நெருக்கடி காரணமாக பிற மாநிலங்களில் போக்குவரத்து வசதியின்றி தவித்த புலம்பெயர் தொழிலாளர்கள் ஆயிரக்கணக்கானோர் அவரவர் சொந்த ஊருக்குத் திரும்ப சோனு சூட் போக்குவரத்து உதவிகளைச் செய்தார்.
மேலும், அத்தகைய தொழிலாளர்களுக்காகத் தனியாக வேலைவாய்ப்புத் தளம் ஒன்றையும் ஆரம்பித்தார். இவற்றோடு கல்வி உதவித்தொகை, ஸ்மார்ட்போன்கள், மொபைல் டவர் அமைப்பு என எண்ணற்ற உதவிகளைத் தொடர்ந்து செய்து வருகிறார்.
இதனிடையே நிஜ வாழ்க்கையில் ஹீரோவாக போற்றப்பட்டு வரும் சோனு சூட்டின் சேவையைப் பாராட்டி ஸ்பைஸ்ஜெட் விமான சேவை நிறுவனம் தனது போயிங் 737 விமானத்தில் அவரது புகைப்படத்தை வெளியிட்டு பாராட்டு தெரிவித்துள்ளது. மேலும் அனைவரையும் காத்த மீட்பருக்கு வணக்கம் என்றும் அவருக்குப் புகழாரம் சூட்டியுள்ளது.
இதைச் சமூக வலைதளங்களில் பலரும் பகிர்ந்து சோனு சூட்டைப் பாராட்டி வருகின்றனர். விமானத்தில் தன் முகம் பதிக்கப்பட்டதைப் பார்க்க தனது பெற்றோர் இருந்திருக்கலாம் என்று நடிகர் சோனு சூட் உருக்கமுடன் கூறியுள்ளார்.