புதுடெல்லி:
இந்தியாவில் கொரோனா இறப்புகளின் உண்மையான எண்ணிக்கையை வெளிட வேண்டும் என்று காங்கிரஸ் தலைவர் ராகுல் காந்தி மத்திய அரசுக்குக் கோரிக்கை விடுத்துள்ளார்.
கொரோனா இறப்புகள் குறித்த அரசாங்கத்தின் புள்ளிவிவரங்கள் தவறானவை என்றும், ஒவ்வொருவருக்கும் மத்திய அரசு இழப்பீடு வழங்க வேண்டும் என்றும் காங்கிரஸ் தலைவர் ராகுல் காந்தி குற்றம் சாட்டியுள்ளார்.
இதுகுறித்து அவர் வெளியிட்டுள்ள டிவிட்டர் பதிவில், “கொரோனா-க்கு தங்கள் அன்புக்குரியவர்களை இழந்த குடும்பங்களின் கதைகள் உண்மை, அவர்களின் வலி மற்றும் துன்பங்கள் உண்மை. அரசாங்க புள்ளிவிவரங்கள் பொய். அரசாங்கம் உண்மையான புள்ளிவிவரங்களை வெளியிட்டு இழப்பீடு வழங்க வேண்டும். குடும்பங்கள் #4 லட்சம் தேனா ஹோகா” என்று குறிப்பிட்டுள்ளார்.
கொரோனா தொடர்பான இறப்புகள் குறித்து அரசாங்கத்தின் மீதான தனது தாக்குதலைத் தொடர்ந்த ராகுல், குஜராத்திலிருந்து பாதிக்கப்பட்டவர்களின் குடும்பங்களைப் பற்றிய காணொளியையும் டிவிட்டர் பதிவில் வெளியிட்டுள்ளார். இந்த காணொளியில், தொற்றுநோய் காலத்தில் குடும்பத்தினர் தங்கள் அனுபவத்தை விவரித்தனர்.
கொரோனா தொற்றுநோய்களின் போது, குஜராத்தின் வளர்ச்சி மாதிரியின் உண்மை அம்பலமானது என்று ராகுல் கூறினார். அவர் பல செய்திகளைப் பகிர்ந்து கொண்டு “குஜராத்தின் வளர்ச்சி மாதிரி” என்று கேலி செய்தார்.
“குஜராத் மாதிரி பற்றி நிறைய விவாதங்கள் உள்ளன. நாங்கள் பேசிய அனைத்து குடும்பங்களும் கொரோனா தொற்றுநோய்களின் போது, படுக்கைகள் அல்லது ஆக்ஸிஜன் அல்லது வென்டிலேட்டர்களைக் கண்டுபிடிக்க முடியவில்லை” என்று காங்கிரஸ் தலைவர் மேலும் கூறினார்.
குஜராத்தில் மட்டும் கொரோனா காரணமாக சுமார் மூன்று லட்சம் பேர் இறந்துள்ளனர் என்று அவர் குற்றம் சாட்டினார். ஆனால் தொற்றுநோயால் 10,000 பேர் மட்டுமே இறந்துள்ளனர் என்று மாநில அரசு கூறியது.
“குடிமக்கள் அரசாங்கத்திற்கு வரி செலுத்துவதால், எங்கள் குடிமக்களைப் பாதுகாப்பது அரசாங்கத்தின் பொறுப்பு. கொரோனா காரணமாக ஒரு நபர் யாரையாவது இழந்திருந்தால், உண்மை வெளிவர வேண்டும், இந்த மக்களுக்கு போதுமான இழப்பீடு கிடைக்க வேண்டும்,” என்று அவர் கூறினார்.
“இந்த கடினமான காலங்களில், நாங்கள் உங்கள் பக்கத்தில் நிற்க விரும்புகிறோம், நாங்கள் அனைவரும் உங்களுடன் இருக்கிறோம், கவலைப்படத் தேவையில்லை என்று நாங்கள் உங்களுக்கு உறுதியளிக்க விரும்புகிறோம்.
“இந்தியாவில், தாய், தந்தை, சகோதரர் மற்றும் சகோதரியை இழந்த லட்சக்கணக்கான குடும்பங்கள் உள்ளன. ஆனால் ஒன்றை நினைவில் கொள்ளுங்கள், இந்த குடும்பங்களுக்கு நான்கு லட்சம் ரூபாய் இழப்பீடு வழங்கக் காங்கிரஸ் கட்சி என்ன வேண்டுமானாலும் செய்யும்,” என்று அவர் மேலும் கூறினார்.