தாய்லாந்தின் புக்கெட் நகரில் இருந்து புது தில்லி வந்த ஏர் இந்தியா விமானம் நடுவானில் திடீரென கீழே இறங்கிய சம்பவத்தைத் தொடர்ந்து, விமானிகள் அனைவருக்கும் போதைப் பொருள் பரிசோதனை கட்டாயமாக்கப்பட்டுள்ளது. இதில் மேலும் 2 விமானிகளுக்கு ஆரம்பகட்ட பரிசோதனையில் ‘பாசிட்டிவ்’ என முடிவு வந்துள்ளது.
கடந்த ஆகஸ்ட் 4-ஆம் தேதி புக்கெட்டில் இருந்து புது தில்லிக்கு வந்த ஏர் இந்தியா விமானம் நடுவானில் கடுமையான காற்று சுழற்சியில் சிக்கியது. இதனால் விமானம் சுமார் 300 அடி திடீரென கீழே இறங்கியது. இந்தச் சம்பவத்தில் விமானப் பயணிகள் மற்றும் ஊழியர்கள் சிலர் காயமடைந்தனர்.
இந்தச் சம்பவத்தைத் தொடர்ந்து, விமானப் பாதுகாப்பு விதிகளை மேலும் கடுமையாக்கும் வகையில் விமானிகள் அனைவருக்கும் விமானத்தை இயக்குவதற்கு முன்பு போதைப் பொருள் பரிசோதனை நடத்த ஏர் இந்தியா முடிவு செய்தது.
இதன்படி இதுவரை 300-க்கும் மேற்பட்ட விமானிகளுக்கு பரிசோதனை நடத்தப்பட்டுள்ளது. இதில் 2 விமானிகளுக்கு ஆரம்பகட்ட போதைப் பொருள் பரிசோதனையில் ‘பாசிட்டிவ்’ என முடிவு வந்துள்ளது.
இதையடுத்து, சம்பந்தப்பட்ட 2 விமானிகளும் இறுதி பரிசோதனை முடிவு வெளியாகும் வரை விமானங்களை இயக்குவதிலிருந்து விலக்கி வைக்கப்பட்டுள்ளனர். பொதுவாக இறுதி பரிசோதனை முடிவுகள் 24 முதல் 48 மணி நேரத்துக்குள் கிடைக்கும் எனத் தெரிவிக்கப்பட்டுள்ளது.
விமானம் திடீரென 300 அடி கீழே இறங்கியது
ஆகஸ்ட் 4-ஆம் தேதி புக்கெட்டில் இருந்து புது தில்லி நோக்கி ஏர் இந்தியா விமானம் வந்துகொண்டிருந்தபோது, நடுவானில் திடீரென கடுமையான காற்றுச் சுழற்சியில் சிக்கியது. இதனால் விமானம் சுமார் 300 அடி கீழே இறங்கியது.
முதலில் இது வெறும் காற்றுச் சுழற்சியால் ஏற்பட்டதாகக் கூறப்பட்டது. ஆனால், பின்னர் மேற்கொள்ளப்பட்ட ஆய்வில் விமானத்தில் பல்வேறு தொழில்நுட்பக் கோளாறுகள் ஏற்பட்டிருந்தது தெரியவந்தது. விமானத்தின் ஹைட்ராலிக் அமைப்பில் எச்சரிக்கை, தானியங்கி விமான இயக்க அமைப்பு (Autopilot) துண்டிக்கப்பட்டது உள்ளிட்ட பிரச்னைகள் பதிவாகியிருந்தன.
விமானம் நிமிடத்துக்கு சுமார் 1,600 அடி வேகத்தில் கீழ்நோக்கி இறங்கியதாக விசாரணையில் தெரியவந்துள்ளது. அதாவது, ஒரு விநாடிக்கு சராசரியாக சுமார் 8 மீட்டர் என்ற வேகத்தில் விமானம் கீழே இறங்கியுள்ளது. இது சுமார் இரண்டரை மாடி கட்டடத்தின் உயரத்துக்கு சமமானது.
விமானம் திடீரென கீழே இறங்கியதால், சீட் பெல்ட் அணியாமல் இருந்த சில பயணிகள் தூக்கி வீசப்பட்டு விமானத்தின் மேற்கூரையில் மோதியுள்ளனர். மேலும் சிலர் இருக்கைகள் மற்றும் நடைபாதையில் விழுந்துள்ளனர். இதில் பயணிகள் மட்டுமின்றி விமான ஊழியர்களும் காயமடைந்தனர்.
விமானிக்கு போதைப் பொருள் சோதனையில் ‘பாசிட்டிவ்’
இந்தச் சம்பவத்துக்குப் பிறகு விமானத்தை இயக்கிய விமானியின் போதைப் பொருள் பரிசோதனை நடத்தப்பட்டது. அதில், கஞ்சாவில் உள்ள போதைப் பொருளான மரிஜுவானாவுக்கு அவர் ‘பாசிட்டிவ்’ என உறுதி செய்யப்பட்டதாகத் தெரிவிக்கப்பட்டுள்ளது.
இந்தச் சம்பவம் விமானிகள் பணியில் சேருவதற்கு முன்பும், விமானத்தை இயக்குவதற்கு முன்பும் நடத்தப்படும் போதைப் பொருள் பரிசோதனை விதிகள் குறித்து பல்வேறு கேள்விகளை எழுப்பியுள்ளது.
இதற்கிடையே, ஏர் இந்தியா விமானிகள் அனைவருக்கும் விமானத்தை இயக்குவதற்கு முன்பு போதைப் பொருள் பரிசோதனை கட்டாயமாக்கப்பட்டுள்ள நிலையில், மேலும் 2 விமானிகளுக்கு ஆரம்பகட்ட பரிசோதனையில் ‘பாசிட்டிவ்’ என முடிவு வந்திருப்பது பரபரப்பை ஏற்படுத்தியுள்ளது.