பரந்தூர் விமான நிலைய இடத்தை மாற்ற தமிழ்நாடு அரசு கோரிக்கை வைக்கவில்லை: மத்திய அரசு

காஞ்சிபுரம் மாவட்டம் பரந்தூரில் அமைக்கத் திட்டமிடப்பட்டுள்ள புதிய பசுமை விமான நிலையத்தின் இடத்தை மாற்ற வேண்டும் என்று தமிழ்நாடு அரசு இதுவரை எந்த அதிகாரப்பூர்வ கோரிக்கையும் அளிக்கவில்லை என்று மத்திய அரசு தெரிவித்துள்ளது.

ராஜ்யசபாவில் திமுக உறுப்பினர் பி. வில்சன் எழுப்பிய கேள்விக்கு எழுத்துப்பூர்வமாக பதிலளித்த மத்திய விமானப் போக்குவரத்து துறை இணை அமைச்சர் முரளிதர் மோகோல், பரந்தூர் விமான நிலையத்தை வேறு இடத்துக்கு மாற்ற வேண்டும் என்ற கோரிக்கை மாநில அரசிடமிருந்து வரவில்லை என்றார்.

மேலும், இந்த திட்டத்துக்காக தமிழ்நாடு தொழில் மேம்பாட்டு கழகத்திற்கு (TIDCO) 2025 ஏப்ரல் 7-ஆம் தேதி மத்திய விமானப் போக்குவரத்து அமைச்சகம் கொள்கை ரீதியான ஒப்புதல் வழங்கியுள்ளதாகவும் அவர் தெரிவித்தார்.

2024 செப்டம்பரில் TIDCO சமர்ப்பித்த விண்ணப்பத்தின் படி, திட்டத்தின் முதல் கட்ட செலவு சுமார் ரூ.10,500 கோடி என மதிப்பிடப்பட்டுள்ளதாகவும் கூறினார்.

சென்னைக்கான இரண்டாவது விமான நிலையமாக பரந்தூரில் 5,746 ஏக்கர் பரப்பளவில் இந்த திட்டம் செயல்படுத்தப்பட உள்ளது. இதில் சுமார் 2,500 ஏக்கர் தனியார் நிலங்களும், மீதமுள்ள நிலங்கள் அரசுக்குச் சொந்தமானவையும் ஆகும்.

பரந்தூர் விமான நிலைய திட்டம் அறிவிக்கப்பட்டதிலிருந்தே ஏகனாபுரம் உள்ளிட்ட சுற்றுவட்டார கிராம மக்கள், நில இழப்பு மற்றும் இடம்பெயர்வு அச்சம் காரணமாக தொடர்ந்து எதிர்ப்பு தெரிவித்து வருகின்றனர்.

2025 ஜனவரி 20-ஆம் தேதி சட்டப்பேரவைத் தேர்தல் பிரசாரத்தின் போது, அப்பகுதிக்கு சென்ற தவெக தலைவர் விஜய், போராட்டக்காரர்களுக்கு ஆதரவு தெரிவித்தார். போராட்ட தளத்துக்குச் செல்ல அனுமதி மறுக்கப்பட்டதால், ஏகனாபுரம் அருகே போராட்டக் குழு பிரதிநிதிகளை சந்தித்து தனது ஆதரவை உறுதியளித்தார்.

பின்னர் விஜய் தலைமையிலான அரசு, விமான நிலையத்துக்கு மாற்று இடம் குறித்து ஆய்வு செய்து வருவதாக தெரிவித்திருந்தது. ஆனால், மத்திய அரசின் தற்போதைய பதிலின்படி, பரந்தூர் விமான நிலையத்தின் அங்கீகரிக்கப்பட்ட இடத்தை மாற்றக் கோரி இதுவரை எந்த அதிகாரப்பூர்வ முன்மொழிவும் அனுப்பப்படவில்லை.