சென்னை
பிரபல நடிகை த்ரிஷாவின் எக்ஸ் தள (டிவிட்டர்) பக்கம் ஹேக் செய்யப்பட்டுள்ளது.
தென் இந்திய சினிமாவின் முன்னணி நடிகைகளில் ஒருவரான த்ரிஷா 2002-ல் வெளியான ‘மவுனம் பேசியதே’ திரைப்படத்தின் மூலம் தமிழ் சினிமாவில் கதாநாயகியாக அறிமுகமானார். பிறகு ‘சாமி’, ‘கில்லி’, ‘ஆறு’ உள்ளிட்ட வெற்றிப் படங்களில் நடித்து முன்னணி நடிகையாக உயர்ந்தார். இவர் கதாநாயகியாக அறிமுகமாகி 22 ஆண்டுகள் கடந்தும் தமிழ் சினிமாவில் த்ரிஷாவுக்கு தனியாக ரசிகர்கள் பட்டாளமே இருக்கின்றனர்.
அண்மையில் அஜித் மற்றும் திரிஷா நடிப்பில் வெளியான ‘விடாமுயற்சி’ படம் மக்கள் மத்தியில் விமர்சனம் ரீதியாகவும் வசூல் ரீதியாகவும் நல்ல வரவேற்பை பெற்று வருகிறது. அடுத்ததாக, “சூர்யா 45, குட் பேட் அக்லி, தக் லைப்” ஆகிய படங்களில் த்ரிஷா நடித்து வருகிறார்.
நடிகை த்ரிஷா தனது எக்ஸ் தள பக்கம் ஹேக் செய்யப்பட்டுள்ளதாக, தனது இன்ஸ்டாகிராம் பக்கத்தில் தெரிவித்துள்ளார். மேலும்அது மீட்கப்படும் வரை அதில் பதிவிடப்படும் எதுவும் என் பதிவல்ல என்றும் தெரிவித்துள்ளார். த்ரிஷாவின் எக்ஸ் பக்கம் ஹேக் செய்யபட்டது அவருடைய ரசிகர்களிடையே பரபரப்பை ஏற்படுத்தியுள்ளது