லோகேஷ் கனகராஜ் இயக்கத்தில் கமல் நடிக்கும் ‘விக்ரம்’ படத்தின் படப்பிடிப்பு சென்னையில் ஜூலை 16-ம் தேதி தொடங்கப்பட்டது.
இந்தப் படத்தை ராஜ்கமல் நிறுவனம் தயாரித்து வருகிறது. ராஜ்கமல் இண்டர்நேஷனல் பிலிம்ஸ் தயாரிக்கும் இப்படம் கமலின் 232வது திரைப்படம் . இந்த படத்துக்கு ஒளிப்பதிவாளராக க்ரிஷ் கங்காதரனும், இசையமைப்பாளராக அனிருத்தும் பணிபுரிந்து வருகிறார்கள்.
‘விக்ரம்’ திரைப்படம் முழுக்க க்ரைம் த்ரில்லர் பாணியில் உருவாகிறது. கமல் ஹாசன் நடிக்கும் இந்தப் படத்தில், ஃபஹத் பாசில், விஜய் சேதுபதி அர்ஜுன் தாஸ் மற்றும் நரேன் ஆகியோர் முக்கியக் கதாபாத்திரங்களில் நடிக்கிறார்கள். சண்டைப் பயிற்சிக்கு இரட்டையர்களாக அன்பறிவ் ஒப்பந்தம் செய்யப்பட்டனர்.
கமலுக்கு மகனாக முக்கிய கதாபாத்திரத்தில் நடிக்க காளிதாஸ் ஜெயராம் ஒப்பந்தம் செய்யப்பட்டுள்ளார்.
விக்ரம் படத்தில் ஷிவானி நாராயணன் நடிப்பதாக தகவல் வெளிவந்துள்ளது. விக்ரம் படத்தில் விஜய் சேதுபதிக்கு ஜோடியாக ஷிவானி நாராயணன் நடிப்பதாக தகவல்கள் வெளியாகியிருக்கின்றன. ஷிவானி வரும் 24-ம் தேதி காரைக்குடியில் நடக்கும் படப்பிடிப்பில் கலந்துக் கொள்வார் எனவும் செய்திகள் வெளியாகியிருக்கின்றன.
தற்போது நடிகர் நரேனும் படத்தில் இணைந்துள்ளார். இதனை லோகேஷ் கனகராஜ் அதிகாரப்பூர்வமாக அறிவித்துள்ளார். “நடிகனாக வேண்டும் என்ற கனவை ஏற்படுத்திய லெஜென்டுடன் ஒரே படத்தில் நடிப்பதின் மூலம் ஒரு சின்ன ரசிகனின் கனவு நிறைவேறியிருக்கிறது” என்று நரேன் கமலுடன் நடிப்பது பற்றி குறிப்பிட்டுள்ளார்.
இதற்கு முன் லோகேஷின் கைதி படத்தில் நரேன் முக்கியமான வேடத்தில் நடித்திருந்தார். நீண்ட நாள்களுக்குப் பிறகு அவருக்கு ஒரு நல்ல திரைப்படமாக அது அமைந்தது. இப்போது விக்ரமிலும் அவருக்கு லோகேஷ் வாய்ப்பு வழங்கியுள்ளார்.