‘அலா வைகுந்தபுரம்லோ’ படத்தின் பிரம்மாண்ட வெற்றிக்குப் பிறகு, சுகுமார் இயக்கத்தில் உருவாகும் ‘புஷ்பா’ படத்தில் நடித்து வருகிறார் அல்லு அர்ஜுன்.இந்தப் படத்தைப் பெரும் பொருட்செலவில் மைத்ரி மூவி மேக்கர்ஸ் தயாரிக்கிறது.
தமிழ், தெலுங்கு, மலையாளம், இந்தி மற்றும் கன்னடம் என 5 மொழிகளில் ‘புஷ்பா’ படத்தை வெளியிடப் படக்குழு முடிவு செய்துள்ளது. இதில் அல்லு அர்ஜுனுக்கு நாயகியாக ராஷ்மிகா மந்தனா நடித்து வருகிறார்.
செம்மரக்கடத்தலை மையப்படுத்தி புஷ்பா தயாராவதாக சொல்லப்படுகிறது. கடத்தல்காரராக அல்லு அர்ஜுன் நடிக்கிறார்.
இந்தப் படத்துக்கு போலந்து நாட்டைச் சேர்ந்த கியூபா ஒளிப்பதிவாளராகவும், தேவி ஸ்ரீ பிரசாத் இசையமைப்பாளராகவும் பணிபுரிந்து வருகிறார்கள்.
இந்த படத்தில் பிரபல நடன இயக்குனர் ஜானி ஒரு பாடலுக்கு நடனமைத்துள்ளார். அல்லு அர்ஜுன் மற்றும் ஜானி இணைந்த புட்டபொம்மா பாடல் பெரிய வரவேற்பை பெற்றிருந்தது குறிப்பிடத்தக்கது.
டிசம்பரில் புஷ்பாவின் முதல் பாகம் வெளியாகிறது. இரண்டாவது பாகம் அடுத்த வருடம் வெளியாகிறது.
புஷ்பா பகத் பாசிலின் முதல் தெலுங்குப் படம். இப்போது பகத் பாசிலின் வில்லன் தோற்றத்தை வெளியிட்டிருக்கிறார்கள். மொட்டைத் தலை, அதில் வெட்டுத் தழும்பு என மனிதர் பார்வையிலேயே மிரட்டுகிறார்.