சென்னை: கரூரில் 41 பேர் பலியான சம்பவம் தொடர்பாக பாஜக தலைமை ஹேமமாலினி தலைமையிலான உண்மை கண்டறியும் குழு அமைக்கப்பட்டு உள்ளது. இந்த குழு இன்று கரூர் வருகை தருகிறது.
கரூர் கூட்ட நெரிசலில் சிக்கி 41 பேர் பலியான சம்பவம் தொடர்பாக அமைக்கப்பட்டுள்ள பாஜக தலைமையிலான தேசிய ஜனநாயகக் கூட்டணியின் 8 பேர் கொண்ட உண்மை கண்டறியும் குழு இன்று (செப்டம்பர் 30) தமிழகம் வருகிறது. இந்த குழுவில் தேசிய ஜனநாயக கூட்டணி கட்சிகளை சேர்ந்த பிரமுகர்கள் இடம்பெற்றுள்ள நிலையில், அதிமுகவின் எம்.பி.க்கள் யாரும் இடம் பெறாதது குறிப்பிடத்தக்கது.
தவெக தலைவர் நடிகர் விஜய்யின் கரூர் பிரசார கூட்டத்தில் ஏற்பட்ட நெரிசலில் சிக்கி 41 பேர் பலியாகினர். இந்த சம்பவம் தொடர்பாக தவெக கரூர் மா.செ. மதியழகன் கைது செய்யப்பட்டுள்ளார். அவரைத் தொடர்ந்து தவெக பொதுச்செயலாளர் புஸ்ஸி ஆனந்த், சமூக ஊடகப் பொறுப்பாளர் நிர்மல் குமார் ஆகியோரும் கைது செய்யப்படலாம் என கூறப்படுகிறது.
இதனிடையே நேற்று (செப்டம்பர் 29) கரூருக்கு மத்திய அமைச்சர்கள் நிர்மலா சீதாராமன், எல்.முருகன் வருகை தந்தனர். கரூர் கூட்ட நெரிசல் சம்பவம் எப்படி நிகழ்ந்தது என்பது பற்றி விசாரித்த இருவரும் இந்த சம்பவத்தில் உயிரிழந்தோர் குடும்பத்தினருக்கு ஆறுதல் தெரிவித்து பிரதமர் மோடி அறிவித்த தலா ரூ.2 லட்சம் நிவாரண நிதியையும் வழங்கினர்.
இதன் பின்னர் செய்தியாளர்களிடம் பேசிய மத்திய அமைச்சர் நிர்மலா சீதாராமன், கரூர் சம்பவம் தொடர்பாக உண்மையை கண்டறிவதற்கான குழு ஒன்றை பாஜக தலைமையிலான தேசிய ஜனநாயகக் கூட்டணி அமைத்துள்ளது என்றார். தேசிய ஜனநாயகக் கூட்டணியின் இந்த குழுவில் பாஜக, தெலுங்குதேசம், சிவசேனா கட்சிகளின் எம்.பிக்கள் இடம் பெற்றுள்ளனர். ஹேமமாலினி எம்.பி. தலைமையிலான இந்த குழு கரூருக்கு இன்று (செப்டம்பர் 30) வருகை தருகிறது.
