சென்னை
சென்னை புழல் சிறையில் கைதிகள் சண்டையில் கைதி ஒருவரின் பல் உடைந்துள்ளது.
சென்னை புழல் விசாரணை சிறையில் 3 ஆயிரத்துக்கும் மேற்பட்ட கைதிகளும், தண்டனை சிறையில் ஆயிரத்துக்கும் மேற்பட்ட கைதிகளும், பெண்கள் சிறையில் 200-க்கும் மேற்பட்ட கைதிகளும் அடைக்கப்பட்டுள்ளனர். சென்னை திருவொற்றியூர், வண்ணாரப்பேட்டை ஆகிய பகுதிகளில் கஞ்சா விற்பனையில் ஈடுபட்டதாக ரிஷி குமார், செபஸ்டின் டேனியல், வீரா, கவுதம் ஆகியோர் கைது செய்யப்பட்டு புழல் விசாரணை சிறையில் அடைக்கப்பட்டுள்ளனர்.
வெளியில் கஞ்சா விற்கும் போது இவர்கள் இரு கோஷ்டிகளாக செயல்பட்டு வந்தனர். இரவு கைதிகள் அனைவரும் சிறையில் சாப்பாட்டுக்கு வரிசையில் நின்று கொண்டிருந்தபோது கஞ்சா வழக்கில் கைதான 2 கோஷ்டி கைதிகள் இடையே வாய்த்தகராறு ஏற்பட்டது. அவர்களுக்குள் வாக்குவாதம் முற்றி கைகலப்பானது. கைதிகள் ஒருவரை ஒருவர் சரமாரியாக தாக்கிக்கொண்டனர்.
அப்போது ரிஷிகுமார் தாக்கியதில் வீராவின் பல் உடைந்து ரத்தம் கொட்டியது. அவரை உடனடியாக 108 ஆம்புலன்ஸ் மூலம் சென்னை அரசு ஸ்டான்லி ஆஸ்பத்திரியில் சிகிச்சைக்கு சேர்த்தனர். புழல் போலீஸ் இன்ஸ்பெக்டர் இந்த கோஷ்டி மோதல் குறித்த புகாரின்பேரில் வழக்குப்பதிவு செய்து விசாரித்து வருகிறார்.
