தீபாவளி பண்டிகையையொட்டி இன்று முதல் சனிக்கிழமை வரை கூடுதல் மெட்ரோ சேவை இயக்கப்படும் என சென்னை மெட்ரோ ரயில் நிர்வாகம் அறிவித்து உள்ளது. பொதுமக்களின் வசதிக்காக இன்று முதல் அடுத்த 3 நாட்களுக்கு மெட்ரோ இரயில் சேவையின் நேரம் நீட்டிக்கப்பட்டுள்ளதாக அறிவிக்கப்பட்டுள்ளது.
வரும் 12ந்தேதி தீபாவளி பண்டிகை கொண்டாடப்பட உள்ள நிலையில், தமிழ்நாடு அரசு சொந்த ஊர் செல்லும் பொதுமக்களின் வசதிக்காக சென்னை உள்பட முக்கிய நகரங்களில் இருந்து சிறப்பு பேருந்துகளை இயக்குகிறது. அதுபோல தெற்கு ரயில்வேயும் சிறப்பு ரயில்களை அறிவித்து உள்ளது.
இந்த நிலையில், சென்னையில் பொதுமக்களின் வசதிக்காக மெட்ரோ ரயில் நிர்வாகம் கூடுதல் சேவைகளை இயக்குவதாக அறிவித்து உள்ளது. இது தொடர்பாக வெளியிட்டுள்ள அறிக்கையின்படி, தீபாவளி தொடர் விடுமுறையை முன்னிட்டு சொந்த ஊருக்கு செல்லும் மெட்ரோ இரயில் பயணிகளின் வசதிகாக மாலை நெரிசல்மிகு நேரத்தில் இயக்கப்பட்டு வரும் மெட்ரோ இரயில் சேவை, 9,10,11 ஆகிய தேதிகளில் இரவு 10:00 மணி வரை நீட்டிக்கப்பட்டுள்ளதாக அரவிக்கப்பட்டுள்ளது.
மேலும், நீட்டிக்கப்பட்ட நேரங்களில், இரவு 8:00 மணி முதல் 10:00 மணி வரை மெட்ரோ இரயில் சேவைகள் இரண்டு வழித்தடங்களிலும் 9 நிமிட இடைவெளிக்கு பதிலாக 5 நிமிட இடைவெளியில் இயக்கப்படும் என தெரிவிக்கப்பட்டுள்ளது.
இந்நிலையில், போக்குவரத்து நெரிசல் மற்றும் சிரமம் இல்லாத பயணத்தை மேற்கொள்ள பயணிகள் மெட்ரோ இரயில் சேவையை பயன்படுத்திக் கொள்ளுமாறு மெட்ரோ ரயில்வே நிர்வாகம் அறிவுறித்தியுள்ளது.
குறிப்பாக, இந்த மெட்ரோ இரயில் நீட்டிப்பு சேவை 09.11.2023 (வியாழக்கிழமை), 10.11.2023 (வெள்ளிக்கிழமை) மற்றும் 11:11:2023 (சனிக்கிழமை) ஆகிய மூன்று நாட்களுக்கு மட்டுமே என்று சென்னை மெட்ரோ ரயில்வே நிறுவனம் வெளியிட்டுள்ள அறிக்கையில் குறிப்பிடப்பட்டுள்ளது.