டெல்லி: நாடு முழுவதும் காலியாக உள்ள மாநிலங்களவை உறுப்பினர் பதவிகளுக்கு தேர்தல் அறிவிக்கப்பட்டுள்ள நிலையில், 4 மாநிலங்களில் உள்ள 16 இடங்களுக்கு இன்று வாக்குப்பதிவு நடைபெறுகிறது. 16 இடங்களுக்கு 21 பேர் போட்டியிடுகின்றனர்.
மாநிலங்களவையில் நாடு முழுவதும் பல்வேறு மாநிலங்களில் காலியாகும் 57 இடங்களுக்கு 10-ந்தேதி (இன்று) தேர்தல் நடைபெறும் என்று இந்திய தேர்தல் ஆணையம் ஏற்கனவே அறிவித்தது. அதன்படி, கர்நாடகா, அரியானா, ராஜஸ்தான், மராட்டியம் ஆகிய மாநிலங்களில் காலியாக உள்ள 16 மாநிலங்களவை உறுப்பினர்கள் இடத்திற்கான தேர்தல் வாக்குப்பதிவு இன்று நடைபெற உள்ளது.
இந்த இடங்களுக்கான தேர்தலில், தமிழகம் உட்பட 11 மாநிலங்களில் 41 உறுப்பினர்கள் போட்டியின்றி தேர்வாகி உள்ளனர். இதையடுத்து 4 மாநிலங்களில் போட்டி ஏற்பட்டுள்ள 16 இடங்களுக்கு இன்று வாக்குப்பதிவு நடைபெறுகிறது. மகாராஷ்டிரா, கர்நாடகா, ராஜஸ்தான் மற்றும் ஹரியானா மாநிலங்களில் உள்ள இந்த 16 இடங்களுக்கு 21 பேர் போட்டி போடுகின்றனர்.
இதையடுத்து அங்கு வாக்குப்பதிவு நடைபெறுகிறது. வாக்குப்பதிவானது காலை 9 மணிக்கு தொடங்கி மாலை 4 மணி வரை நடைபெற உள்ளது. ஓட்டுப்பதிவு முடிவடைந்ததும் மாலை 5 மணிக்கு ஓட்டு எண்ணிக்கை நடக்கிறது. 7 மணிக்கு முடிவுகள் தெரிந்துவிடும் என்று எதிர்பார்க்கப்படுகிறது.
தேர்தல் நடைபெறும் இடங்களில் சட்டமன்ற உறுப்பினர்கள் தங்களது வாக்குகளை செலுத்தி வருகின்றனர்.