சென்னை: தமிழக சட்டசபை தேர்தலுக்காக பாஜகவின் முதல்கட்ட வேட்பாளர்கள் பட்டியல் வெளியிடப்பட்டுள்ளது.
சட்டசபை தேர்தலை முன்னிட்டு அனைத்து கட்சிகளும் தங்களது வேட்பாளர்களை அறிவித்து வருகிறது. அதன் அடிப்படையில், தமிழகத்தில் பாஜக போட்டியிடும் 20 தொகுதிகளில் 17 தொகுதிகளுக்கான வேட்பாளர்கள பட்டியல் இன்று வெளியிடப்பட்டு உள்ளது.
பாஜக தலைவர் எல்.முருகன் தாராபுரம் (தனி) தொகுதியில் போட்டியிடுகிறார். அவர் திமுக வேட்பாளரை நேரடியாக எதிர்கொள்கிறார். கோவை தெற்கு தொகுதியில் வானதி சீனிவாசனும், அரவக்குறிச்சியில் அண்ணாமலையும் போட்டியிடுகின்றனர்.
காரைக்குடியில் ஹெச் ராஜாவும், நாகர்கோவிலில் எம்.ஆர்.காந்தியும் களமிறக்கப்பட்டுள்ளனர். சென்னை ஆயிரம் விளக்கு தொகுதியில் குஷ்பு வேட்பாளராக அறிவிக்கப்பட்டுள்ளார்.
மதுரை வடக்கு தொகுதியில் டாக்டர் சரவணன், மொடக்குறிச்சியில் சிகே சரஸ்வதி, திருக்கோவிலூர் தொகுதியில் முன்னாள் எம்எல்ஏ கலிவரதன், திட்டக்குடியில் பெரியசாமி ஆகியோர் வேட்பாளர்களாக அறிவிக்கப்பட்டு உள்ளனர். நெல்லை தொகுதிக்கு நயினார் நாகேந்திரன், திருவண்ணாமலையில் தணிகை வேல், குளச்சலில் ரமேஷ் ஆகியோர் வேட்பாளர்களாக அறிவிக்கப்பட்டு உள்ளனர்.
திருவையாறு தொகுதியில் பூண்டி எஸ் வெங்கடேசன், துறைமுகம் தொகுதியில் வினோஜ் பி செல்வம் ஆகியோரும், விருதுநகருக்கு பாண்டுரங்கன், ராமநாதபுரம் தொகுதிக்கு குப்புராமு ஆகியோரும் வேட்பாளர்களாக அறிவிக்கப்பட்டு உள்ளனர்.