மேற்கு வங்க மாநிலத்தில் உள்ள அரசு மற்றும் அரசு உதவி பெறும் பள்ளிகளில் 25,753 ஆசிரியர்கள் மற்றும் பிற ஊழியர்களின் நியமனங்களை செல்லாது என்று உச்ச நீதிமன்றம் வியாழக்கிழமை ஒரு முக்கிய தீர்ப்பை வழங்கியது.
இந்த நியமனத்தை ரத்து செய்து, கல்கத்தா உயர் நீதிமன்றம் ஏப்ரல் 22, 2024 அன்று வழங்கிய தீர்ப்பை உச்ச நீதிமன்றம் உறுதி செய்துள்ளதுடன் மாநில அரசு புதிய ஆட்சேர்ப்பு செயல்முறையை தொடங்கப்பட வேண்டும் என்றும், இந்த செயல்முறை மூன்று மாதங்களுக்குள் முடிக்கப்பட வேண்டும் என்றும் கூறியுள்ளது.
தலைமை நீதிபதி சஞ்சீவ் கன்னா மற்றும் நீதிபதி சஞ்சய் குமார் ஆகியோர் அடங்கிய அமர்வு, முழு ஆட்சேர்ப்பு செயல்முறையும் பலவீனமானது மற்றும் குறைபாடுடையது என்று தீர்ப்பளித்தது.
உச்ச நீதிமன்றத்தின் இந்த தீர்ப்பு மேற்கு வங்க அரசுக்கு பெரும் தலைகுனிவை ஏற்படுத்தியுள்ளதாகக் கூறப்படுகிறது.
மனிதாபிமான அடிப்படையில் சில ஊனமுற்ற ஊழியர்களுக்கு விலக்கு அளித்துள்ள அமர்வு, அவர்கள் பணியில் தொடர அனுமதித்துள்ளது.
மேலும், நியமனங்கள் ரத்து செய்யப்பட்ட ஊழியர்கள் இதுவரை பெற்ற சம்பளம் மற்றும் பிற கொடுப்பனவுகளைத் திருப்பித் தர வேண்டியதில்லை என்றும் அது கூறியுள்ளது.
மேற்கு வங்க பணியாளர் தேர்வு ஆணையம் (SSC) 2016 இல் ஆட்சேர்ப்புத் தேர்வை நடத்தியது. 24640 பதவிகளுக்கு 23 லட்சம் பேர் தேர்வெழுதினர். 25,753 பேருக்கு பணி நியமனக் கடிதங்கள் வழங்கப்பட்டன.
இந்த ஆசிரியர் பணியிட நியமனத்தில் ஊழல் தொடர்பாக மேற்கு வங்க முன்னாள் கல்வி அமைச்சர் பார்த்தா சாட்டர்ஜி, டிஎம்சி எம்எல்ஏக்கள் மாணிக் பட்டாச்சார்யா மற்றும் ஜீவன் கிருஷ்ணா சாஹா ஆகியோருக்கு எதிராக சிபிஐ விசாரணை நடைபெற்று வருகிறது. இந்த வழக்கில் குற்றம் சாட்டப்பட்ட முன்னாள் மாநில கல்வி அமைச்சர் பார்த்தா சாட்டர்ஜி தற்போது சிறையில் உள்ளார்.
இதுதொடர்பாக கல்கத்தா உயர் நீதிமன்றத்தின் தீர்ப்பை எதிர்த்து 127 மனுக்கள் தாக்கல் செய்யப்பட்டன.
இந்த நிலையில், 25000க்கும் மேற்பட்ட ஆசிரியர் பணியிட நியமனங்களை ரத்து செய்து உச்சநீதிமன்றம் தீர்ப்பளித்துள்ளது.
இதுகுறித்து கருத்து தெரிவித்துள்ள மேற்கு வங்க முதல்வர் மம்தா பானர்ஜீ, ‘நீதித்துறை மீது எனக்கு மிகுந்த மரியாதை உண்டு.’ பள்ளி ஆசிரியர் நியமனத்தை செல்லாது என்று உச்ச நீதிமன்றம் வழங்கிய தீர்ப்பு ஏற்றுக்கொள்ள முடியாதது. “இருப்பினும், உச்ச நீதிமன்ற உத்தரவு பின்பற்றப்படும்” என்று செய்தியாளர் கூட்டத்தில் தெரிவித்தார்.
“நாங்கள் உச்ச நீதிமன்றத்தின் தீர்ப்பை ஏற்றுக்கொள்ள வேண்டும், மேலும் சட்டத்தின்படி அனைத்து சாத்தியமான நடவடிக்கைகளையும் எடுப்போம்” என்று அவர் கூறினார்.
மேலும் “மாநிலத்தின் கல்வி முறை சீரழிந்து போக வேண்டும் என்று பாஜக விரும்புகிறதா?” அவர் கேட்டார். “வேலை இழந்தவர்களை நான் சந்தித்து நம்பிக்கையை இழக்காமல் இருக்க அவர்களை ஊக்குவிப்பேன்” என்றும் மம்தா கூறினார்.
முழு ஆட்சேர்ப்பு செயல்முறையும் குறைபாடுடையது என்று உச்ச நீதிமன்றம் கூறியது. சரி, தகுதியான வேட்பாளர்கள் யார்? தகுதியற்றவர்கள் யார் என்பதை அடையாளம் காண முடியாது. நியாயமான ஆட்சேர்ப்பு செயல்முறை இல்லாமல் பாதிக்கப்பட்ட லட்சக்கணக்கான வேட்பாளர்களின் எதிர்காலத்தைப் பற்றியும் சிந்திக்க வேண்டியது அவசியம் என்றும் அவர் கூறினார்.