சென்னை
இந்த வாரம் ஓடிடியில் வெளியாகும் படங்கள் குறித்த விவரம் வருமாறு
‘கிளாடியேட்டர் 2’
ரிட்லி ஸ்காட் இயக்கத்தில் ரசல் குரோவ் நடிப்பில் கடந்த 2000-ம் ஆண்டு வெளியான திரைப்படம் ‘கிளாடியேட்டர்’. இப்படம் உலகமெங்கும் உள்ள திரையரங்குகளில் வெளியாகி சுமார் 400 மில்லியன் டாலர்கள் வசூலித்து சாதனை படைத்தது. கிட்டத்தட்ட 24 ஆண்டுகளுக்குப் பிறகு ‘கிளாடியேட்டர் 2’ படத்தினை ரிட்லி ஸ்காட் தற்போது உருவாக்கியுள்ளார். இப்படத்தில், பால் மெஸ்கல், டென்சல் வாஷிங்டன், பெட்ரோ பாஸ்கல் ஆகியோர் முக்கிய கதாபாத்திரங்களில் நடித்துள்ளனர். இப்படம் பாராமவுண்ட் பிளஸ் ஓ.டி.டி தளத்தில் கடந்த 21-ந் தேதி வெளியாகி உள்ளது.
‘பரோஸ்’
நடிகர் மோகன்லால் இயக்குனராக அறிமுகமான படம் பரோஸ். இந்த படத்தில் இவருடன் குரு சோமசுந்தரம், மீரா ஜாஸ்மின், ஸ்பானிஷ் நடிகை பாஸ் வேகா, ரபேல் அமர்கோ உட்பட பலர் நடித்திருந்தனர். அந்தோணி பெரும்பாவூர் தயாரித்த இப்படத்திற்கு சந்தோஷ் சிவன் ஒளிப்பதிவு செய்திருந்தார். லிடியன் நாதஸ்வரம் இசையமைப்பில் 3டி-யில் உருவான இந்தப் படம், பான் இந்தியா முறையில் கடந்த மாதம் 25-ம் தேதி திரையரங்குகளில் வெளியானது. இந்த நிலையில், இப்படம் கடந்த 22-ந் தேதி (நேற்று) டிஸ்னி பிளஸ் ஹாட்ஸ்டார் ஓ.டி.டி தளத்தில் வெளியாகி உள்ளது.
‘தி நைட் ஏஜென்ட்’
தி நைட் ஏஜென்ட் என்பது ஒரு அமெரிக்க அதிரடி திரில்லர் தொடர். இந்த தொடரை ஷான் ரியான் இயக்கியுள்ளார். கடந்த 2023-ம் ஆண்டு வெளியான இந்த தொடரின் முதல் சீசன் நல்ல வரவேற்பை பெற்றது. பீட்டர் சதர்லேண்ட் என்ற எப்.பி.ஐ ஏஜென்ட்டின் வாழ்க்கையைச் சுற்றி வரும் மாத்யூ குயிர்க்கின் நாவலை அடிப்படையாகக் கொண்டது இந்த தொடர் உருவாகியுள்ளது. இந்நிலையில் தற்போது இரண்டாவது சீசன் இன்று நெட்பிளிக்ஸ் ஓ.டி.டி தளத்தில் வெளியாகி உள்ளது.
‘தி ஸ்மைல் மேன்’
தமிழ் சினிமாவின் முன்னணி நடிகரான சரத்குமார் நடித்துள்ள படம் ‘தி ஸ்மைல் மேன்’. இந்த படத்தை இயக்குனர் ஷ்யாம் பர்வின் இயக்கியுள்ளார். சரத்குமார் இப்படத்தில் அல்சைமர் நோயால் பாதிக்கப்பட்ட ஓய்வு பெற்ற போலீஸ் அதிகாரியாக நடித்துள்ளார், அவரது ஞாபகம் அழிவதற்குள் அவர் ஒரு தொடர் கொலைகள் செய்த குற்றவாளியை பிடிக்க வேண்டும். இதை மையமாக வைத்து படத்தின் கதைக்களம் உருவாகியுள்ளது. இப்படம் நாளை (24-ந் தேதி) ஆஹா தமிழ் ஓ.டி.டி தளத்தில் வெளியாக உள்ளது.
‘திரு.மாணிக்கம்’
இயக்குனர் நந்தா பெரியசாமி இயக்கத்தில் சமுத்திரக்கனி நடிப்பில் உருவாகி இருக்கும் படம் திரு.மாணிக்கம். நடிகை அனன்யா இந்த படத்தில் சமுத்திரக்கனிக்கு ஜோடியாக நடித்துள்ளார். மேலும் இயக்குனர் பாரதிராஜா, நாசர், தம்பிராமையா, ஸ்ரீமன், வடிவுக்கரசி, கருணாகரன், இளவரசு உள்ளிட்ட பலர் நடித்துள்ளனர். ஒரு மனிதன் இன்றைய காலகட்டத்திலும் நேர்மையாக இருக்க முடியுமா? அதற்கான சாத்தியம் இருக்கின்றதா என்பதை பற்றி பேசும் படமாக உருவாகியுள்ளது. இப்படம் நாளை ஜீ5 ஓ.டி.டி தளத்தில் வெளியாக உள்ளது.
‘ஹிசாப் பராபர்’
ஹிசாப் பராபர் என்பது ஒரு நகைச்சுவை திரில்லர் படமாகும். அஷ்வின் திர் இயக்கியுள்ள இப்படத்தை ஜியோ ஸ்டுடியோஸ் மற்றும் எஸ்பி சினிகார்ப் நிறுவனம் தயாரித்துள்ளன. இப்படத்தில் ராதே மோகன் ஷர்மா என்ற எளிய ரயில்வே துறை ஊழியராக ஆர்.மாதவன் நடித்துள்ளார். மேலும் நீல் நிதின் முகேஷ் , கிர்த்தி குல்ஹாரி , ரஷாமி தேசாய் மற்றும் பைசல் ரஷித் ஆகியோர் துணை வேடங்களில் நடித்துள்ளனர். இப்படம் நாளை ஜீ5 ஓ.டி.டி தளத்தில் வெளியாக உள்ளது.
‘ரஸாக்கர்’
சுதந்திரப் போராட்ட காலத்தில், ஐதராபாத் நகரில் நடந்த, வரலாற்று நிகழ்வைக் கொண்டு உருவாகியுள்ள படம், ‘ரஸாக்கர்’. சமர்வீர் கிரியேஷன்ஸ் சார்பில் குடூர் நாராயண ரெட்டி தயாரித்துள்ளார். யதா சத்யநாராயணா இயக்கியுள்ள இந்தப் படத்தில், பாபி சிம்ஹா, வேதிகா, அனுஷா, ஜான் விஜய் உட்பட பலர் நடித்துள்ளனர். இப்படம் நாளை ஆஹா தமிழ் ஓ.டி.டி தளத்தில் வெளியாக உள்ளது.
‘வெனம்: தி லாஸ்ட் டான்ஸ்’
டாம் ஹார்டி நடிப்பில் கெல்லி மார்செல் இயக்கத்தில் கடந்த அக்டோபர் மாதம் வெளியான படம் ‘வெனம்: தி லாஸ்ட் டான்ஸ்’. இப்படத்தில் பிரம்மாண்டமான கிராபிக்ஸ் காட்சிகள் இடம் பெற்றுள்ளன. இந்த பாகத்துடன் இப்படம் முடிவடைகிறது. இந்தப் படத்தில் சிவெடெல் எஜியோபர், ஜூனோ டெம்பிள், ரைஸ் இபான்ஸ், பெக்கி லு ஆகியோர் நடித்துள்ளனர். இப்படம் உலகளவில் 400 மில்லியன் டாலர்களை வசூலித்துள்ளதாக கூறப்படுகிறது. இந்த நிலையில் இப்படம் வருகிற 25-ந் தேதி நெட்பிளிக்ஸ் ஓ.டி.டி தளத்தில் வெளியாக உள்ளது.