திருப்பரங்குன்றம் மலையை தொல்லியல் துறையிடம் ஒப்படைக்க கோரி வழக்கு! உச்சநீதிமன்றம் நோட்டீஸ்

டெல்லி: முருகனுக்கு சொந்தமான திருப்பரங்குன்றம் மலையை  தொல்லியல் துறை வசம் ஒப்படைக்கக்கோரி உச்சநீதிமன்றத்தில் தொடரப்பட்ட வழக்கில் மத்திய, மாநில அரசுகள் பதில் அளிக்க  உச்சநீதிமன்றம் நோட்டீஸ் விடுத்துள்ளது.

திருப்பரங்குன்றம் கோவிலுடன் கூடிய மலையை இந்திய தொல்லியல் துறை கையகப்படுத்தக் கோரியும், மலையுச்சியில் 24 மணி நேரமும் விளக்கு ஏற்றக் கோரியும் இந்து தர்ம பரிஷத் தாக்கல் செய்த மனு தொடர்பாக உச்ச நீதிமன்றம் நோட்டீஸ் அனுப்பியுள்ளது.

இந்து தர்ம பரிஷத் அமைப்பு தொடர்ந்த வழக்கில் மத்திய அரசு, தொல்லியல் துறை, தமிழக இந்து சமய அறநிலையத் துறை பதில் அளிக்க  உச்ச நீதிமன்றம் நீதிபதிகள் அரவிந்த் குமார் மற்றும் விபுல் எம் பஞ்சோலி ஆகியோர் அடங்கிய அமர்வு நோட்டீஸ் அனுப்பியது.

தமிழ் கடவுள் முருகனுக்குசொந்தமான மலையில் அமைந்துள்ள திருப்பரங்குன்றம் மலை உச்சியில் உள்ள தீபத்தூணில் தீபம் ஏற்ற நீதிமன்றம் உத்தரவிட்டும், அதை நிறைவேற்றாத திமுக அரசுமீது நீதிமன்ற அவமதிப்பு வழக்கு தொடரப்பட்டுள்ளது. இந்த வழக்கை விசாரித்த நீதிபதி அரசு அதிகாரிகளை கடுமையாக சாடியதுடன்,  திமுக அரசையும் கண்டித்தார்.

இந்த நிலையில், பழமை மிகுந்த திருப்பரங்குன்றம் கோவிலை இந்திய தொல்லியல் துறை கைப்பற்ற உத்தரவிடக்கோரி,  இந்து தர்ம பரிஷத்  சார்பில் உச்சநீதிமன்றத்தில்  ரிட் மனு தாக்கல் செய்யப்பட்டுள்ளது. அந்த ரிட் மனுவில், திருப்பரங்குன்றம் முருகன் சுப்பிரமணிய சுவாமி கோயிலை இந்திய தொல்லியல் துறை (ASI) மற்றும் பிற மத்திய அதிகார அமைப்புகள் முழுமையாகக் கையகப்படுத்த வேண்டும் என்றும், தீபத்தூணின் (கற்தூண்) உச்சியில் நிரந்தரமாக 24 மணி நேரமும் விளக்கு ஏற்ற வேண்டும் என்றும் உத்தரவிடக் கோரப்பட்டுள்ளது.

கார்த்திகை தினத்தன்று, திருப்பரங்குன்றம் மலை முழுவதும் விளக்குகளால் ஒளிரச் செய்யப்பட வேண்டும் என்றும், முருக பக்தர்கள் வழிபாடு செய்ய அனுமதிக்கப்பட வேண்டும் என்றும் பரிஷத் கோரியுள்ளது.

இந்தமனு உச்சநீதிமன்ற நீதிபதிகள் அரவிந்த் குமார் மற்றும் விபுல் எம் பஞ்சோலி அடங்கிய அமர்வு,  முன்பு இன்று விசாரணைக்கு வந்தது.  விசாரணையின் போது, ​​இந்த வழக்கு இன்னும் சென்னை உயர் நீதிமன்றத்தில் நிலுவையில் உள்ளதா என்று நீதிபதி குமார் கேட்டார்.

தமிழ்நாடு அரசின் வழக்கறிஞர், ஜனவரி 6 ஆம் தேதி, இரு நீதிபதிகள் கொண்ட அமர்வு தனி நீதிபதியின் விளக்கு ஏற்றுவதற்கான உத்தரவை உறுதி செய்ததாகவும், அந்த உத்தரவை எதிர்த்து சிறப்பு விடுப்பு மனு தாக்கல் செய்வது குறித்து தரப்பினர் ஆலோசித்து வருவதாகவும் குறிப்பிட்டார்.

இதையடுத்து மனு  துதொடர்பாக,  மத்திய அரசு, இந்திய தொல்லியல் துறை, தமிழ்நாடு அரசு, இந்து சமய அறநிலையத் துறை, மதுரை மாவட்ட ஆட்சியர், மதுரை காவல் ஆணையர் மற்றும் சுப்பிரமணிய சுவாமி கோயில் செயல் அலுவலர் ஆகியோருக்கு நோட்டீஸ் அனுப்பியது.

முன்னதாக,  உயர் நீதிமன்ற நீதிபதி சுவாமிநாதன், டிசம்பர் 1 ஆம் தேதி, திருப்பரங்குன்றம் மலையின் உச்சியில் உள்ள ஒரு தர்காவிற்கு அருகில் உள்ள கற்தூணில் விளக்கு ஏற்றும்படி அருள்மிகு சுப்பிரமணிய சுவாமி கோயில் நிர்வாகத்திற்கு உத்தரவிட்டார் என்பதும், பின்னர் அந்த உத்தரவைச் செயல்படுத்துவதைத் தடுத்ததற்காக மாநில அரசைக் கண்டித்தார் என்பதும் குறிப்பிடத்தக்கது.

தமிழ்நாடு அரசு உத்தரவுகளைச் செயல்படுத்தத் தவறியதால், நீதிமன்ற அவமதிப்பு மனு தாக்கல் செய்யப்பட்டது. அதில், டிசம்பர் 3 அன்று நீதிபதி சுவாமிநாதன், சிஐஎஸ்எஃப் பாதுகாப்புடன் பக்தர்கள் தாங்களாகவே மலைக்குச் சென்று தீபம் ஏற்ற அனுமதிக்கப்பட்டனர். மேலும், நீதிபதி அமர்வு குற்றவியல் நடைமுறைச் சட்டம் பிரிவு 144-இன் கீழ் பிறப்பிக்கப்பட்ட தடை உத்தரவை ரத்து செய்ததுடன், மாநில தலைமைச் செயலாளர் மற்றும் கூடுதல் காவல்துறை இயக்குநர் (சட்டம் மற்றும் ஒழுங்கு) ஆகியோரை உயர் நீதிமன்றத்தில் ஆஜராகுமாறு உத்தரவிட்டது.

தமிழ்நாடு அரசு நீதிமன்ற அவமதிப்பு உத்தரவுக்கு எதிராக மேல்முறையீடு செய்தது. இருப்பினும், அது இரு நீதிபதிகள் கொண்ட அமர்வால் தள்ளுபடி செய்யப்பட்டது, அதைத் தொடர்ந்து அவர்கள் உச்ச நீதிமன்றத்தை அணுகினர். இதற்கிடையில், மாநில அரசு, காவல்துறை, தர்கா மற்றும் தமிழ்நாடு வக்பு வாரியம் ஆகியவை தனி நீதிபதியின் உத்தரவுக்கு எதிராக இரு நீதிபதிகள் கொண்ட அமர்வை அணுகின. ஜனவரி 6 அன்று, நீதிபதி ஜி. ஜெயச்சந்திரன் மற்றும் நீதிபதி கே.கே. ராமகிருஷ்ணன் ஆகியோர் அடங்கிய இரு நீதிபதிகள் கொண்ட அமர்வு தனி நீதிபதியின் உத்தரவை உறுதி செய்தது என்பது குறிப்பிடத்தக்கது.