சென்னை: தமிழ்நாடு சர்வதேச சுற்றுலா முதலீட்டாளர் மாநாடு மாமல்லபுரத்தில் பிப்.2 மற்றும் 3 ஆகிய தேதிகளில் முதல்வர் மு.க.ஸ்டாலின் தலைமையில் நடைபெற உள்ளதாக, சுற்றுலாத் துறை அமைச்சர் ஆர்.ராஜேந்திரன் தெரிவித்தார்.
சுற்றுலாத்துறை அமைச்சர் ராஜேந்திரன், தொழில்துறை அமைச்சர் டிஆர்பி ராஜா ஆகியோர் தலைமைச் செயலகத்தில் கூட்டாக செய்தியாளர்களை சந்தித்தனர். அப்போது கூறியதாவது,
தமிழக சுற்றுலா துறையை மேம்படுத்தும் பொருட்டு சுற்றுலா துறைக்கென தனிக்கொள்கையை முதல்வர் உருவாக்கி கொடுத்துள்ளார். மாநிலத்தில் 300 சுற்றுலா தலங்களை மேம்படுத்த கொள்கை வகுக்கப்பட்டுள்ளது. தமிழக பொருளாதாரத்தை 2030-ம் ஆண்டுக்குள் ஒரு டிரில்லியன் டாலர் பொருளாதாரமாக உயர்த்த முதல்வர் இலக்கு நிர்ணயித்துள்ளார். அந்த பொருளாதார வளர்ச்சியில் சுற்றுலா துறையின் வளர்ச்சி 12 சதவீதம் அளவுக்கு இருக்கும் என்ற நம்பிக்கை எங்களுக்கு உள்ளது.
‘தற்போது சுற்றுலா துறையில் முதலீட்டாளர்களை கவரும்வகையில் தமிழ்நாடு சர்வதேச சுற்றுலா முதலீட்டாளர் மாநாட்டை நடத்த முதல்வர் முடிவெடுத்துள்ளார். இந்த மாநாடு பிப். 2 மற்றும் 3 ஆகிய தேதிகளில் சென்னை அருகேயுள்ள மாமல்லபுரத்தில் முதல்வர் தலைமையில் நடைபெற உள்ளது.
இந்த மாநாட்டில் இந்தியாவின் பல்வேறு மாநிலங்களில் இருந்தும், உலகின் பல்வேறு நாடுகளில் இருந்தும் முதலீட்டாளர்கள் பங்கேற்கின்றனர். மருத்துவ சுற்றுலா, சுற்றுச்சூழல் சுற்றுலா, சாகச சுற்றுலா என அனைத்து வகை சுற்றுலாக்களையும் ஒருங்கிணைக்கும் வகையில் இந்த முதலீட்டாளர் மாநாடு நடத்தப்படும். இவ்வாறு அவர் கூறினார்.
இதையடுத்து பேசிய தொழில்துறை அமைச்சர் டிஆர்பி ராஜா, இந்தியாவில் சுற்றுலா செல்வோரின் முதல் விருப்ப தேர்வாக இருப்பது தமிழகம்தான். தற்போது பாரம்பரிய சுற்றுலா, கலாச்சார சுற்றுலா, ஆன்மிக சுற்றுலா போன்றவற்றுக்கு மட்டுமே முக்கித்துவம் அளிக்கப்பட்டு வருகிறது. டிசம்பர், ஜனவரி என்றால் இசைவிழா என்ற அளவில்தான் வெளியே தெரிகிறது. இதையும் தாண்டி ஏராளமான விஷயங்கள் உள்ளன.
அவற்றையும் நாம் கொண்டாட வேண்டியது அவசியம் என்பதுதான் முதல்வரின் சிந்தனை. தற்போது புதிய முயற்சியாக, சுற்றுலா மேம்பாட்டுக்கு தேவையான நிலங்களை எங்கள் துறையின் சிப்காட் நிறுவனம் தேர்வு செய்து வழங்கும். அதை சுற்றுலா துறை மேம்படுத்தும். இதுவரை இல்லாத புதிய முயற்சி இது.
இத்திட்டத்தின் கீழ், புதிதாக 40 இடங்களை அடையாளம் கண்டுள்ளோம். தமிழகத்தில் 1,076 கி.மீ. நீள கடற்கரை இருக்கிறது. ஆனால், இந்த நீண்ட கடற்கரையை சுற்றுலா மேம்பாட்டுக்கு நாம் இன்னும் முழுமையாக பயன்படுத்தவில்லை. கடற்கரை சு்ற்றுலா திட்டங்களை செயல்படுத்தினால் மீனவர்களின் பொருளாதாரம் மிகப்பெரிய அளவில் உயரும் என்று அவர் கூறினார்.
முன்னதாக, தமிழ்நாடு சர்வதேச முதலீட்டாளர் மாநாட்டுக்கான லோகோவை அமைச்சர்கள் இருவரும் அறிமுகப்படுத்தினர். பேட்டியின் போது சுற்றுலாதுறை செயலர் கே.மணிவாசன், சுற்றுலாத் துறை ஆணையர் ஜெ.இன்னசென்ட் திவ்யா உள்ளிட்டோர் உடனிருந்தனர்.
[youtube-feed feed=1]