சேலம் மாவட்டம் சர்வதேச தரத்திற்கு உயர்த்தப்படும்: ஜவ்வரிசி உற்பத்தியாளர்களுடனான கலந்துரையாடலில் முதல்வர் மு.க.ஸ்டாலின் உறுதி…

Must read

சேலம்: சேலம் மாவட்டம் சர்வதேச தரத்திற்கு உயர்த்தப்பட தமிழகஅரசு நடவடிக்கை எடுக்கும் என ஜவ்வரிசி உற்பத்தியாளர்களு;ள மற்றும் விவசாயிகளுடனான கலந்துரையாடலில் முதல்வர் மு.க.ஸ்டாலின் உறுதி அளித்தார்.

சேலத்தில் இன்று ஆய்வு செய்து வரும் முதலமைச்சர் மு.க.ஸ்டாலின், சேலம் வாழப்பாடியில் வரும் முன் காப்போம் மருத்துவ திட்டத்தை மீண்டும் தொடங்கி வைத்து பயனர்களுக்கு பல்வேறு நலத்திட்டங்களை வழங்கினார்.

தொடர்ந்து, சேலம் மாவட்டம், ஆத்தூரில் நடைபெற்ற நிகழ்ச்சியில், போக்குவரத்துத் துறை சார்பில் ரூ. 3 கோடி மதிப்பீட்டில் கட்டப்பட்டுள்ள ஆத்தூர் வட்டார போக்குவரத்து அலுவலகக் கட்டடத்தை முதலமைச்சர் மு.க.ஸ்டாலின் திறந்து வைத்தார். மேலும் ஆத்தூரில் நடைபெற்ற நிகழ்ச்சியில் ரூ.31.99 கோடி மதிப்பீட்டிலான முடிவுற்ற பணிகளை திறந்து வைத்து, ரூ.23.28 கோடி மதிப்பீட்டிலான புதிய திட்டப் பணிகளுக்கு அடிக்கல் நாட்டினார்.

அதையடுத்து, ஆத்தூரில்  இயங்கி வரும்  அதிநவீன ஜவ்வரிசி ஆலையை நேரில் பார்வையிட்டு ஆய்வு செய்தார். பின்னர், அங்கு  மரவள்ளிக்கிழங்கு விவசாயிகள், ஜவ்வரிசி ஆலை பிரதிநிதிகளுடன் முதல்வர் ஸ்டாலின் கலந்துரையாடினார்.

சேலம் மாவட்டத்தில் 11 ஆயிரம் ஹெக்டேர் பரப்பளவில் மரவள்ளிக்கிழங்கு சாகுபடி செய்யப்படுகிறது. ஜவ்வரிசி உற்பத்தியாளர்களின் கோரிக்கைகள் நிறை வேற்றப்படும் என்று முதல்வர் உறுதி அளித்துள்ளார். 55ஆயிரம் பேருக்கு வேலைவாய்ப்பு வழங்கும் வகையில் தொழில் முதலீடுகள் கையெழுத்தாகியுள்ளன. ஜவ்வரிசியில் கலப்படத்தை தடுக்க தனிக்குழு அமைக்கப்படும் என்று முதல்வர் அறிவித்துள்ளார்.

இந்த நிகழ்ச்சியில் மு.க.ஸ்டாலின் பேசியதாவது,

கடந்த நான்கு மாத கால திமுக ஆட்சியில் தேர்தலின் போது அளிக்கப்பட்ட 200க்கும் மேற்பட்ட வாக்குறுதிகளை நிறைவேற்றி முடிக்கப்பட்டுள்ளன. மக்களின் கருத்தை கேட்டு உணர்வுகளை புரிந்து ஆட்சி நடைபெற்று வருகிறது. மக்களின் உணர்வு பெற்ற ஆட்சி நடத்தப்பட வேண்டும் என்பதை இன்றைய ஆட்சியின் மிக முக்கியமான கொள்கையாக உள்ளது.

இந்தியாவில் வேறு எங்கும் இல்லாத அளவில் வேளாண் துறைக்கு தனி நிதிநிலை அறிக்கை தாக்கல் செய்யப்பட்டது. அதற்கு முன்னதாக பல்வேறு தரப்பினரையும் மாவட்ட, மாவட்டமாக சென்று சந்தித்து கலந்து பேசி அதற்கு பிறகுதான் நிதிநிலை அறிக்கை தாக்கல் செய்யப்பட்டது. இதேபோல ஜவ்வரிசி உற்பத்தியாளர்கள் மற்றும் மரவள்ளி விவசாயிகளை கோரிக்கைகளை கேட்டு அவை நிச்சயம் நிறைவேற்றப்படும்.

ஜவ்வரிசி உற்பத்தியாளர்களுக்கு புதிய சேமிப்பு கிடங்கு ஜவ்வரிசியை உணவு பொருளாக பயன்படுத்துவது தொடர்பாக பொதுமக்களிடையே விழிப்புணர்வு ஏற்படுத்துவது போன்ற கோரிக்கைகள் நிறைவேற்றப்படுவதுடன் ஜவ்வரிசியில் கலப்படத்தை தடுக்க குழு அமைக்கப்படும். பொதுமக்களுக்கு நியாயமான விலையில் ஜவ்வரிசி கிடைக்க நடவடிக்கை எடுப்பது உள்ளிட்ட அனைத்து கோரிக்கைகளும் படிப்படியாக நிறைவேற்றப்படும் என்று கூறினார்.

திமுக ஆட்சி பொறுப்புக்கு வந்த நான்கு மாதத்தில் தமிழகத்தில் தொழில்துறை புத்துணர்வு அடைந்துள்ளதாக குறிப்பிட்ட முதல்வர் மு.க.ஸ்டாலின், தெற்காசிய அளவில் தொழில் தொடங்க உகந்த மாநிலமாக தமிழகத்தை மாற்றிடும் வகையில் புதிய தொழில் கொள்கை வெளியிடப்பட்டுள்ளதாகவும், புதிய தொழில்களை ஈர்க்கும் வகையில் உள் கட்டமைப்புகளை மேம்படுத்த 35 நிறுவனங்களுடன் புரிந்துணர்வு ஒப்பந்தம் 17 ஆயிரத்து 149 கோடி ரூபாய் மதிப்பில் போடப்பட்டு முதலீடுகள் ஈர்க்கப்பட்டுள்ளதாகவும் இதன்மூலம் 55 ஆயிரம் பேருக்கு வேலைவாய்ப்பு கிடைத்துள்ளதாகவும் முதல்வர் தெரிவித்தார்.

இந்திய அளவில் தொழில் வளர்ச்சியில் தமிழ்நாடு மூன்றாவது பெரிய மாநிலமாக இருப்பதை குறிப்பிட்ட முதல்வர் தமிழ்நாட்டினை முதலிடத்திற்கு கொண்டு செல்லும் வகையில் ஏற்றுமதிக் கொள்கை அமைக்கப்படும். திருப்பூர், மதுரை, கோவை உள்ளிட்ட 10 ஏற்றுமதி மையங்கள் மேம்படுத்தப்படும். நகரம், கிராமம் வேறுபாடின்றி பெருந்தொழில், சிறுதொழில் பேதமின்றி தொழில் கொள்கை வடிவமைக்கப்பட வேண்டும். தொழிலதிபர்கள் அரசுக்கு முழு ஒத்துழைப்பு நல்க வேண்டும்  என வலியுறுத்தியதுடன்,   ஜவ்வரிசி உற்பத்தியில் பெயர்பெற்று விளங்கும் சேலம் மாவட்டத்தை சர்வதேச தரத்தில் உயர்த்த தேவையான நடவடிக்கை எடுக்கப்படும் என்றும் முதல்வர் மு.க.ஸ்டாலின் கூறினார்.

More articles

Latest article