சென்னை: தாம்பரம் அருகே வேளச்சேரி நெடுஞ்சாலை கவுரிவாக்கம் பகுதியில் அமைந்துள்ள ‘புளு ஸ்டோன்’ எனப்படும் வைர நகைகளுக்கு பிரசித்தி பெற்ற பிரபல வைர நகைக் கடையில் பலகோடி மதிப்பிலான தங்கம் வைரம் நகைகள் கொள்ளை அடிக்கப்பட்டு உள்ளது. இது அதிர்ச்சியை ஏற்படுத்தி உள்ளது.
கிழக்கு தாம்பரத்தில் இருந்து வேளச்சேரி செல்லும் நெடுஞ்சாலையில் கவுரிவாக்கம், செம்பாக்கம் பகுதியில் அமைந்துள்ளது புளூஸ்டோன் ஜூவல்லரி. வைர நகைகளுக்கு பிரசித்தி பெற்ற நிறுவனமான இதில் பல கோடி மதிப்பிலான தங்க, வைர நகைகள் இன்று அதிகாலையில் கொள்ளையடிக்கப்பட்டு உள்ளது. நேற்று நள்ளிரவில் நகைக்கடைக்குள் புகுந்த கொள்ளையர்கள் மாடியில் இருந்து லிப்ட் வழியாக கடைக்குள் புகுந்து கைவரிசையில் ஈடுபட்டுள்ளனர். இதில், கடையில் பார்வைக்காக வைக்கப்பட்டிருந்த அனைத்து நகைகளும் திருடப்பட்டுள்ளன. கொள்ளையர்கள் இறுதியாக, அங்கிருந்த லாக்கரை திறக்க முயற்சி செய்தபோது எச்சரிக்கை அலாரம் ஒலித்ததால் கொள்ளையர்கள் அங்கிருந்து தப்பித்து உள்ளனர்.
இதுகுறித்து தகவல் அறிந்த காவல்துறையினர் விரைந்து வந்து விசாரணை நடத்தினர். மேலும், கைரேகை மற்றும் தடயவியல் நிபுணர்களை வரவழைத்து போலீசார் சோதனை செய்து வருகின்றனர். கொள்ளையடிக்கப்பட்ட தங்கம் மற்றும் வைர நகைகளின் மதிப்பு பல கோடி இருக்கும் என கூறப்படுகிறது.
இந்த கொள்ளை சம்பவம் பெரும் பரபரப்பை ஏற்படுத்தி உள்ளது. எப்போதும் மக்கள் நடமாட்டம் உள்ள நெடுஞ்சாலை பகுதியில், அதுவும் வாட்ச்மேன் உள்ள நிலையில், கொள்ளை சம்பவம் நடைபெற்றுள்ளது அதிர்ச்சியை ஏற்படுத்தி உள்ளது.