சென்னை
இன்று பத்து மற்றும் பதினோராம் வகுப்புத் தேர்வு முடிவுகல் வெளியாக உள்ளன.
மார்ச் மற்றும் ஏப்ரல் மாதங்களில் 12,11, மற்றும் 10 ஆம் வகுப்பு பொதுத் தேர்வு நடந்து முடிந்தது. இதில் +2 பொதுத் தேர்வை எழுதிய மாணவ-மாணவிகளுக்கான தேர்வு முடிவு கடந்த 8-ந்தேதி வெளியானது. அதைத் தொடர்ந்து பிளஸ்-1 மற்றும் எஸ்.எஸ்.எல்.சி. மாணவ-மாணவிகளுக்கான தேர்வு முடிவு தனித்தனியாக வேறொரு நாட்களில் வெளியிட அரசு தேர்வுத் துறை திட்டமிட்டு இருந்தது.
இந்த 2 தேர்வு முடிவுகளையும் ஒரே நாளில் வெளியிட ஆலோசித்து வருவதாக பள்ளிக்கல்வித் துறை அமைச்சர் அன்பில் மகேஷ் பொய்யாமொழி தெரிவித்தார். எனவே தேர்வுத் துறை எஸ்.எஸ்.எல்.சி., பிளஸ்-1 பொதுத்தேர்வு முடிவை இன்று (வெள்ளிக்கிழமை) வெளியிட இருக்கிறது.
தமிழகம் மற்றும் புதுச்சேரியில் இருந்து பிளஸ்-1 பொதுத் தேர்வைப் பொறுத்தவரையில் 7 லட்சத்து 70 ஆயிரத்துக்கும் மேற்பட்டோரும், எஸ்.எஸ்.எல்.சி. பொதுத் தேர்வை சுமார் 8 லட்சத்து 70 ஆயிரத்துக்கும் மேற்பட்டோரும் எழுதியதாகச் சொல்லப்படுகிறது. இன்று 16 லட்சத்துக்கும் மேற்பட்ட மாணவ-மாணவிகளின் தேர்வு முடிவை அரசுத் தேர்வுத்துறை வெளியிடுகிறது.
இதில் எஸ்.எஸ்.எல்.சி. பொதுத் தேர்வு முடிவு இன்று காலை 10 மணிக்கும், பிளஸ்-1 பொதுத் தேர்வு முடிவு பிற்பகல் 2 மணிக்கும் மாணவ-மாணவிகள் தெரிந்து கொள்ள முடியும். www.tnresults.nic.in, www.dge.tn.gov.in என்ற இணையதளங்களில் சென்று தேர்வு முடிவுகளை மாணவர்கள் அறிந்து கொள்ளலாம்.