கிழக்கு கடற்கரைச் சாலையில் திருவான்மியூர் முதல் உத்தண்டி வரையிலான 14.2 கி.மீ நீளமுள்ள நான்கு வழி மேம்பாலம் ரூ.2,100 கோடி மதிப்பீட்டில் செயல்படுத்தப்பட உள்ளது.
மாநில நெடுஞ்சாலைத் துறையின் கீழ் தனியார் கூட்டாண்மை மூலம் சாலை உள்கட்டமைப்பை மேம்படுத்துவதற்காக கடந்த ஆண்டு உருவாக்கப்பட்ட தமிழ்நாடு மாநில நெடுஞ்சாலை ஆணையம் (TNSHA) இதை நிறைவேற்றும்.
தமிழ்நாடு அரசு கட்டவுள்ள மிக நீளமான மேம்பாலத் திட்டமான இதன் நிலம் கையகப்படுத்துதல் மற்றும் பிற காரணங்களால் இறுதி திட்டச் செலவு அதிகரிக்கக்கூடும் என்று எதிர்பார்க்கபப்டுகிறது.
இந்தத் திட்டத்திற்கான சர்வதேச டெண்டர்களை TNSHA செவ்வாய்க்கிழமை அறிவித்தது.
இதனால், சென்னையிலிருந்து ECR வழியாக மாமல்லபுரம், புதுச்சேரி, கடலூர் மற்றும் பிற சுற்றுலா மற்றும் புனித யாத்திரைத் தலங்களுக்குச் செல்லும் வாகன ஓட்டிகள் சந்திக்கும் கடுமையான போக்குவரத்து நெரிசலில் இருந்து விரைவில் விமோசனம் கிடைக்க வாய்ப்புள்ளது.
டைடல் பூங்காவில் தொடங்கி உத்தண்டி வரை நடுவில் தூண்கள் அமைத்து நடைபாதையுடன் கட்டப்படும் இந்த மேம்பாலம் 16 முதல் 20 மீட்டர் அகலம் கொண்டதாக இருக்கும். இது கட்டிமுடிக்கப்பட்டதும் பயண நேரம் தற்போது 60 நிமிடங்களாக உள்ளது 15 – 20 நிமிடங்கள் குறையும் என்று எதிர்பார்க்கப்படுகிறது.
வங்கிக் கடன்கள் மூலம் தனியார் நிறுவனங்களின் ஆதரவுடன் கட்டப்படும் இந்த சாலையில் செல்லும் வாகன ஓட்டிகள் சுங்கக் கட்டணம் செலுத்த வேண்டும்.
இந்த மேம்பாலம் ECR இல் நெரிசலைக் குறைப்பது மட்டுமல்லாமல், அடையாறிலிருந்து ECR வழியாக OMR இல் கேளம்பாக்கம், திருப்போரூர் மற்றும் மாம்பாக்கம் வரை மாற்றுப் பாதையாகவும் இருக்கும், இதனால் அந்த வழித்தடத்தில் போக்குவரத்தை எளிதாக்கும் என்று கூறப்படுகிறது.
நீலாங்கரை, கொட்டிவாக்கம், வெட்டுவான்கேணி, இஞ்சம்பாக்கம், அக்கரை மற்றும் பனையூர் உள்ளிட்ட 13 அதிக நெரிசல் மிக்க சந்திப்புகள் இந்தப் பிரிவில் உள்ளன.
இந்த மேம்பாலத்தில் LB சாலை சந்திப்பு, திருவான்மியூர் RTO, நீலாங்கரை, இஞ்சம்பாக்கம் மற்றும் அக்கரை ஆகிய இடங்களில் வெளியேறும் சாய்வுப் பாதைகள் வழங்கப்படும்.
சுங்கச்சாவடியில் நுழையும் போது ஓட்டுநர்கள் டிக்கெட்டைப் பெற்று, வெளியேறும் போது பயணித்த தூரத்தின் அடிப்படையில் கட்டணம் செலுத்தும் மூடிய சுங்கச்சாவடி முறை செயல்படுத்தப்படும்
ECR இல் நெரிசலைக் குறைப்பதற்கான முந்தைய திட்டங்களில், LB சாலை – ECR சந்திப்பிலிருந்து திருவான்மியூர் RTO வரை மற்றும் அக்கரை சந்திப்பு வரையிலான மேம்பாலங்கள் அடங்கும். இந்தப் பிரிவு ஒரு நாளைக்கு 70,000 கார்கள் பயணிக்கின்றன.
திருவான்மியூரில் இருந்து அக்கரை வரையிலான 9.2 கி.மீ ECR பிரிவின் ஆறு வழிச்சாலைப் பணிகள் நிறைவடையும் தருவாயில் உள்ளன, 90% பணிகள் நிறைவடைந்துள்ளன என்று அதிகாரிகள் தெரிவித்தனர்.
செயல்பாட்டில் உள்ள மாநிலத்தின் மிக நீளமான உயர்த்தப்பட்ட வழித்தடம் NHAI ஆல் கட்டப்பட்ட 7.3 கி.மீ மதுரை-நத்தம் நெடுஞ்சாலை ஆகும். குறைந்தது மூன்று ஆறு வழிச்சாலை உயர்த்தப்பட்ட வழித்தடத் திட்டங்கள் சென்னையில் NHAI ஆல் மேற்கொள்ளப்படுகின்றன.
இதில் ஏற்கனவே கட்டுமானத்தில் உள்ள 20.1 கி.மீ நீள சென்னை துறைமுகம் – மதுரவாயல் இரட்டை அடுக்கு விரைவுச் சாலை, கிளாம்பாக்கத்திலிருந்து மறைமலை நகர் வரையிலான 17.5 கி.மீ நீள உத்தேச சாலை மற்றும் வெளிவட்டச் சாலையிலிருந்து மதுரவாயல் வரையிலான 18 கி.மீ நீள உத்தேச சாலை ஆகியவை அடங்கும்.
ECRல் திருவான்மியூர் முதல் உத்தண்டி வரை 16 கி.மீ. உயர்மட்ட சாலை திட்டம்…
