டெல்லி: இளநிலை மருத்துவப் படிப்புகளுக்கான நீட் தேர்வு முடிவுகள் இன்று வெளியாகும் என தகவல்கள் தெரிவிக்கின்றன.
NTA வெளியிட்ட அதிகாரப்பூர்வ அட்டவணையின்படி, NEET UG தேர்வுக்கான முடிவுகள் ஜூன் 14, 2025 ஆம் தேதிக்குள் வெளியிட திட்டமிடப்பட்டுள்ளது. அதனால் திட்டமிட்டபடி இன்று தேர்வு முடிவுகள் வெளியாகும் என எதிர்பார்ப்பு ஏற்பட்டுள்ளது. கடந்த ஆண்டுகளில் NTA பின்பற்றிய போக்குகளின் அடிப்படையில், மாணவர்கள் எந்த நேரத்திலும் முடிவுகள் அறிவிக்கப்படும் என்று எதிர்பார்க்கலாம்.
கடந்த மே மாதம் 4ம் தேதி இளநிலை மருத்துவ படிப்புகளான, எம்.பி.பி.எஸ்., பி.டி.எஸ். உள்ளிட்ட மருத்துவப் படிப்புகளுக்கான நுழைவு தேர்வான நீட் தேர்வு நாடு முழுவதும் நடைபெற்றது. இந்த தேர்வை தமிழ்நாட்டில் இருந்து சுமார் ஒன்றரை லட்சம் மாணவர்கள் உள்பட நாடு முழுவதும் 23 லட்சம் மாணவ மாணவியரும் எழுதினர்.
இதைத்தொடர்ந்து, இந்தத் தேர்விற்கான தற்காலிக விடைக் குறிப்பை தேசிய தேர்வு முகமை கடந்த 3ம் தேதி (ஜுன்) வெளியிட்டது. மாணவர்கள் இந்த விடைக்குறிப்பு குறித்த தங்களது ஆட்சேபனைகளைத் தெரிவிப்பதற்கான கால அவகாசம் கடந்த 5ம் தேதியுடன் நிறைவடைந்தது. அதன்படி, மாணவர்களிடமிருந்து பெறப்பட்ட ஆட்சேபனைகளைப் பரிசீலித்த பிறகு, இறுதி விடைக்குறிப்பு (பைனல் ஆன்ஷர் கீ) தயாரிக்கப்படும். அதன் அடிப்படையிலேயே தேர்வு முடிவுகளும், தகுதிப் பட்டியலும் வெளியிடப்படும் என அறிவிக்கப்பட்டது.
இந்த நிலையில், இளநிலை மருத்துவப் படிப்புகளுக்கான நீட் தேர்வு முடிவுகள் இன்று (ஜுன் 14) வெளியாவதாக தகவல்கள் வெளியாகி உள்ளது. தேர்வு எழுதிய மாணவ மாணவிகள் தங்களது தேர்வு முடிவுகளை https://neet.nta.nic.in/ இந்த என்ற அதிகாரப்பூர்வ இணையதளத்தில் தெரிந்துகொள்ளலாம் என்று அறிவிக்கப்பட்டுள்ளது.
மாணவர்கள் தங்கள் தேர்வு முடிவுகளைப் பதிவிறக்கம் செய்ய முதலில் அதிகாரப்பூர்வ இணையதளத்திற்குச் சென்று, அதில் ‘NEET UG 2025 Result’ என்ற இணைப்பைக் கிளிக் செய்ய வேண்டும். இதன்பிறகு தோன்றும் பக்கத்தில் தங்களது விண்ணப்ப எண் மற்றும் கடவுச்சொல்லை உள்ளீடு செய்து சமர்ப்பித்தால், மாணவர்கள் தங்களது தேர்வு முடிவுகளை பிடிஎப் வடிவில் பதிவிறக்கம் செய்து கொள்ளலாம்.
