த 4ஆண்டு கால திமுக ஆட்சியில், இந்துமக்கள் மீதான வன்மங்கள் கட்டவிழ்த்து விடப்பட்டுள்ளது. இது இந்து மக்களிடையே அதிருப்தியை ஏற்படுத்தி உள்ளது.
ஒரணியில் தமிழ்நாடு – திமுக வெளியிட்ட வீடியோ
dmk video – oraniyil Tamilnadu 02-07-25-02
