திருச்சி: திருச்சியில் உள்ள பழமை வாய்ந்த கல்லணையில் இருந்து பாசன வசதிக்காக தண்ணீர் இன்று காலை தமிழக அமைச்சர்களால் திறக்கப்பட்டது. இதன் காரணமாக, டெல்டா விவசாயிகள் மகிழ்ச்சி அடைந்துள்ளனர்.
ஏற்கனவே பாசன வசதிக்காக மேட்டூர் அணை திறக்கப்பட்டதை அடுத்து காவிரி டெல்டா பாசனத்துக்காக இன்று (புதன்கிழமை) காலையில் கல்லணை திறக்கப்பட்டது. அப்போது அமைச்சர்கள் கே.என்.நேரு, அன்பில் மகேஷ் மற்றும் ஆட்சியர்கள், அதிகாரிகள், விவசாயிகள் பூக்கள் தூவி காவிரி தண்ணீரை வரவேற்றனர்.
உலகத்தில் பழமை வாய்ந்த அணையாக விளங்கும் அணைகளில் ஒன்று கல்லணை. இது சுமார் 1850 அடி நீளத்தில் 66 அடி அகலத்தில் 18 அடி உயரத்தில் கட்டப்பட்டுள்ள இந்த அணை மூலம் இரண்டரை லட்சம் ஏக்கர் விவசாய நிலங்கள் பாசன வசதி பெறுகிறது. இந்த அணைக்கு காவிரிக்கும் கொள்ளிடத்திற்கும் இடையில் உள்ள திருவரங்கம் ஆற்றில் இருந்த து தண்ணீர் வருகிறது. அங்கிருந்துதான் காவிரி ஆறு நான்காக பிரிகிறது.
இந்த நிலையில் தென்மேற்கு பருவமழை மற்றும் மேற்கு திசை காற்றின் வேகமாறுபாடு காரணமாக பல்வேறு பகுதிகளில் பரவலாக மழை பெய்து வந்ததாகவும் காவிரியில் அதிக அளவில் நீர் வரத்து வருவதால், மேட்டூர் அணை நிரம்பியது. இதனால், அணையில் இருந்து காவிரி டெல்டா பாசனத்திற்காக 23 ஆயிரம் கன அடி தண்ணீர் திறக்கப்பட்டுள்ளது. இதனால் கல்லணையும் நிரம்பி வருகிறது.
பிறகு காவிரியில், 40 ஷட்டர்கள், வெண்ணாற்றில், 33, கொள்ளிடத்தில், 30, கல்லணைக் கால்வாயில் ஆறு, மணற்போக்கியில் 5, கோவிலடி மற்றும் பிள்ளைவாய்க்காலில் தலா ஒரு ஷட்டர்கள் மூலம் பாசனத்திற்காக தண்ணீர் பிரித்து வழங்கப்பட்டது.
இதன்படி முதல் கட்டமாக காவிரியில் 1,500 கன அடி, வெண்ணாற்றில் 1,000 கன அடி, கல்லணை கால்வாயில் 500 கன அடி, கொள்ளிடத்தில் 400 கன அடி என தண்ணீர் திறக்கப்பட்டு பின்னர் படிப்படியாக உயர்த்தப்படும் என அமைச்சர் கே.என்.நேரு செய்தியாளர்களிடம் தெரிவித்தார்.
இதன் மூலம் தஞ்சாவூர், திருவாரூர், நாகை, மயிலாடுதுறை, புதுக்கோட்டை, கடலுார் உள்ளிட்ட மாவட்டங்களில் சுமார் 12 லட்சம் ஏக்கர் அளவுக்கு பாசன வசதி பெறும் என நீர்வளத்துறை அதிகாரிகள் தெரிவித்தனர்.