நாளை நடைபெறுகிறது போரூர் – வடபழனி மெட்ரோ சோதனை ஓட்டம்….

சென்னை:   சென்னை போரூர் – வடபழனி மெட்ரோ சோதனை ஓட்டம் ஜனவரி 11ந்தேதி (நாளை) நடைபெறும் என சிஎம்ஆர்எல் அறிவிப்பு வெளியிட்டு உள்ளது. இந்த வழித்தடத்தில்  நேற்று (டிசம்பர் 9ங்தேதி)  அன்று சோதனை ஓட்டம் நடத்த திட்டமிட்டிருந்த நிலையில், பணிகள் இன்னும் முழுமையாக முடிவடையாததால்  நாளைக்கு ஒத்தி வைக்கப்பட்டு உள்ளது.

இதற்கிடையில், பூவிருந்தவல்லி – போரூர் மெட்ரோ ரயில் சேவைக்கு ரயில்வே வாரியம் தற்காலிக பாதுகாப்பு சான்றிதழ் வழங்கி உள்ளது.

இந்த வழித்தடத்தில் மேல்நிலை மின்மயமாக்கல் பணிகள் மற்றும் மின் இழுவிசை தொடர்பான ஆரம்பகட்ட சோதனைகள் முழுமையாக நிறைவடையாததால், தேதி மாற்றம் செய்யப்பட்டதாகவும், மெட்ரோ ரயில் பாதையில் நடத்தப்படும் இந்த சோதனை ஓட்டங்கள், பயணிகள் பாதுகாப்பு மற்றும் ரயில் சேவையின் நம்பகத்தன்மையை உறுதி செய்வதில் மிக முக்கிய பங்கு வகிக்கின்றன  என்று  சென்னை மெட்ரோ ரயில்வே கூறியுள்ளது.

சென்னை மெட்ரோ இரண்டாம் கட்ட திட்டத்தின் ஒரு பகுதியாக அமைக்கப்பட்டுள்ள இந்த வழித்தடம், பொன்னேரி முதல் வடபழனி வரை போரூர் வழியாக செல்கிறது. இந்த வழித்தடத்தில் அடுத்த மாதம் முதல் பயணிகள் சேவையை தொடங்க மெட்ரோ நிர்வாகம் திட்டமிட்டுள்ளது. அதற்கு முன்பாக, ரயில்கள் பாதுகாப்பாகவும் சீராகவும் இயங்குவதை உறுதி செய்ய பல்வேறு கட்டங்களாக சோதனை ஓட்டங்கள் நடத்தப்பட்டு வருகின்றன. இதில் மின் விநியோகம், சிக்னல் அமைப்புகள், ரயில் இயக்கக் கட்டுப்பாடு, அவசரகால நடைமுறைகள் உள்ளிட்ட அம்சங்கள் தீவிரமாக பரிசோதிக்கப்படுகின்றன.

சென்னை மெட்ரோ இரண்டாம் கட்ட திட்டம் மொத்தம் 118.9 கிலோமீட்டர் நீளத்தில் அமைக்கப்பட்டு வருகிறது. இதில் மூன்று முக்கிய வழித்தடங்கள் உள்ளன. வழித்தடம் 3 – மாதவரம் முதல் SIPCOT வரை, வழித்தடம் 4 – பொன்னேரி முதல் கலங்கரை விளக்கம் வரை, மற்றும் வழித்தடம் 5 – மாதவரம் முதல் சோழிங்கநல்லூர் வரை என திட்டமிடப்பட்டுள்ளது. இதில், வழித்தடம் 4-ன் ஒரு பகுதியாக பொன்னேரி முதல் வடபழனி வரை சுமார் 15.8 கிலோமீட்டர் தூரத்திற்கு முதற்கட்டமாக பயணிகள் சேவையை தொடங்க மெட்ரோ நிர்வாகம் முடிவு செய்துள்ளது. குறிப்பிடத்தக்கது என்னவென்றால், கடந்த ஆண்டே பொன்னேரி முதல் போரூர் வரை சோதனை ஓட்டம் வெற்றிகரமாக நடத்தப்பட்டிருந்தது.

இதுகுறித்து மெட்ரோ அதிகாரி ஒருவர் கூறுகையில், “மேல்நிலை மின்மயமாக்கல் பணிகள் முழு வீச்சில் நடைபெற்றுக் கொண்டிருந்தன. அவை மாலை 5 மணிக்குள் முடியும் என எதிர்பார்த்தோம். அதன் பின்னர் சோதனை ஓட்டத்தை தொடங்க திட்டமிட்டிருந்தோம். ஆனால் ஆரம்பகட்ட மின் இழுவிசை சோதனைகள் மற்றும் மின்மயமாக்கல் பணிகளை முடிக்க இன்னும் சில மணி நேரங்கள் தேவைப்பட்டன. இந்த பணிகள் சனிக்கிழமையும் தொடரும். அதனைத் தொடர்ந்து ஞாயிற்றுக்கிழமை காலை சுமார் 11 மணியளவில் ரயில் சோதனை ஓட்டம் நடைபெறும்,” என்று தெரிவித்தார்.

ஜனவரி 11-ஆம் தேதி நடைபெறும் சோதனை ஓட்டம், கீழ்நோக்கிய பாதையில் (downward track line) மட்டுமே நடத்தப்பட உள்ளது. மேல்நோக்கிய பாதையில் (upward track line) மேல்நிலை மின்மயமாக்கல் பணிகள் இன்னும் முழுமையாக முடிவடையாததால், அந்த பாதையில் தற்போது சோதனை ஓட்டம் நடத்த இயலாது என CMRL அதிகாரிகள் தெரிவித்துள்ளனர். இருப்பினும், ஜனவரி 14-ஆம் தேதி மேல்நோக்கிய பாதையிலும் சோதனை ஓட்டத்தை விரிவுபடுத்த திட்டமிடப்பட்டுள்ளதாக கூறப்படுகிறது.

ஆனால், சில தொழில்நுட்ப வட்டார தகவல்களின்படி, மேல்நோக்கிய பாதையில் நடைபெற்று வரும் மின்மயமாக்கல் பணிகளை இன்னும் இரண்டு நாட்களில் முடிப்பது சவாலானதாக இருக்கும் என்றும், அதற்கு குறைந்தது ஒரு வார காலம் தேவைப்படலாம் என்றும் தெரிவிக்கப்படுகிறது. இதனால், மேல்நோக்கிய பாதையின் சோதனை ஓட்டத்தில் மேலும் தாமதம் ஏற்பட வாய்ப்புள்ளதாகவும் கூறப்படுகிறது.

மெட்ரோ ரயில் பாதையில் நடத்தப்படும் இந்த சோதனை ஓட்டங்கள், பயணிகள் பாதுகாப்பு மற்றும் ரயில் சேவையின் நம்பகத்தன்மையை உறுதி செய்வதில் மிக முக்கிய பங்கு வகிக்கின்றன. மின்சார விநியோகத்தின் நிலைத்தன்மை, சிக்னல் மற்றும் தகவல் தொடர்பு அமைப்புகளின் துல்லியம், ரயில் கட்டுப்பாட்டு மையத்தின் செயல்பாடு, அவசரகாலத்தில் மேற்கொள்ளப்படும் நடவடிக்கைகள் போன்றவை இந்த சோதனைகளின் போது விரிவாக ஆய்வு செய்யப்படுகின்றன.

பொதுமக்கள் பயன்பாட்டுக்கு மெட்ரோ ரயில் சேவையை திறக்கும் முன், அனைத்து சோதனை ஓட்டங்களும் வெற்றிகரமாக நிறைவடைவதும், பாதுகாப்பு தரநிலைகள் முழுமையாக பூர்த்தி செய்யப்படுவதும் அவசியம் என மெட்ரோ நிர்வாகம் வலியுறுத்தியுள்ளது. இந்த சோதனைகள் முடிவடைந்த பிறகு, போரூர் – வடபழனி வழித்தடத்தில் பயணிகள் பாதுகாப்பான, விரைவான மற்றும் நம்பகமான மெட்ரோ பயண அனுபவத்தை பெற முடியும் என எதிர்பார்க்கப்படுகிறது.

இதற்கிடையில், பூவிருந்தவல்லி – போரூர் மெட்ரோ ரயில் சேவைக்கு தற்காலிக பாதுகாப்பு சான்றிதழ் வழங்கப்பட்டுள்ளது.