சென்னையைத் தலைமையிடமாகக் கொண்டு செயல்பட்டு வரும் பிரபல உணவக நிறுவனமான அடையார் ஆனந்த பவன் (A2B), தனது பெரும்பான்மை பங்குகளை அமெரிக்காவைச் சேர்ந்த முதலீட்டு நிறுவனமான Bodhi Tree Systems-க்கு 180 மில்லியன் அமெரிக்க டாலருக்கு (சுமார் ரூ.1,600 கோடி) விற்பனை செய்துள்ளது. இதுதொடர்பான அறிவிப்பு நவம்பர் 12-ம் தேதி வெளியிடப்பட்டது.
முன்னாள் ஊடகத்துறை நிர்வாகிகளான ஜேம்ஸ் முர்டோக் மற்றும் உதய் சங்கர் ஆகியோரின் ஆதரவுடன் செயல்படும் Bodhi Tree Systems, A2B நிறுவனத்துடன் இணைந்து அதன் தொழிலை இந்தியா மட்டுமின்றி உலக அளவிலும் விரிவுபடுத்தத் திட்டமிட்டுள்ளது.
இந்திய உணவு வகைகளை உலக அளவில் கொண்டு செல்லும் சர்வதேச பிராண்டாக A2B-ஐ உருவாக்குவதே இந்தக் கூட்டணியின் முக்கிய நோக்கமாகும்.
சுமார் 50 ஆண்டுகளுக்கு முன்பு தொடங்கப்பட்ட A2B நிறுவனம், தற்போது இந்தியாவில் சுமார் 160 உணவகங்களையும், வெளிநாடுகளில் 30-க்கும் மேற்பட்ட உணவகங்களையும் நடத்தி வருகிறது.
இந்நிறுவனத்தில் 15,000-க்கும் அதிகமானோர் பணியாற்றி வருகின்றனர். குறிப்பாக தமிழ்நாடு, கர்நாடகா மாநிலங்களில் வலுவான வணிகத்தைக் கொண்டுள்ள இந்நிறுவனம், தென்னிந்திய உணவு வகைகள் மட்டுமின்றி இனிப்புகள், கார வகைகள் மற்றும் பேக்கிங் செய்யப்பட்ட உணவுப் பொருட்களையும் விற்பனை செய்து வருகிறது.
இந்த ஒப்பந்தத்தைத் தொடர்ந்து A2B நிறுவனத்தின் இயக்குநர் குழுத் தலைவராக உதய் சங்கர் பொறுப்பேற்க உள்ளார். நிறுவனத்தின் நிர்வாகம், தொழில்நுட்பம் மற்றும் செயல்பாடுகளை மேம்படுத்தி, முறையான தொழில்முறை நிர்வாகத்தின் கீழ் நிறுவனத்தை வளர்க்க இரு தரப்பும் திட்டமிட்டுள்ளன.
மேலும், எதிர்காலத்தில் பங்குச்சந்தையில் A2B நிறுவனத்தின் பங்குகளைப் பட்டியலிடுவதற்கான ஏற்பாடுகளையும் மேற்கொள்ள உள்ளன.
இதுகுறித்து A2B நிறுவனத்தின் இணை நிறுவனர் கே.டி. சீனிவாச ராஜா கூறுகையில், “சுமார் 50 ஆண்டுகளுக்கு முன்பு நானும் எனது சகோதரரும் இணைந்து தொடங்கிய ஒரு சிறிய இனிப்புக் கடை, இன்று லட்சக்கணக்கான குடும்பங்களின் அன்றாட வாழ்க்கையின் ஒரு பகுதியாக மாறியுள்ளது.
இதற்காக உழைத்த அனைவரையும் நினைத்து பெருமைப்படுகிறோம். Bodhi Tree நிறுவனத்துடன் இணைந்து A2B-ன் அடுத்தகட்ட வளர்ச்சியைத் தொடங்குவதில் மகிழ்ச்சி அடைகிறோம்.
இந்தத் திட்டத்தின் மூலம் வாடிக்கையாளர்கள், ஊழியர்கள் மற்றும் முதலீட்டாளர்கள் அனைவரும் நிறுவனத்தின் எதிர்கால வளர்ச்சியில் பங்குதாரர்களாகும் வகையில், பங்குச்சந்தையில் பட்டியலிடத் தகுதியான நிறுவனமாக A2B-ஐ உருவாக்குவோம்” என்றார்.
A2B நிறுவனம் ஏற்கெனவே சிங்கப்பூர், அமெரிக்கா, ஆஸ்திரேலியா, மலேசியா, இங்கிலாந்து உள்ளிட்ட நாடுகளில் செயல்பட்டு வருகிறது.
இந்த நாடுகளில் உள்ள தனது வணிக அனுபவத்தையும், வாடிக்கையாளர்களிடம் பெற்றுள்ள நம்பிக்கையையும் பயன்படுத்தி உலகின் பல்வேறு நாடுகளுக்கு நிறுவனத்தை விரிவுபடுத்தத் திட்டமிட்டுள்ளதாக ஜேம்ஸ் முர்டோக் மற்றும் உதய் சங்கர் தெரிவித்துள்ளனர்.