சென்னை: திமுக தலைவர் மு.க.ஸ்டாலின் தலைமையிலான புதிய அமைச்சரவையில் பதவி ஏற்க உள்ள அமைச்சர்களுக்கான பெயர் பலகை தயாரிப்பு பணி தீவிரமடைந்துள்ளது. அமைச்சர்களின் பெயர்கள் மட்டும் பதியாமல், துறையின் பெயர்கள் பொறிக்கப்பட்டு தயார் படுத்தப்பட்டு வருகின்றன.
நடைபெற்று முடிந்த தமிழக சட்டமன்ற தேர்தலில் திமுக பெரும் வெற்றிபெற்று ஆட்சி கைப்பற்றியுள்ளது. ஸ்டாலின் தலைமையிலான புதிய அமைச்சரவை வரும் வெள்ளிக்கிழமை பதவி ஏற்க உள்ளது. அப்போது திமுக அமைச்சரவையும் பதவி ஏற்கும் என எதிர்பார்க்கப்படுகிறது.
முன்னதாக, திமுக ஆட்சியில் இடம்பெறப்போகும் அமைச்சர்களுக்காக, அறைகள் சுத்தப்படுத்தி, புத்தாக்கம் செய்யும் பணிகள் நடைபெற்று வந்தது. அப்போது, கடந்த அதிமுக ஆட்சியின் அமைச்சர்களின் அறைகள் முன்பு பொருத்தப்பட்டிருந்த பெயர் பலகைகள் அகற்றப்பட்டன.
இந்த நிலையில், திமுக ஆட்சியில் பொறுப்பேற்க உள்ள அமைச்சர்களின் பெயர்கள் பொறிக்கப்படும் வகையில், பெயர் பலகைளில் எழுதப்பட்டிருந்த முன்னாள் அமைச்சர்களின் பெயர்கள் அழிக்கப்பட்டு, பெயர் பலகைகள் சுத்தப்படுத்தும் பணிகள் நடைபெற்று வருகின்றன.