வார இறுதி நாட்கள் சிறப்பு பேருந்துகள் இயக்கப்படும்! போக்குவரத்து துறை அறிவிப்பு…

சென்னை: புயல் மழை காரணமாக,  வார இறுதி நாட்கள் சிறப்பு பேருந்துகள் இயக்குவதில் சிரமம் ஏற்பட்டிருந்த நிலையில், இந்த வாரம் முதல் மீண்டும் சிறப்புபேருந்துகள் இயக்கப்படுவதாக தமிழ்நாடு போக்குவரத்து துறை அறிவித்து உள்ளது.

வார இறுதி நாட்களை முன்னிட்டு தமிழ்நாடு அரசு போக்குவரத்துக் கழகம் மூலம் சிறப்பு பேருந்துகள் இயக்கப்படுவதாக அரசு விரைவுப் போக்குவரத்துக் கழகம் தெரிவித்து உள்ளது.

இதுகுறித்து வெளியிடப்பட்டுள்ள செய்தி குறிப்பில் கூறியிருப்பதாவது,

வரும் 06/12/2024 (வெள்ளிக்கிழமை), 07/12/2024 (சனிக்கிழமை), 08/12/2024 (ஞாயிறு) வார விடுமுறை நாட்களை முன்னிட்டு சென்னையிலிருந்தும் இதர இடங்களுக்கும் மற்றும் பிற இடங்களிலிருந்தும் கூடுதலான பயணிகள் தமிழகம் முழுவதும் பயணம் மேற்கொள்வார்கள் என எதிர்பார்க்கப்படுகிறது. இதனை கருத்தில் கொண்டு தமிழ்நாடு அரசு போக்குவரத்துக் கழகங்கள் தினசரி இயக்கப்படும் பேருந்துகளுடன் கூடுதலாக சிறப்பு பேருந்துகளை இயக்க திட்டமிடப்பட்டுள்ளது. அதன் விவரம் வருமாறு:=

சென்னை கிளாம்பாக்கம் பேருந்து நிலையத்தில் இருந்து,  திருவண்ணாமலை, திருச்சி, கும்பகோணம், மதுரை, திருநெல்வேலி, நாகர்கோவில், கன்னியாகுமரி, தூத்துக்குடி, கோயம்புத்தூர், சேலம், ஈரோடு, திருப்பூர் ஆகிய இடங்களுக்கு 06/12/2024 (வெள்ளிக்கிழமை) அன்று 155 பேருந்துகளும், 07/12/2024 (சனிக்கிழமை) 155 பேருந்துகளும் இயக்க திட்டமிடப்பட்டுள்ளது.

 சென்னை கோயம்பேடு பேருந்து நிலையத்தில் இருந்து,  திருவண்ணாமலை, நாகை, வேளாங்கண்ணி, ஓசூர். பெங்களூரு ஆகிய இடங்களுக்கு 06/12/2024 வெள்ளிக் கிழமை அன்று 40 பேருந்துகளும் 07/12/2024 சனிக்கிழமை அன்று 40 பேருந்துகளும் மேற்கூறிய இடங்களிலிருந்தும் இயக்க திட்டமிடப்பட்டுள்ளது,

சென்னை மாதாவரம் பேருந்து நிலையத்தில் இருந்து,  06/12/2024 அன்று 15 பேருந்துகளும் 07/12/2024 அன்று 15 பேருந்துகளும் சிறப்பு பேருந்துகள் இயக்கப்படுகிறது.

மேலும், ஞாயிறு அன்று சொந்த ஊர்களில் இருந்து சென்னை மற்றும் பெங்களூர் திரும்ப வசதியாக பயணிகளின் தேவைகேற்ப அனைத்து இடங்களிலிருந்தும் சிறப்பு பேருந்துகள் இயக்கிட திட்டமிடப்பட்டுள்ளது.

இந்நிலையில், இந்த வார இறுதியில் வெள்ளிக்கிழமை அன்று 5,365 பயணிகளும், சனிக்கிழமை 2,471 பயணிகளும் மற்றும் ஞாயிறு அன்று 5,952 பயணிகளும் பயணம் மேற்கொள்ள முன்பதிவு செய்துள்ளனர்.

இந்த எண்ணிக்கை மேலும் அதிகரிக்க வாய்ப்பு உள்ளதால் தொலைதூர பயணம் மேற்கொள்ள இருக்கும் பயணிகள் கூட்ட நெரிசலை தவிர்க்கும் பொருட்டு தங்களது பயணத்திற்கு www.tnstc.in மற்றும் Mobile App மூலம் முன்பதிவு செய்து பயணிக்க கேட்டுக்கொள்ளப்படுகிறார்கள்.

இச்சிறப்பு பேருந்து இயக்கத்தினை கண்காணிக்க அனைத்து பேருந்து நிலையங்களிலும் போதிய அலுவலர்கள் நியமிக்கப்பட்டுள்ளனர். எனவே, பயணிகள் மேற்கூறிய வசதியினை பயன்படுத்தி தங்களது பயணத்தினை மேற்கொள்ள இதன் மூலம் தெரிவிக்கப்படுகிறது.‘

இவ்வாறு அதில் கூறப்பட்டுள்ளது.