சென்னை: நடிகரும், தேமுதிக தலைவருமான விஜயகாந்த் பிறந்தநாள் இன்று கொண்டாடப்படுகிறது. இதையொட்டி அவருக்கு முதல்வர் ஸ்டாலின் வாழ்த்து தெரிவித்துள்ளார்.
நடிகரும், தேமுதிக தலைவருமான விஜயகாந்தின் 71 வது பிறந்த நாள் இன்று கொண்டாடப்படுகிறது. விஜயகாந்தின் பிறந்த நாளை ஒட்டி கோயம்பேட்டில் உள்ள கட்சி அலுவலகத்தில் நலத்திட்ட உதவிகள் வழங்கப்படுவதுடன், தொண்டர்களுக்கு இனிப்புகள் வழங்கப்படுகின்றன. அவரது பிறந்தநாளை தேமுதிக தொண்டர்களால் வறுமை ஒழிப்பு தினமாக கொண்டாடி வருகின்றனர்.
இதற்கிடையில் விஜயகாந்த் கடந்த சில வருடங்களாக உடல்நலம் பாதிக்கப்பட்டு சிகிச்சை பெற்று வரும் நிலையில், சமீபத்தில் அவரது உடல்நிலை பின்னடைவை சந்தித்ததாகதகவல்கள் பரவின. இது தேமுதிக தொண்டர்களிடையே சலசலப்பை ஏற்படுத்தியது. இதையடுத்து விஜயகாந்த் நலமுடன் இருப்பதாக அறிவிக்கப்பட்டது. மேலும், அவரது பிறந்தநாளன்று, கட்சி தொண்டர்களை சந்திப்பார் என்றும் கூறப்பட்டது. அதன்காரணமாக விஜயகாந்த் இன்று தொண்டர்களையும் ,நிர்வாகிகளையும் சந்திப்பார் என எதிர்பார்க்கப்படுகிறது.
இந்த நிலையில் முதல்வர் ஸ்டாலின் விஜயகாந்துக்கு வாழ்த்து தெரிவித்து டிவிட் பதிவிட்டுள்ளார். அதில், தே.மு.தி.க நிறுவனத் தலைவரும், எனது தோழருமான திரு. விஜயகாந்த் அவர்களுக்கு உளங்கனிந்த பிறந்தநாள் வாழ்த்துகள்.முழு உடல்நலத்துடன் புத்துணர்ச்சியையும் பெற்றுப் பல்லாண்டு நீங்கள் மகிழ்ச்சியோடும் நிறைவோடும் வாழ விழைகிறேன். என்று குறிப்பிட்டுள்ளார்.