பெண்மையை மதியுங்கள்: ஏளனக்காரர்களை விளாசினார் விராத்கோலி

அனுஷ்கா ஷர்மாவுக்கும் விராட் கோலிக்கும் இடையிலான காதல் மிகவும் பரபரப்பாக பேசப்பட்ட ஒரு விஷயம்.  பிரபலங்களுக்கிடையிலான காதல் பிரபலமாகப் பேசப்படுவதில் ஆச்சர்யம் இல்லை. 
இதற்கிடையில், கோலி நன்றாக சோபிக்கத் தவறிய ஆட்டங்களில், அனுஷ்கா ஷர்மாவை காரணம் காட்டி மக்கள் கேலியும் கிண்டலும் செய்தனர். மேலும், கோலியின் தோல்விக்கு அனுஷ்காவை ஏளனம் செய்து ஏசத் தொடங்கினர்.
ஆனால் சமீபத்தில் அவர்கள் இருவரும் சொந்த விருப்பு வெறுப்பு காரணமாக அவர்களது காதலை முறித்துக் கொண்டனர்.

அனுஸ்காவை கிண்டலடித்த படங்களில் ஒன்று

வாழ்க்கையில் இருவரும் பல காரணங்களுக்காக வெவ்வேறு பாதையை தேர்ந்தெடுத்து பிரிந்து சென்றிருந்தாலும் அனுஷ்காவை வெறுப்பவர்களுக்கெதிராக குரல் எழுப்பி விராட் நிஜ வாழ்கையிலும் ஹீரோவாக எல்லோர் மனதையும் கவர்ந்துள்ளார்.
“பல நாட்களாக அனுஷ்காவின் மேல் வன்மம் வளர்த்த பலரும் தற்போது நடக்கும் அனைத்து கெட்ட விஷயங்களும் அவரை காரணம் காட்டி வருகின்றனர். படித்தவர்கள் என போற்றிக்கொள்ளும் அவர்களைக் கண்டு நான் வெட்கப்படுகிறேன். என் விளையாட்டில் நான் செய்யும் தவறுகளுக்கு அவரை குறை கூறி ஏளனம் செய்யும் ஈனப்பிறவிகளுக்கு நான் கூற விரும்புவது, இதுவரையிலும் அனுஷ்கா என்னை உற்சாகப்படுத்தி நம்பிக்கையூட்டினார். எனக்கு ஏற்படும் பாதிப்புகளுக்கு நானே பொறுப்பு. ஆகையால் அனுஷ்காவின் மேல் கோபப்படாமல் இரக்கம் காட்டி அவருக்கு மதிப்பளியுங்கள். உங்களுடைய சகோதரியையோ காதலியையோ மனைவியையோ எவரேனும் பொதுவில் இப்படி கேலியும் கிண்டலும் செய்தால் தங்களால்  தாங்க முடியுமா” என்று கோலி நெருப்பைக் கக்கியுள்ளார்.