சென்னை: நடிகர் அஜித்தின் ‘வலிமை’ பட டிரைலர் இன்று மாலை வெளியாவதாக பட நிறுவனம் அறிவிப்பு வெளியிட்டு உள்ளது.
2019ம் ஆண்டு ஆரம்பிக்கப்பட்ட இந்த படம் ஒரு சூழ்நிலை காரணமாக தள்ளிப் போனது. இதனால் வலிமை படம் எப்போது வெளியாகும் என்ற எதிர்பார்ப்பு அஜித் ரசிகர்களிடையே எழுந்துள்ளது. இதையடுதது அஜித்தின் வலிமை திரைப்படம் அடுத்த ஆண்டு (2022) ஜனவரி மாதம் 14ந்தேதி பொங்கல் அன்று வெளியாகும் என அறிவிக்கப்பட்டு உள்ளது.
போனி கபூர் தயாரிப்பில், H.வினோத் இயக்கத்தில் நடிகர் அஜித்குமார் நடிப்பில் வரும் பொங்கல் தினத்தை முன்னிட்டு “வலிமை” திரைக்கு வருகிறது. இப்படத்தில் ஹூமா குரேஷி, கார்த்திகேயா, சுமித்ரா, யோகிபாபு, புகழ், உள்ளிட்ட பலர் நடித்துள்ளனர். நீரவ் ஷா ஒளிப்பதிவு செய்துள்ளார். மேலும், இசையமைப்பாளர் யுவன் சங்கர் ராஜா இசையமைத்துள்ளார்.
இந்த படத்தின் டீசர், சிங்கிள் பாடல்கள் ஏற்கனவே வெளியாகி நிலையில் விரைவில் டிரைலர் வெளியாகும் என்று எதிர்பார்க்கப்பட்டது. அஜித்தின் மாஸ் லுக்கில் பல புதிய புகைப்படங்கள் அவ்வப்போது வெளியிடப்பட்டு வருகிறது. கடந்த வாரம் படப்பிடிப்பின்போது அஜித் ஓட்டிய பைக் விபத்து குறித்த படம் மற்றும் வீடியோ வெளியானது.
இந்த நிலையில் இன்று மாலை வலிமை படத்தின் டிரைலர் வெளியாகும் என ஜீ ஸ்டுடியோஸ் அதிகாரப்பூர்வமாக அறிவித்து உள்ளது.
இதுகுறித்து டிவிட் பதிவிட்டுள்ள பட நிறுவனமான ஜீ ஸ்டூடியோஸ், இனிமேலும், எங்களால் அமைதியாக இருக்க முடியாது! இறுதியாக, காத்திருப்பு முடிந்தது. #ValimaiTrailer இன்று மாலை 6:30 மணிக்கு உங்கள் பார்வைக்கு வருகிறது. அஜித் ரசிகர்கள் உங்கள் இயர்போன்களை கையில் வைத்திருங்கள்! என தெரிவித்துள்ளது.