சென்னை வடபழனி முருகன் கோயிலில் தனிநபர் அன்னதானம் வழங்க அனுமதியில்லை என்று சென்னை உயர்நீதிமன்றம் தீர்ப்பளித்துள்ளது.
அன்னதான திட்டத்தின் கீழ் பக்தர்களுக்கு அரசு ஏற்கனவே அன்னதானம் வழங்கி வருவதால் திருவிழாக் காலங்களில் தனிநபர் அன்னதானம் வழங்க அனுமதி கிடையாது என்று கூறியுள்ளது.
வைகாசி புஷ்ப பல்லக்கு மற்றும் திருக்கல்யாண விழாவை முன்னிட்டு வடபழனி கோவிலில் அன்னதானம் வழங்க அனுமதிக்கக் கோரி சங்கர் என்பவர் தொடர்ந்த வழக்கில் இவ்வாறு தீர்ப்பளிக்கப்பட்டுள்ளது.
இதுதொடர்பாக 2024 மே மாதம் அறநிலையத் துறையிடம் விண்ணப்பித்த நிலையில் அறநிலையத்துறை சார்பில் ஏற்கனவே அன்னதானம் வழங்கப்பட்டு வருவதாகக் கூறி சங்கரின் மனு நிராகரிக்கப்பட்டது.
இதனையடுத்து அவர் தொடர்ந்த வழக்கில் தனி நீதிபதியும் இதே தீர்ப்பை வழங்கிய நிலையில் சென்னை உயர்நீதிமன்றத்தில் மேல்முறையீடு செய்யப்பட்டது.
இந்த மேல்முறையீட்டு மனுவை நீதிபதிகள் எஸ்.எம். சுப்பிரமணியம் மற்றும் நீதிபதி கே. ராஜசேகர் ஆகியோர் அடங்கிய டிவிஷன் பெஞ்ச் விசாரித்தது.
இந்து சமய மற்றும் அறநிலையத்துறை (HR&CE) சார்பாக ஆஜரான அரசு வழக்கறிஞர் கே. கார்த்திகேயன், கோயில் நிர்வாகம் அன்னதானத் திட்டத்தைப் பராமரித்து வருவதாகவும், இந்தத் திட்டத்தின் கீழ், கோயில் நிர்வாகம் மட்டுமே அன்னதானம் வழங்கி வருவதாகவும், மற்ற தனிநபர்கள் அல்லது பக்தர்கள் சேவை செய்ய அனுமதிக்கப்படுவதில்லை என்றும் தெரிவித்தார்.
மேல்முறையீட்டாளர் விரும்பினால், அன்னதானம் வழங்க திட்டத்திற்கு நன்கொடை அளிக்கலாம் என்று அவர் மேலும் கூறினார்.
HR&CE சட்ட விதிகளின் கீழ், ஒரு பக்தர் கோயில் வளாகத்திற்குள் பக்தர்களுக்கு அன்னதானம் வழங்குவதைத் தடுக்க முடியாது என்று மேல்முறையீட்டாளர் சார்பாக ஆஜரான வழக்கறிஞர் ஆர். ஜெயபிரகாஷ் வாதிட்டார்.
மேலும், கோயிலின் தக்கரும் கோயிலுக்குள் அன்னதானம் வழங்க ஏற்பாடுகளைச் செய்துள்ளார், எனவே, அவரது கட்சிக்காரர் அன்னதானம் வழங்க அனுமதிக்கப்பட வேண்டும் என்று அவர் கூறினார்.
இருதரப்பு வாதங்களையும் கேட்ட நீதிபதிகள், மேல்முறையீட்டாளர் அன்னதானம் வழங்குவதற்கான தனது உரிமையை நிறுவத் தவறிவிட்டார், மேலும் திருவிழா ஏற்கனவே முடிவடைந்ததால் கோரப்பட்ட நிவாரணம் அதன் பொருத்தத்தை இழந்துவிட்டது என்று தீர்ப்பளித்து அந்த மனுவை தள்ளுபடி செய்தனர்.