ஆர்.விஜயமுருகன் இயக்கத்தில் மைம் கோபி, ‘ஆடுகளம்’ முருகதாஸ், வலினா உள்ளிட்ட பலர் நடிப்பில் உருவாகியுள்ள படம் ‘ஜகா’.
இந்தப் படத்தின் டீஸர் மற்றும் ஃபர்ஸ்ட் லுக் போஸ்டர் ஜூலை 11-ம் தேதி வெளியிடப்பட்டது.
சிவனுக்கு ஆக்சிஜன் சிலிண்டர் பொருத்தப்பட்டு முகக்கவசம் போட்டிருப்பது போன்று ஃபர்ஸ்ட் லுக் இருந்தது. இதனால் இணையத்தில் பெரும் சர்ச்சை ஏற்பட்டது.
இது தொடர்பாக இயக்குநர் ஆர்.விஜயமுருகன் அறிக்கை ஒன்றை வெளியிட்டுள்ளார்.
“எங்களது தயாரிப்பு நிறுவனத்தின் பெயரே ஓம் டாக்கீஸ். பாபநாசம் சிவன் கோயிலில் பூஜை போட்டுவிட்டுத்தான் படப்பிடிப்பையே தொடங்கினோம்.
அப்படியிருக்கும்போது சிவபெருமானை அவமதிப்போமா? கோவிட்-19 விழிப்புணர்வு நோக்கத்தில் வைக்கப்பட்ட காட்சிதான் அது. கொரோனா வழிகாட்டு நெறிமுறைகளை மீறக்கூடாது எனக் கடவுளே சொல்வது போன்றுதான் அந்த போஸ்டர். சக மனிதர்கள் மூலம் விழிப்புணர்வு ஏற்படுத்துவதை விட, கடவுள் மூலம் விழிப்புணர்வு ஏற்படுத்தினால் நல்ல பலன் கிடைக்கும் என்ற எண்ணத்தில் தான் அந்த போஸ்டர் வடிவமைக்கப்பட்டது. படத்தில் எந்த இடத்திலும் கடவுள் அவமதிக்கப்படவில்லை. அதுபோன்ற எண்ணம் எப்போதும் எங்களுக்கு ஏற்படாது.
மலிவான விளம்பரம் தேடும் விருப்பம் எங்கள் குழுவினருக்குத் துளியும் இல்லை. இருப்பினும் எந்தவித உள்நோக்கமும் இல்லாது செயல்பட்ட எங்களின் இத்தகைய செயல் பலரின் மனதைப் புண்படுத்தியது அறிந்து வருந்துகிறேன். அதற்கான மன்னிப்பு கோருவதோடு கொரோனா இல்லாத உலகம் அமைய எல்லாம் வல்ல இறைவனை வேண்டுகிறேன்” என ஆர்.விஜயமுருகன் தெரிவித்துள்ளார்.
[youtube-feed feed=1]