ஓமைக்ரான் வைரசை ஆய்வுக் கூடத்தில் தனிமைப் படுத்தி வளர்க்கும் முயற்சியில் இந்தியா வெற்றி

Must read

ஓமைக்ரான் எனும் புதிய வகை உருமாறிய கொரோனா வைரசை ஆய்வகத்தில் தனிமைப்படுத்தி வளர்க்கும் முயற்சியில் இந்திய ஆய்வு மையம் குறிப்பிடத்தக்க முன்னேற்றத்தை அடைந்திருக்கிறது.

பயோடெக்னாலஜி துறையின் (டிபிடி- DBT) கீழ் இயங்கிவரும் தன்னாட்சி நிறுவனமான டிரான்ஸ்லேஷனல் ஹெல்த் சயின்ஸ் அண்ட் டெக்னாலஜி இன்ஸ்டிட்யூட் (டிஎச்எஸ்டிஐ – THSTI) நிபுணர்கள், தங்கள் ஆய்வகத்தில் கோவிட்-19 திரிபுகளை தனிமைப்படுத்தி வளர்த்துள்ளனர்.

வைரஸை வளர்க்கும் முயற்சியில் இந்திய மருத்துவ ஆராய்ச்சி கவுன்சிலின் (ஐசிஎம்ஆர் – ICMR) மற்றும் டிபிடி இரண்டும் தொடர்ந்து ஈடுபட்டு வந்தன. ஆரம்பத்தில், வைரஸை வளர்ப்பதில் சில சிரமங்களை எதிர்கொண்ட போதும், இப்போது அதில் ஓரளவு வெற்றி பெற்றுள்ளோம் என்று ஐசிஎம்ஆர் இயக்குநர் பல்ராம் பார்கவா தெரிவித்துள்ளார்.

ஆய்வகத்தில் வளர்க்கப்படும் இந்த ஓமைக்ரான் திரிபு இந்திய மக்களிடம் ஏற்படுத்தும் விளைவுகளை அறியவும், அதன் தொற்றுத்தன்மையைக் கண்டறியவும், தற்போதுள்ள தடுப்பூசிகளின் செயல்திறனை மதிப்பிடவும் உதவும் என்று கூறப்படுகிறது.

இதுகுறித்து தொடர்ந்து ஆய்வு நடந்து வருவதாகவும் ஆய்வின் முடிவில் நோயெதிர்ப்பு சக்தி குறித்தும், தடுப்பூசி பூஸ்டர் தேவை குறித்தும் விரைவில் தெரிய வரும் என்றும் கூறினார்.

பூஸ்டர் டோஸ், நோய் எதிர்ப்புசக்தி குறைவாக உள்ளவர்களுக்கு கூடுதல் டோஸ் மற்றும் குழந்தைகளுக்கு தடுப்பூசி போடுவதற்கான தேவையை மதிப்பாய்வு செய்ய நோய்த்தடுப்புக்கான தேசிய தொழில்நுட்ப ஆலோசனைக் குழு (என்.டி.ஏ.ஜி.ஐ. – NTAGI) ஜனவரி மாதம் கூட இருக்கும் நிலையில், அதற்கு முன் இந்த ஆய்வில் மேலும் முன்னேற்றம் ஏற்படும் என்று வேறொரு அதிகாரி கூறியதாக எக்கனாமிக் டைம்ஸ் தெரிவித்துள்ளது.

More articles

Latest article