சென்னை: விசிக முன்னாள் எம்எல்ஏ பனையூர் பாபு கட்சியில் விடுதலை சிறுத்தைகள் கட்சியில் இருந்து விலகினார். அதிகார போதையில் தவெகவில் இணைந்துள்ள விசிகவின் நிலையை கண்டித்து, கட்சியில் இருந்து விலகி உள்ளார். இது பரபரப்பை ஏற்படுத்தி உள்ளது.
பல ஆண்டுகளாக திமுக கூட்டணியில் தொடர்ந்து வந்த விசிக, நடைபெற்று முடிந்த சட்டமன்ற தேர்தலிலும் திமுக கூட்டணியில் போட்டியிட்டு இரு தொகுதிகளை வென்ற நிலையில், தற்போது தவெகவுக்கு ஆதரவு வழங்கி ஆட்சி அதிகாரத்திலும் இடம்பிடித்துள்ளது. தவெகவை கடுமையாக சாடிய திருமா , வன்னியரசு உள்பட விசிக தலைவர்கள், தற்போது, அதே தவெகவில் அரசியல் லாபத்துக்காக விலைபோயுள்ளது சமூக வலைதளங்களில் விமர்சனங்களை ஏற்படுத்தி உள்ளது.
இதனால் பல விசிக தலைவர்கள், தங்களது அதிருப்தியை விசிக தலைமைக்கு தெரிவித்து வரும் நிலையில், முன்னாள் எம்எல்ஏ பனையூர் பாபு, அக்கட்சியில் இருந்து விலகுவதாக அறிவித்துள்ளார்.
இதுதொடர்பாக விசிக முன்னாள் எம்எல்ஏ பனையூர் பாபு வெளியிட்டுள்ள அறிக்கையில், “விசில் அடிப்பவர்கள் எல்லாம் திரையரங்கத்திற்குத்தான் செல்ல வேண்டும், சட்டமன்றத்திற்கு வரக் கூடாது; அவர்கள் பெரியாரும் அம்பேத்கரும் பேசிய அரசியலையும், கொள்கைகளையும் வீழ்த்துவதற்கு வந்தவர்கள்” என்று சூளுரைத்தவர்,
இன்று அவர்களுடனே கைகோர்க்கவும், இயக்கத்தின் கொள்கையை மழுங்கடிக்கவும் முற்படுவது முரண்பாட்டின் உச்சமாகும். ஆட்சி அதிகாரங்கள் வரும், போகும்; அது நிலையற்றது. ஆனால், அய்யா பெரியாரும் அண்ணல் அம்பேத்கரும் நமக்கு வகுத்துத் தந்த கொள்கைகளே என்றென்றும் வாழும் நிலையான ஆயுதங்கள்.
அரசியல் தளத்தில், “மக்கள் சித்தாந்தங்களை விடக் கவர்ச்சியின் பின்னால் ஈர்க்கப்படுவது ஆபத்தானது” என்று புரட்சியாளர் அம்பேத்கர் அவர்கள் கடுமையாக எச்சரித்துள்ளார்.
ஆனால் இன்று அந்த அபாயகரமான திசையில்தான் பயணித்துக் கொண்டிருக்கிறோமோ என அஞ்சுகிறேன்.
கொண்ட கொள்கையிலும், எடுக்கும் நிலைப்பாட்டிலும் உறுதியாக இல்லாமல், அடிக்கடி நிலைப்பாடுகளை மாற்றி, குழப்பத்திலும் அவநம்பிக்கையிலும் செயல்படும் ஒரு தலைமையின் கீழ் இனியும் என்னால் பயணிக்க இயலாது என எனது மனசாட்சி உணர்த்துகிறது.
எனவே, விடுதலைச் சிறுத்தைகள் கட்சியிலிருந்தும், அடிப்படை உறுப்பினர் பொறுப்பிலிருந்தும் முழுமையாக விலகுகிறேன் என்ற எனது முடிவைக் கனத்த இதயத்தோடு தெரிவித்துக் கொள்கிறேன்”‘
இவ்வாறு குறிப்பிட்டுள்ளார்.
[youtube-feed feed=1]