சென்னை: ஜனவரி 23ந்தேதி சென்னையை அடுத்த மதுராந்தகம் பகுதியில் நடைபெற உள்ள தேசிய ஜனநாயக கூட்டணி பிரச்சார பொதுக்கூட்டத்தில் பிரதமர் மோடி பங்கேற்க இருப்பதால், டெல்லியிலிருந்து வந்த எஸ்பிஜி குழுவினர் சென்னை விமான நிலையத்தில் ஆய்வுக்கூட்டம் நடத்தினர்.
பிரதமர் மோடி வருகையால் மீனம்பாக்கம் மற்றும் கிண்டி ஆகிய பகுதிகள் Red Zone-ஆக அறிவிக்கப்பட்டுள்ளன.
தமிழ்நாடு சட்டப்பேரவை தேர்தல் இன்னும் சில மாதங்களில் வர உள்ள நிலையில் தேசிய ஜனநாயக கூட்டணியின் தேர்தல் பிரச்சார பொதுக்கூட்டம் செங்கல்பட்டு மாவட்டம், மதுராந்தகத்தில் வரும் 23 ஆம் தேதி வெள்ளிக்கிழமை மிகப்பெரிய அளவில் நடத்தப்பட உள்ளது. இந்த பொதுக்கூட்டத்தில் கூட்டணி கட்சிகளின் தலைவர்கள் பங்கேற்க உள்ளனர். சிறப்பு விருந்தினராக பிரதமர் நரேந்திர மோடி கலந்து கொண்டு கூட்டணிக் கட்சி தலைவர்கள் மத்தியில் சிறப்புரை ஆற்ற இருக்கிறார்.
இதற்காக பிரதமர் திருவனந்தபுரத்தில் இருந்து வரும் 23-ம் தேதி பகல் 1.15 மணிக்கு தனி விமானத்தில் புறப்பட்டு, நண்பகல் 2.15 மணிக்கு சென்னை பழைய விமான நிலையம் வருகிறார். அங்கிருந்து ஹெலிகாப்டரில் பகல் 2.25 மணிக்கு புறப்பட்டு, மாலை 3 மணிக்கு மதுராந்தகம் பொதுக்கூட்ட திடலுக்கு செல்கிறார்.
மாலை 3 மணி முதல் 4.30 மணி வரை பொதுக்கூட்டத்தில் பங்கேற்கும் பிரதமர் மாலை 4.30 மணிக்கு அங்கிருந்து ஹெலிகாப்டரில் புறப்பட்டு மாலை 5 மணிக்கு சென்னை பழைய விமான நிலையம் வருகிறார்.
அங்கிருந்து மாலை 5.05 மணிக்கு தனி விமானம் மூலம் டெல்லிக்கு புறப்படுகிறார்.
பிரதமரின் வருகையை ஒட்டி டெல்லியில் இருந்து சிறப்பு பாதுகாப்புப் படை (எஸ்பிஜி) ஏஐஜி அமி சந்த் யாதவ் தலைமையிலான குழுவினர் சென்னை விமான நிலையம் வந்துள்ளனர். விமான நிலையத்தில் பிரதமரின் பாதுகாப்பு ஏற்பாடுகள் குறித்து ஆய்வுக் கூட்டத்தை நடத்தினர். அந்த கூட்டத்தில் சென்னை மாநகர போலீஸ், மத்திய தொழில் பாதுகாப்புப் படை, மாவட்ட வருவாய்துறை, சென்னை விமான நிலைய உயர் அதிகாரிகள், மத்திய, மாநில உளவுப் பிரிவினர், முக்கிய பிரமுகரின் பாதுகாப்பு அதிகாரிகள், மருத்துவம் மற்றும் தீயணைப்புத் துறை அதிகாரிகள் கலந்து கொண்டனர்.
அப்போது பிரதமரின் தனி விமானம் வந்து நிற்கும் பகுதி, மதுராந்தகம் செல்ல பயன்படுத்தப்படும் ஹெலிகாப்டர் நிற்கும் பகுதியில் எந்தெந்த அதிகாரிகள் கண்காணிப்புப் பணிகளில் ஈடுபட வேண்டும் என்பது குறித்து குழுவினர் ஆய்வு மேற்கொண்டனர். பிரதமர் வருவதையொட்டி, 23-ம் தேதி வரை சென்னை விமான நிலையம் முழு பாதுகாப்பு வளையத்துக்குள் கொண்டு வரப்பட்டுள்ளது.
அந்த குழுவினர் செங்கல்பட்டு மாவட்டம் மதுராந்தகம் சென்று, அங்கு பொதுக்கூட்டம் நடக்கும் பகுதி, பிரதமரின் ஹெலிகாப்டர் வந்து இறங்கும் இடம் ஆகியவற்றையும் ஆய்வு செய்தனர்.
பிரதமர் மோடி சென்னை வருகையையொட்டி, பாதுகாப்பு காரணங்களுக்காக சென்னையில் மீனம்பாக்கம் மற்றும் கிண்டி ஆகிய பகுதிகள் Red Zone-ஆக அறிவிக்கப்பட்டுள்ளன. டிரோன் கேமராக்கள், ஆளில்லா வான்வழி கருவிகள், ஹாட் ஏர் பலூன்கள் உள்ளிட்டவற்றை பறக்கவிட தடை விதிக்கப்பட்டுள்ளன.
[youtube-feed feed=1]