மதுரை: சசிகலாவை அதிமுகவில் இணைப்பது குறித்து, தலைமைக் கழக நிர்வாகிகள் கலந்து ஆலோசித்து முடிவு எடுப்பர் என அதிமுக ஒருங்கிணைப்பாளர் ஓ.பன்னீர்செல்வம் மதுரையில் இன்று செய்தியாளர்களிடம்  கூறியது தமிழக அரசியலில் மீண்டும் சலசலப்பை ஏற்படுத்தி உள்ளது. சசிகலா அதிமுகவை கைப்பற்றுவது உறுதி என அவரது ஆதரவாளர்கள்  சமூக வலைதளங்களில் கருத்து பதிவிட்டு வருகின்றனர்.

பசும்பொன் முத்துராமலிங்க தேவரின் குருபூஜை விழா வரும் 30-ம் தேதி நடைபெற உள்ளது. இதையொட்டி அவரது சிலைக்கு அணிவிப்பதற்காக அதிமுக கட்சி சார்பில், வழங்கிய சுமார் பதிமூன்றரைக் கிலோ தங்கக் கவசம் மதுரை அண்ணா நகரிலுள்ள பேங்க ஆஃப் இந்தியாவிலுள்ள லாக்கரில் இருந்து எடுக்கும் நிகழ்ச்சி இன்று நடைபெற்றது. இந்த தங்கக்கவசத்தை, முன்னாள் துணை முதல்வர் ஓ.பன்னீர்செல்வம் தலைமையில் முன்னாள் அமைச்சர்கள் செல்லூர் கே.ராஜூ, ஆர்.பி.உதயகுமார் உள்ளிட்ட கட்சி நிர்வாகிகள் பங்கேற்றனர். வங்கியில் இருந்து ஓ.பன்னீர்செல்வம் கையெழுத்திட்டு எடுக்கப்பட்ட தங்கக் கவசம் பசும்பொன் தேவர் நினைவிடப் பொறுப்பாளர் காந்தி மீனாளிடம் ஒப்படைக்கப்பட்டது.

பின்னர் செய்தியாளர்களை சந்தித்த ஓபிஎஸ்,  ”மறைந்த முன்னாள் முதல்வர் எம்ஜிஆர் ஆரம்பித்த இந்த இயக்கம் தொண்டர்களால் வளர்க்கப்பட்ட இயக்கமாகவே இன்றளவும் உள்ளது. மறைந்த முதல்வர் ஜெயலலிதாவின் திட்டங்களைத் தொடர்ந்து நடைமுறைப்படுத்த வேண்டும் என, நாங்கள் வலியுறுத்தி வருகின்றோம்.

அம்மா உணவகத்தில் ஏற்கெனவே வழங்கப்பட்டு வந்த சப்பாத்தி நிறுத்தப்பட்டது தொடர்பாகவும், தொடர்ந்து அம்மா உணவகத்தில் வழங்கப்பட்டு வந்த உணவுகளை வழங்க வேண்டும் என வலியுறுத்து இருப்பதாகவும், தற்போது பொறுப்பிலுள்ள திமுக அரசு அதிமுக அரசு கொண்டு வந்த எந்தத் திட்டங்களையும், நிறுத்தாமல் தொடர்ந்து செயல்படுத்த வேண்டும் என்று வலியுறுத்தினார்.

சசிகலா குறித்த கேள்விக்கு பதில் அளித்தவர்,  அரசியலில் யார் வேண்டுமானாலும் வரலாம். அதை ஏற்பதும், ஏற்காததும் மக்களின் முடிவு. அதிமுக தொண்டர்களின் இயக்கம். தற்போது அதிமுக இரட்டைத் தலைமையின் கீழ் கட்சி சிறப்பாகச் செயல்பட்டுக் கொண்டிருக்கிறது என்று கூறியவர்,  சசிகலாவைக் கட்சியில் சேர்ப்பது குறித்து, தலைமைக் கழக நிர்வாகிகள் ஆலோசித்து முடிவு எடுப்பார்கள் என்று கூறினார்.

ஓபிஎஸ்-ன் இந்த கருத்து சமூக வலைதளங்களில் கடுமையாக விமர்சிக்கப்பட்டு வருகிறது. அதே வேளையில் சசிகலா வலையில் ஓபிஎஸ் சிக்கிவிட்டார் என்றும் விமர்சிக்கப்பட்டு வருகிறது.

என்னப்பா புரட்சி செய்தார் சசிகலா?

நடைபெற்று முடிந்த சட்டமன்ற தேர்தல் தோல்விக்கு அதிமுகவில் தொடரும் உட்கட்சி மோதல் மற்றும் இரட்டை தலைமைக்குள் ஒற்றுமை இல்லாததே என்ற கருத்து அதிமுக தொண்டர்களிடையே நிலவி வருகிறது. மேலும், அரசியல் விமச்கர்கள் கூறுவது போல, அதிமுகவில் கொங்கு மண்டலம், மதுரை மண்டலம் என இரு பிரிவுகளாக, ஜாதிய ரீதியிலும் பிரிந்து கிடக்கிறது. இதனால், கட்சியை கைப்பற்றுவதில் இரு கோஷ்டிகளுக்கும் இடையே முரண்பாடுகள் உள்ளதாகவும், அதன் காரணமாகவே சட்டமன்ற தேர்தலில் தோல்வியை எதிர்கொள்ள நேரிட்டதாகவும் குற்றம் சாட்டப்பட்டது. குறிப்பாக தென்மாவட்ட தோல்விக்கு ஒபிஎஸ் மீது வசைமாரி பொழியப்பட்டது. கொங்கு மண்டல அதிமுக வெற்றிக்கு சட்டமன்ற எதிர்க்கட்சித் தலைவர் பதவி எடப்பாடி பழனிச்சாமிதான் காரணம் என்றும் புகழப்பட்டது. இதனால்தான் சட்டமன்ற எதிர்க்கட்சி தலைவர் பதவி, அதிமுகவின் ஒருங்கிணைப்பாளராக இருந்தும், ஓபிஎஸ்-சால் கைப்பற்ற முடியாமல், எடப்பாடி வசம் சென்றது.

இந்த நிலையில்தான் சட்டமன்ற பட்ஜெட் கூட்டத்தொடரிலும், திமுக ஆட்சியையும், கலைஞர் ஆட்சியையும் ஓபிஎஸ் புகழ்ந்ததும், அதிமுகவுக்கும் சலசலப்பை ஏற்படுத்தியது. அதே வேளையில் எடப்பாடிக்கு நெருக்கமான முன்னாள் அமைச்சர்கள் தொடர்ந்து லஞ்ச ஒழிப்பு காவல்துறையினரால் அடுத்தடுத்து ரெய்டு நடத்தப்பட்டு வருவதும், திமுக அரசுமீது ஓபிஎஸ் காண்பிக்கும் மென்மையான போக்கும் அதிமுகவினரிடையே அதிருப்தியை உருவாகி உள்ளது.

சசிகலா, ஓபிஎஸ் இருவரும் ஜாதிய ரிதியிலாக ஒரே இனத்தைச் சேர்ந்தவர்கள் என்பதால், சசிகலாவால் மிரட்டப்பட்ட ஓபிஎஸ் மீண்டும் சசிகலாவிடமே சரணடைய இருப்பதாக கூறப்படுகிறது. மேலும், பாஜக மேலிடத்தில் இருந்து சசிகலாவுடன் இணைந்து பணியாற்ற ஓபிஎஸ், இபிஎஸ் வசம் வலியுறுத்தி வருவதாகவும் கூறப்படுகிறது. ஆனால், சசிகலாவை மீண்டும் கட்சியில் இணைக்க எடப்பாடி சம்மதம் தெரிவிக்காத நிலையில், ஓபிஎஸ் தரப்பில் திட்டவட்டமான பதில் ஏதும் தெரிவிக்கவில்லை என்று கூறப்படுகிறது. இது ஜாதி ரீதியிலான பாசம் என்று விமர்சிக்கப்படுகிறது.

அதுபோல, கடந்த சில மாதங்களுக்கு முன்பு  ஓ.பன்னீர்செல்வத்தின் மனைவி விஜயலட்சுமி மாரடைப்பால் மருத்துவமனையில் இறந்தபோதும், செய்தியறிந்த சசிகலா, உடனே பெருங்குடியில் உள்ள தனியார் மருத்துவமனைக்கு விரைந்து வந்து ஓபிஎஸ் கைகளை பற்றி  ஆறுதல் கூறினார்.  சிறிது நேரம் அவரது அருகில் அமர்ந்து, அவரை தேற்றினார். அப்போது ஓபிஎஸ் கண்கலங்கினார். தொடர்ந்து அவரது மனைவி விஜயலட்சுமியின் உடலுக்கு அஞ்சலி செலுத்தினார். இதுவும் அரசியல் விமர்சகர்களால்  உற்றுநோக்கப்பட்டது.

அதிமுக முழுமையாக ஓபிஎஸ், இபிஎஸ் ஆகிய இரட்டை தலைமையின்கீழ் செயல்பட்டு வந்தாலும்,   சசிகலா இன்னும் அதிமுக பொதுச்செயலாளர் என்று கூறிக்கொண்டும், அதிமுக கொடி கட்சி காரில்தான் பயணம் செய்து வருகிறார். கட்சி கொடி ஏற்றியும், கல்வெட்டுக்களையும் திறந்து வைத்து வருகிறார். இதற்கு உத்தட்டளவில் எதிர்ப்பு தெரிவித்து வரும் ஓபிஎஸ், கட்சியின் ஒருங்கிணைப்பாளர் என்ற முறையில், சசிகலா அதிமுக பெயரை பயன்படுத்த தடை விதிப்பது தொடர்பாக சட்டரீதியாக நடவடிக்கை எடுப்பதிலும் தயக்கம் காட்டி வருவதாக கூறப்படுகிறது.

ஏற்கனவே சசிகலா உடல்நிலை பாதிக்கப்பட்ட நிலையில், ஓபிஎஸ்சின் 2வது மகன் சசிகலா விரைவில் குணமடைய பிரார்த்தப்பதாக கூறி பரபரப்பை ஏற்படுத்திய நிலையில், அதிமுக பொன்விழா ஆண்டு தொடக்க நாளில், சசிகலா எம்ஜிஆர், ஜெயலலிதா சமாதிக்கு சென்று அஞ்சலி செலுத்தியபோது, அவருக்கு ஆதரவாக தமிழகம் முழுவதும் இருந்து திரண்ட சசிகலா ஆதரவாளர்களும், அதிமுக சசிகலா தலைமையில் ஒன்றிணைய வேண்டும் என்று வலியுறுத்தி உள்ளனர்.

இந்த நிலையில், தேவர் குருபூஜையை முன்னிட்டு, இன்று செய்தியாளர்களை சந்தித்த ஓபிஎஸ்,   சசிகலாவை கட்சியில் மீண்டும் இணைப்பது குறித்து  தலைமை கழகம் முடிவெடுக்கும் என கூறியிருப்பது சகிலா அதிமுகவுக்குள் வருவது  உறுதி என தெரிகிறது.

அதே வேளையில், அதிமுக முதுகில் ஏறி பயணம் செய்து வரும் பாஜகவும், தமிழ்நாட்டில்  தனது கட்சியின்  வளர்ச்சிக்கு மீண்டும் ஒருங்கிணைந்த அதிமுக தேவை என்பதை  மனதில் வைத்துக்கொண்டு, அதற்கான ரகசிய நடவடிக்கைகளையும் மேற்கொண்டு வருவதாக கூறப்படுகிறது.  சசிகலா எடப்பாடி ஓபிஎஸ் அமமுக கட்சிகளை ஒன்றிணைத்து, அதிமுகவை மீண்டும் பலம் பொருந்திய கட்சியாக மாற்றி, அதைக்கொண்டு தமிழ்நாட்டில் காரியம் சாதிக்க முயற்சி மேற்கொண்டுள்ளதாகவும் கமலாய வட்டார தகவல்கள் கூறுகின்றன.

தமிழக அரசியல் களத்தில் சசிகலா மீண்டும் என்ட்ரி கொடுக்கும் நேரம் பரபரப்பையும், சலசலப்பையும் உருவாக்கும் என நம்பப்படுகிறது.

சசிகலா நலம் பெற வாழ்த்து தெரிவித்த ஓபிஎஸ் மகன்: கட்சியில் இருந்து அதிமுக தலைமை நீக்குமா..?