நடிகர் ராணாவின் ‘காடன்’ படம் இந்த வாரம் வெளியானது. தெலுங்கில் ‘ஆரண்யா’ என்கிற பெயரிலும், இந்தியில் ‘ஹாத்தி மேரே ஸாத்தி’ என்கிற பெயரிலும் ஒரே நேரத்தில் இப்படம் வெளியாகியுள்ளது.
படத்தின் வெளியீட்டை முன்னிட்டு திரையுலகில் தனது நண்பர்களுக்குப் பரிசுப் பொருட்கள் அனுப்பி வாழ்த்துகள் பெற்றுள்ளார் நடிகர் ராணா.
ராணா அனுப்பிய பரிசுப் பொருட்களுக்கு நன்றி தெரிவித்து அவரது ‘காடன்’ படம் வெற்றி பெற வாழ்த்தினர் சமந்தா மற்றும் அனுஷ்கா.
தற்போது நடிகை த்ரிஷாவும் ராணாவுக்கு வாழ்த்து தெரிவித்துள்ளார். “ராணா, விஷ்ணு வாழ்த்துகள். பரிசுகளுக்கு நன்றி. ‘காடன்’ திரைப்படம் வெற்றி பெற உங்கள் இருவருக்கும் வாழ்த்துகள்” என்று குறிப்பிட்டு, ராணா அனுப்பிய பரிசுகளைப் புகைப்படம் எடுத்து அத்துடன் சேர்த்துப் பகிர்ந்தார் த்ரிஷா.
த்ரிஷாவின் இந்தப் பதிவை ஸ்க்ரீன்ஷாட் எடுத்த ராணா, ‘உங்கள் ஆதரவுக்கு நன்றி’ என த்ரிஷாவுக்கு பதில் நன்றி குறிப்பிட்டு, அதைத் தனது இன்ஸ்டாகிராம் பக்கத்தில் பகிர்ந்துள்ளார்.