அமெரிக்கா அனைத்து வெளிநாட்டு உதவிகளையும் நிறுத்தியுள்ளது. ‘அமெரிக்கா பர்ஸ்ட்’ என்ற கொள்கையின் கீழ், அதன் வெளியுறவுக் கொள்கை பயனுள்ளதாகவும் நிலையானதாகவும் இருப்பதை உறுதி செய்வதற்காக, பிற நாடுகளுக்கு அமெரிக்க நிதி உதவியை மறுபரிசீலனை செய்ய உத்தரவிட்டுள்ளது.
இது தொடர்பான நிர்வாக உத்தரவில் ஜனாதிபதி டொனால்ட் டிரம்ப் கையெழுத்திட்ட நிலையில் இந்த நடவடிக்கை எடுக்கப்பட்டுள்ளது.
அமெரிக்க மக்களுக்கு ஏதாவது பிரதிபலன் கிடைக்கும் வரை, வெளிநாடுகளுக்கு இனி கண்மூடித்தனமாக நிதி உதவி வழங்க மாட்டேன் என்று ஜனாதிபதி டிரம்ப் தெளிவுபடுத்தியுள்ளார்.
“கடினமாக உழைக்கும் வரி செலுத்துவோரின் சார்பாக வெளிநாட்டு உதவியை மதிப்பாய்வு செய்து மறுசீரமைப்பது ஒரு தார்மீக கட்டாயமாகும்” என்று அமெரிக்க வெளியுறவுத்துறை செய்தித் தொடர்பாளர் டாமி புரூஸ் கூறினார்.
வெளியுறவுத்துறை மற்றும் சர்வதேச மேம்பாட்டுக்கான அமெரிக்க நிறுவனம் (USAID) மூலம் பெறப்பட்ட அனைத்து நிதியுதவிகளையும் நிறுத்தி வைத்துள்ள வெளியுறவுத்துறை செயலாளர் மார்கோ ரூபியோ, ஒரு மதிப்பாய்வை நடத்தி வருவதாகக் கூறினார்.
“‘அமெரிக்கா பர்ஸ்ட்’ கொள்கையின் கீழ், வழங்கப்படும் உதவி பயனுள்ளதாகவும் அமெரிக்க வெளியுறவுக் கொள்கைக்கு இசைவானதாகவும் இருப்பதை உறுதி செய்வதற்காக அனைத்து வெளிநாட்டு உதவிகளும் மதிப்பாய்வு செய்யப்படுகின்றன,” என்று புரூஸ் கூறினார்.
அமெரிக்கா வழங்கும் நிதி உதவி வெளிநாடுகளில் எவ்வாறு செலவிடப்படுகிறது என்பதை விமர்சன ரீதியாக மதிப்பாய்வு செய்வதன் மூலம் அமெரிக்காவின் நிதியைப் பாதுகாக்க வெளியுறவுத்துறை செயலாளர் உறுதிபூண்டுள்ளதாகவும் அவர் கூறினார்.
“ஜனாதிபதித் தேர்தலில் மக்களின் தீர்ப்பு, நாம் அமெரிக்காவின் தேசிய நலன்களில் கவனம் செலுத்த வேண்டும் என்பது தெளிவாகிறது.” “மக்கள் கஷ்டப்பட்டு சம்பாதித்த பணத்தின் பொறுப்பாளர்களாக எங்கள் பங்கை நாங்கள் மிகவும் தீவிரமாக எடுத்துக்கொள்கிறோம்,” என்று செய்தித் தொடர்பாளர் தெளிவுபடுத்தினார்.