காவிரி விவகாரம்: தமிழ்நாட்டுக்கு தண்ணீர் திறக்க மாட்டோம்… ஆணைய உத்தரவுக்கு கர்நாடகா அரசு எதிர்ப்பு

ஆணையத் தலைவர் எஸ்.கே. ஹல்தார் தலைமையில் நடைபெற்ற கூட்டத்தில், காவிரி நீர் ஒழுங்குமுறை குழுவின் பரிந்துரை ஏற்கப்பட்டது. இதை எதிர்த்து கர்நாடக அரசு தாக்கல் செய்த மேல்முறையீட்டை ஆணையம் நிராகரித்தது.

இதனால், கர்நாடகா அடுத்த 15 நாட்களுக்கு மொத்தம் 4.5 டி.எம்.சி. தண்ணீரை தமிழ்நாட்டுக்கு திறந்துவிட வேண்டிய நிலை ஏற்பட்டுள்ளது. இந்த உத்தரவு ஜூலை 29 முதல் அமலுக்கு வந்திருக்க வேண்டும் என்றும் தெரிவிக்கப்பட்டுள்ளது.

அனைத்துக் கட்சி கூட்டம்

அடுத்தகட்ட நடவடிக்கை குறித்து ஆலோசிக்க கர்நாடக அரசு ஆகஸ்ட் 2-ஆம் தேதி அனைத்துக் கட்சி கூட்டத்தை கூட்டியுள்ளது. அந்தக் கூட்டம் நடைபெறும் வரை தமிழ்நாட்டுக்கு தண்ணீர் திறக்க வேண்டாம் என்று அரசு முடிவு செய்துள்ளது.

காவிரி தீர்ப்பாயத் தீர்ப்பை அடிப்படையாகக் கொண்டு அமைக்கப்பட்ட காவிரி நீர் மேலாண்மை ஆணையத்தின் உத்தரவுகளில் உச்சநீதிமன்றம் தலையிடாது என்று ஏற்கனவே தெளிவுபடுத்தியுள்ளதால், கர்நாடக அரசு மீண்டும் உச்சநீதிமன்றத்தை அணுகுவதற்கான வாய்ப்பு குறைவாக இருப்பதாக கூறப்படுகிறது.

ஆணையம் கூறிய காரணம்

கர்நாடக அதிகாரிகள் மற்றும் தமிழ்நாடு அதிகாரிகளின் வாதங்களை கேட்ட ஆணையம், தற்போது கர்நாடகாவின் 4 முக்கிய அணைகளில் 55 டி.எம்.சி. தண்ணீர் இருப்பதாகவும், வரும் நாட்களில் மழை பெய்யும் வாய்ப்பும் உள்ளதாகவும் தெரிவித்தது.

மேலும், தினமும் 1 முதல் 2 டி.எம்.சி. வரை நீர்வரத்து இருக்கும் என மதிப்பிடப்பட்டுள்ளதால், விரைவில் அணைகளில் 60 முதல் 70 டி.எம்.சி. வரை தண்ணீர் இருக்கும். எனவே, ஒழுங்குமுறை குழுவின் பரிந்துரையை கர்நாடக அரசு பின்பற்ற வேண்டும் என்று ஆணையம் கூறியுள்ளது.

அதே நேரத்தில், கர்நாடகாவில் மழை குறைவு மற்றும் வறட்சி நிலையை கருத்தில் கொண்டே குறைந்த அளவு தண்ணீர் திறக்க பரிந்துரைக்கப்பட்டுள்ளதாகவும் ஆணையம் விளக்கியுள்ளது.

கர்நாடக அரசின் வாதம்

இந்த ஆண்டு மாநிலத்தில் வழக்கத்தை விட 60 சதவீதம் குறைவாகவே மழை பெய்துள்ளது. அணைகளில் நீர் இருப்பு மிகவும் குறைவாக உள்ளது. தற்போது 4 அணைகளிலும் மொத்தம் 55 டி.எம்.சி. மட்டுமே தண்ணீர் உள்ளது.

அடுத்த 10 மாதங்களுக்கு குடிநீருக்கே 35 டி.எம்.சி. தண்ணீர் தேவைப்படும் நிலையில், குடிநீர் மற்றும் பாசனத் தேவைகளை பூர்த்தி செய்ய போதுமான நீர் இல்லை. தமிழ்நாட்டின் நிலை அதுபோல் இல்லை. எனவே இந்த சூழ்நிலையை கருத்தில் கொண்டு தண்ணீர் திறக்க உத்தரவிடக் கூடாது என்று கர்நாடக அரசு வலியுறுத்தியுள்ளது.

தமிழ்நாடு அரசின் வாதம்

உச்சநீதிமன்றத் தீர்ப்பின்படி கடந்த இரண்டு மாதங்களில் தமிழ்நாட்டுக்கு 40 டி.எம்.சி. தண்ணீர் வழங்கப்பட வேண்டிய நிலையில், இதுவரை 3 டி.எம்.சி. மட்டுமே வழங்கப்பட்டுள்ளது என்று தமிழ்நாடு அரசு தெரிவித்துள்ளது.

இதனால், மேட்டூர் அணைக்கு போதுமான நீர்வரத்து இல்லை. தற்போது அணையில் 40 டி.எம்.சி. மட்டுமே இருப்பதால், பாசனத்துக்காக தண்ணீர் திறக்க முடியாத நிலை ஏற்பட்டுள்ளது. வழக்கமாக ஜூன் 14-ஆம் தேதி திறக்க வேண்டிய மேட்டூர் அணை இன்னும் திறக்கப்படவில்லை.

எனவே, கர்நாடகா தினமும் 11,500 கியூசெக்ஸ் தண்ணீர் திறந்துவிட வேண்டும். அப்போதுதான் குறுவை சாகுபடிக்கு தண்ணீர் வழங்க முடியும். மேலும், நிலுவையில் உள்ள தண்ணீரையும் திறக்க ஆணையம் உத்தரவிட வேண்டும் என்று தமிழ்நாடு வலியுறுத்தியுள்ளது.

ஆகஸ்ட் 2-ல் அனைத்துக் கட்சி கூட்டம்

காவிரி விவகாரம் தொடர்பாக ஆகஸ்ட் 2-ஆம் தேதி பெங்களூருவில் உள்ள முதல்வரின் அதிகாரப்பூர்வ இல்லமான ‘கிருஷ்ணா’வில் அனைத்துக் கட்சி கூட்டம் நடைபெறும் என்று கர்நாடக துணை முதல்வர் டி.கே. சிவகுமார் தெரிவித்துள்ளார்.

இந்தக் கூட்டத்தில் முன்னாள் முதல்வர்கள், காவிரி நீர்ப்பிடிப்பு பகுதி எம்.பி.க்கள், எம்.எல்.ஏ.க்கள் உள்ளிட்டோர் பங்கேற்க அழைக்கப்பட்டுள்ளனர். காவிரி விவகாரத்தில் அடுத்தகட்டமாக என்ன நடவடிக்கை எடுக்க வேண்டும் என்பது குறித்து ஆலோசிக்கப்படும் என்றார்.

மேலும், மத்திய அமைச்சர்கள் பிரகலாத் ஜோஷி, வி. சோமண்ணா, எம்.பி.க்கள் ஜெகதீஷ் ஷெட்டர், முன்னாள் முதல்வர் பசவராஜ் பொம்மை உள்ளிட்டோருடனும் ஆலோசனை நடத்தியுள்ளதாக அவர் கூறினார்.

தமிழ்நாடு முதல்வர் ஜோசப் விஜய் குறித்து எழுப்பப்பட்ட கேள்விக்கு, “அந்த விவகாரம் குறித்து கருத்து தெரிவிக்க விரும்பவில்லை. மாநிலங்களுக்கு இடையே மோதல் ஏற்படக் கூடாது. சட்டத்தையும் பரஸ்பர மரியாதையையும் அனைவரும் கடைபிடிக்க வேண்டும்” என்று டி.கே. சிவகுமார் பதிலளித்தார்.

மேகதாது திட்ட டி.பி.ஆர். திருப்பி அனுப்பப்பட்டது

மேகதாதுவில் சமநிலை நீர்த்தேக்கம் அமைக்கும் திட்டத்திற்காக கர்நாடக அரசு தாக்கல் செய்த விரிவான திட்ட அறிக்கையை (DPR) மத்திய நீர்வள ஆணையம் திருப்பி அனுப்பியுள்ளது.

இதுகுறித்து கர்நாடக நீர்வளத் துறை அமைச்சர் ராமலிங்க ரெட்டி கூறுகையில், “டி.பி.ஆரில் சில திருத்தங்களைச் செய்யுமாறு மத்திய நீர்வள ஆணையம் தெரிவித்துள்ளது. தேவையான மாற்றங்களை செய்து மீண்டும் தாக்கல் செய்வோம். இது வழக்கமான நடைமுறையே” என்றார்.

கர்நாடக அரசு 2018-ஆம் ஆண்டு முதன்முறையாக மேகதாது திட்டத்தை முன்வைத்தது. பெங்களூரு மற்றும் சுற்றுப்புற பகுதிகளின் குடிநீர் தேவைக்காக கூடுதலாக 4.75 டி.எம்.சி. தண்ணீரை பயன்படுத்தும் வகையில் இந்தத் திட்டம் தயாரிக்கப்பட்டது.

பின்னர் திருத்தப்பட்ட டி.பி.ஆரில், பெங்களூரு குடிநீர் பயன்பாடு 4.75 டி.எம்.சி.யிலிருந்து 6.95 டி.எம்.சி. ஆக உயர்த்தப்பட்டதுடன், ‘சிவனசமுத்திரம் ரன் ஆஃப் ரிவர் பவர் திட்டமும்’ சேர்க்கப்பட்டது.

ஆனால், 2019-ல் தாக்கல் செய்யப்பட்ட முதன்மை அறிக்கையில் இந்த அம்சங்கள் இடம்பெறவில்லை என்றும், தற்போது கூடுதல் நீர் பயன்படுத்தும் வகையில் திட்டம் மாற்றப்பட்டிருப்பது காவிரி தீர்ப்பாயம் மற்றும் உச்சநீதிமன்றத் தீர்ப்புக்கு முரணானது என்றும் மத்திய நீர்வள ஆணையம் கருத்து தெரிவித்துள்ளது.