டிசம்பரில் அதிமுக பொதுக்குழு?

சென்னை: அதிமுகவில் முதல்வர் வேட்பாளர் பரபரப்பு ஓய்ந்துள்ள நிலையில்,  அ.தி.மு.க. பொதுக்குழு வருகிற டிசம்பர் மாதம் முதல் வாரத்தில் கூட்டப்பட இருப்பதாக அதிமுக வட்டாரத் தகவல்கள் தெரிவிக்கின்றன.

அதிமுக பொதுச்செயலாளரும், தமிழக முன்னாள் முதல்வருமான  ஜெயலலிதாவை மறைவைத்தொடர்ந்து, கடந்த 2016ம் ஆண்டு அதிமுக பொதுக்குழு கூட்டப் பட்டது. அதில், சசிகலா  அதிமுகவின் தற்காலிக பொதுச்செயலாளராக தேர்ந் தெடுக்கப்பட்டார். இதையடுத்து கட்சி இரண்டாக உடைந்தது. சசிகலா சிறைக்கு சென்றார். பின்னர் உடைந்த அதிமுக ஒட்டப்பட்டது. அதையடுத்து, , அதிமுக பொதுக்குழு கடந்த 2017ம் ஆண்டு  செப்டம்பர் 12ந்தேதி அன்று கூடியது.  அப்போது,  சிகலா பொதுச்செயலராக நியமனம் செய்யப்பட்டதை ரத்து செய்தும்,  டிடிவி தினகரன் உள்பட சசிகலா குடும்பத்தினரை அதிமுகவில் இருந்து நீக்கியும் அதிரடி நடவடிக்கை எடுக்கப்பட்டது.  பின்னர், கடந்த 2019ம் ஆண்டு நவம்பர் 21ந்தேதி அதிமுக செயற்குழு, பொதுக்குழு கூட்டம் நடைபெற்றது.

இந்த நிலையில் வரும் டிசம்பர் முதல்வாரத்தில் பொதுக்குழுவை கூட்ட திட்டமிடப்பட்டு வருவதாக கூறப்படுகிறது. அடுத்த ஆண்டு சட்டமன்ற தேர்தலை கருத்தில் கொண்டு, அனைத்து அரசியல் கட்சிகளும் கூட்டணி மற்றும் தேர்தல் வாக்குறுதிகள் தொடர்பாக ஆலோசனைகளை முன்னெடுத்து வரும் சூழலில், அதிமுகவிலும் அடுத்தக்கட்ட நடவடிக்கை குறித்து விவாதிக்க பொதுக்குழு கூட்டப்படும் என எதிர்பார்க்கப்படுகிறது.

அத்துடன்,  அ.தி.மு.க.வில் அமைக்கப்பட்டுள்ள வழிகாட்டு குழுவுக்கு அங்கீகாரம் வழங்குவது தொடர்பாக, பொதுக்குழுவில் தீர்மானம் நிறைவேற்றப்பட வேண்டியதும் அவசியமாக உள்ளது.

இதன் காரணமாக,  அ.தி.மு.க. பொதுக்குழுவை வருகிற டிசம்பர் மாதம் முதல் வாரம் அல்லது 2-வது வாரம் கூட்ட முடிவுசெய்யப்பட்டு இருப்பாக தகவல்கள் தெரிவிக்கின்றன.