இ.வி.கணேஷ்பாபு நடித்து, இயக்கி தயாரித்துள்ள படம், ‘கட்டில்’.
நடிகர், இயக்குநர், கவிஞர் எனப் பன்முகப் பரிமாணங்கள் கொண்டவர், கட்டில் பட இயக்குநர் இ.வி.கணேஷ்பாபு. ‘ஆட்டோகிராஃப்’, ‘கற்றது தமிழ்’, ‘சிவகாசி’, ‘அறை எண் 305-ல் கடவுள்’, ‘ஆனந்தபுரத்து வீடு’,‘மொழி’ உள்ளிட்ட 50க்கும் மேற்பட்ட படங்களில் துணைக் கதாபாத்திரங்களில் நடித்துள்ளார். தொலைக்காட்சி நெடுந்தொடர்களிலும் தனித்துவப் பாணியில் முத்திரை பதித்துள்ளார்.
சத்யா, ஸ்ரீரம்யா, வினோதினி, ஆடுகளம் நரேன் நடிப்பில் ‘யமுனா’ திரைப்படத்தின் மூலம் இயக்குநராக அறிமுகம் ஆனார் இ.வி.கணேஷ்பாபு.
எடிட்டர் பி.லெனின் கதை, திரைக்கதை, வசனம் எழுத ‘கட்டில்’ படத்தை இயக்கி ஹீரோவாகவும் நடித்து தயாரித்துள்ளார். சிருஷ்டி டாங்கே கதாநாயகியாக நடித்துள்ளார். ஓவியர் ஷ்யாம், எழுத்தாளர் இந்திரா சௌந்தர்ராஜன், இயக்குநர் கே.பாலசந்தரின் மருமகள் கீதா கைலாசம் ஆகியோர் முக்கியக் கதாபாத்திரங்களில் நடித்துள்ளனர்.
‘கட்டில்’ திரைப்படம் பல்வேறு சர்வதேசத் திரைப்பட விழாக்களில் திரையிடப்பட்டதோடு, மேலும் பல சர்வதேச திரைப்பட விழாக்களில் திரையிட தேர்வாகி உள்ளது.
இந்நிலையில் படத்துக்கு இசை அமைத்திருக்கும் ஸ்ரீகாந்த் தேவா, பாடல் எழுதியிருக்கும் வைரமுத்து, இயக்கியிருக்கும் இ.வி.கணேஷ்பாபு மூவரும் இணைந்து பாடல் உருவாக்கத்தில் ஈடுபட்ட வீடியோ வரும் 22ம் தேதி வெளியாகிறது.
இது ரசிகர்களிடையே மேலும் எதிர்பார்ப்பை கூட்டி இருக்கிறது.